Yoshua 16 - Ebibulia 2001

Ensi eyo Efuraimu na Manase bagabiirwe obugwaizoba

¹ Omugabo gw'oruganda rwa Yozefu gwayemaga Yorudani gugoba Yeriko, oburugaizoba bw'enchuro za Yeriko, gwolekera omw'irungu; kandi gwema Yeriko gwinugukira omu mabanga gugoba Beteli.

² Kwema Beteli kugoba Luzu, guraba omu nsi y'Abaariki gugoba Ataroti.

³ Aho gusoka orubaju rw'obugwaizoba gugoba ensi y'Abafuleti gugendelera gugoba ensi ya Betihoroni obugyaifo, gugoba Gezeri, gulekelera aha nyanja.

⁴ Oruganda rwa Yozefu, orwa Manase n'orwa Efuraimu bahabwa batyo obusika bwabo.

Efuraimu

⁵ Ensi y'Abaefuraimu kuhondera amahiga gabo ekaba eli eti: Orubibi rw'ensi yabo rwayemaga Atarotiadari rugya oburugaizoba rugoba Betihoroni obugyaruguru;

⁶ orubibi nirushoholera aha Nyanja ya Mediterania. Bikara nirugoba Mimeta. Aho oburugaizoba orubibi ruzingora rwolekeire Taanatishilo, rugendelera rugishabuka, rugoba oburugaizoba bwa Yanoa.

⁷ Aho ruruga Yanoa rusoka rugoba Ataroti na Naara ruturuka Yeriko; nirulekelera Yorudani.

⁸ Kwema Tapua orubibi rugendelera orubaju rw'obugwaizoba rugoba aha Kaiga ka Kana; rulekelera aha Nyanja ya Mediterania. Egyo niyo nsi y'oruganda rw'Abaefuraimu omu mahiga gabo;

⁹ hamoi n'ebigo n'ebyaro ebyashoroirwe omu nsi ya baijukuru ba Manase bakabibaha.

¹⁰ Tibabingiremu Bakanaani abaturaga Gezeri, kityo Abakanaani abo bona bakatura hamoi n'Abaefuraimu kugoba kir'eki, kyonkai baba bairu, bakora emilimo y'omujarabo.