Yoshua 11 - Ebibulia 2001

Yoshua nasinga Yabini n'abajunibe

¹ Orwo Yabini omukama wa Hazori yahuliire ebyo, atuma ahali Yobabu omukama wa Madoni, n'aha mukama wa Shimuroni, n'aha mukama wa Akishafu,

² n'aha bakama ababaire bali bikara omu nsi z'amabanga, n'omuli Araba orubaju rwa kasi rwa Kinereti, n'omu nsi y'omuteleka, n'omuli Dori obugwaizoba;

³ n'omu Bakanaani oburugaizoba n'obugwaizoba, Abaamori, Abahiti, Abaperizi n'Abayebusi n'omu nsi z'amabanga n'Abahivi omu kibazi ky'Eibanga lya Herimoni omu nsi ya Mizipa.

⁴ Batabara n'amahe gabo gona. Abantu obungi nk'omushenye gw'omwaro, baina n'efarasi zingi n'amagali gangi muno.

⁵ Abakama abo bona bateranisa amahe gabo, baija basisira hamoi aha Kaiga ka Meromu kurashana na Isiraeli.

⁶ Omukama agambira Yoshua ati, “Otabatina, aha rw'okuba nyenkya akanya nk'aka ndabakuheleza bona bafire, aha rwa Isiraeli. Olemaze efarasi zabo, amagali gabo ogokye n'omuliro.”

⁷ Kityo Yoshua n'abaisherukarebe babagwamu kibandagara aha Kaiga ka Meromu, bababunda.

⁸ Omukama abanaga omu mikono y'Abaisiraeli, babaita, abandi bababinga kuhika Sidoni Engundu na Misirefotimaimu, n'oburugaizoba babagobya omu Ruhanga rwa Mizipa; babaita, tibasigireho n'omoi.

⁹ Yoshua akora nk'okwo Omukama yamugambiire, alemaza efarasi zabo, ayokya amagali gabo n'omuliro.

¹⁰ Aho agaruka akwata Hazori, omukama wamwo amwisa embanda. Orwa mbere Hazori ekaba nekiza amani ebigo by'abakama balinya bona.

¹¹ Abaturagamu bona babaisa embanda. Babasilikiza kimoi, thalimu yasigairemu n'omoi, n'ekigo akitaho omuliro.

¹² Ebigo byona by'abakama abo n'abakama babyo, Yoshua abakwata abaisa embanda. Abasilikiza kimoi nk'okwo Musa omwiru w'Omukama yaragiire.

¹³ Kyonkai Abaisiraeli tibayokize bigo byona byona ebyabaire bili aha tubanga shana Hazori yonkai niyo Yoshua yayokize.

¹⁴ Ebintu by'ebigo ebyo n'ebitunganwa Abaisiraeli babinyaga, kyonkai abantu bhakabaisa embanda babasilikya. Tibasigireho n'omoi.

¹⁵ Nk'okwo Omukama yabaire ahangiire omwiruwe Musa, nikwo na Musa wenene yaragiire Yoshua, Yoshua nawe nikwo yakozire. Eby'Omukama yabaire ahangiire Musa, Yoshua akabikora byona.

Ensi eyakwetwe Yoshua

¹⁶ Yoshua akwata ensi egyo yona, ey'amabanga na Negebu yona, eya Gosheni n'ensi y'omuteleka na Araba n'ensi y'amabanga ga Isiraeli n'omuteleka gwayo.

¹⁷ Ayema aha Ibanga lya Halaki elilebangaine na Seiri agoba Baaligadi omu Ruhanga rwa Lebanoni omu kibazi ky'Eibanga lya Herimoni. Akwata abakama bamwo bona, abatera abaita.

¹⁸ Kyonkai akarashana nabo ebiro bingi.

¹⁹ Taliho kigo kyagizire mirembe n'Abaisiraeli, kwihyaho Abahivi, abanyansi ba Gibeoni. Abasigaire bhakabakwata bona omu ndashana.

²⁰ Omukama hakabagumanganisa emitima akigendeleire, barashane n'Abaisiraeli. Abaisiraeli tibabagiliire buganyizi. Bakabasilikya nk'okwo Omukama yabaire ahangiire Musa.

²¹ Omu biro ebyo Yoshua agya asilikya Abaanaki b'omu mabanga, n'aba Heburoni, Debiri na Anabu n'omu mabanga ga Yuda n'omu mabanga gona ga Isiraeli. Yoshua abasilikiza kimoi n'ebigo byabo.

²² Taliho Muanaki n'omoi yasigaire mu nsi y'Abaisiraeli shana omuli Gaza mwonkai, n'omuli Gati na Ashidodi nimwo basigaire bake.

²³ Ensi agikwata yona nk'okwo Omukama yabaire agambiire Musa. Yoshua agiha Isiraeli obusika bwabo kuhonderana n'enganda zabo. Aho ensi echulera eba etakiina ndashana.