Yoshua 10 - Ebibulia 2001

Abaamori nibaterwa

¹ Orwo Adonisedeki omukama wa Yerusalemu yahuliire okwo Yoshua akwete Ai, n'okwo agisilikiize kimoi, akahulira okwo agikozire n'omukama wayo nk'okwo yakozire Yeriko n'omukama wayo, n'okwo abanyansi ba Gibeoni bagizire emirembe na Isiraeli mara bakatura nabo,

² batina muno aha rw'okuba Gibeoni kikaba kili kimoiho omu bigo ebihango. Gibeoni ekaba eli mpango kukira Ai, n'abashaija bamwo bona bali manzi.

³ Kityo Adonisedeki omukama wa Yerusalemu atuma ahali Hohamu omukama wa Heburoni, n'ahali Piramu omukama wa Yarimuti, n'ahali Yafia omukama wa Lakishi, n'ahali Debiri omukama wa Egiloni nagamba ati,

⁴ “Mwije kunu, munjune tutere aba Gibeoni kuba bakozire endagano na Yoshua n'Abaisiraeli.”

⁵ Aho abakama bontanu b'Abaamori: Owa Yerusalemu, owa Heburoni, owa Yarimuti, owa Lakishi n'owa Egiloni, bahikanisa hamoi amahe gabo gona, baija nago basisira bolekeire Gibeoni, bagirashanisa.

⁶ Abantu ba Gibeoni batuma ahali Yoshua omu rusisira rwa Giligali, bati, “Otanaga bairu bawe; yanguha oturokore, otujune; aha rw'okuba abakama bona b'Abaamori ab'omu mabanga bahurwire kututabalira.”

⁷ Kityo Yoshua aruga Giligali, agenda n'eihe lyona n'abaisherukare emanzi batabuziremu.

⁸ Omukama amugambira ati, “Otabatina, ahakuba nabanagire omu mikono yawe, taliho mushaija arakwehanga.”

⁹ Aho Yoshua aruga Giligali ekiro kyona, ababunda kibandagara.

¹⁰ Omukama abayagayagya aha rw'okutina Abaisiraeli, Abaisiraeli babaitira Gibeoni, bababinga babarabya ogw'akashozi ka Betihoroni, bagenda nibabaita kulemwa kuhika Azeka na Makeda.

¹¹ Orwo balikwiruka Abaisiraeli nibasoka akashozi ka Betihoroni, Omukama abateza amabare gahango g'enjura kulemwa kugoba Azeka, bafa. Abaisirwe orubare bhakaba bali bangi kushaga ab'Abaisiraeli baisize embanda.

¹² Kiro ekyo Omukama yanagire Abaamoni omu mikono ya Isiraeli, amugambira omu maisho g'Abaisiraeli ati, “Eizoba, lyemelere Gibeoni obutetengya, n'okwezi kwemelere omu Ruhanga rwa Aihaloni.”

¹³ Eizoba lyemelera obutetengya, n'okwezi tikwashegenyukire, kuhika orwo eihanga lyayehoroize ababisha balyo. Eki kihandikirwe mu Kitabo kya Yashari. Eizoba lyemelera nk'ekiro kyona, tilyarahukire kutobera.

¹⁴ Thakabagaho kiro nk'ekyo omu biro ebyayebembeire n'ebyahondeire orwo Omukama yahulire omuntu; kuba akakunda yarashanira Isiraeli.

¹⁵ Aho Yoshua atabaruka na Isiraeli yona, baija Giligali omu rusisira.

Yoshua nakwata abakama bontanu b'Abaamori

¹⁶ Abakama abo bontanu bairuka, besheleka Makeda omu mpako.

¹⁷ Bagambira Yoshua bati, “Abakama abo bontanu aliho abashangire Makeda omu mpako.”

¹⁸ Yoshua agamba ati, “Muhilingise amabare gahango aha butahiro bw'empako, mugiteho abantu b'okubalinda;

¹⁹ kyonkai inywe mutaikaraho. Mubinge ababisha, kandi abali enyuma mubaite. Mutabaikiliza kutaha mu bigo byabo, Omukama Ruhanga wanyu yababanagire omu mikono.”

²⁰ Yoshua n'Abaisiraeli baita muno Abaamori nk'abarabamaraho, n'orwo abandi bahungiire omu bigo byabo eby'eboma bakakira.

²¹ Abaisherukare bagaruka Makeda owa Yoshua omu rusisira eli milembe. Taliho muntu yagambire kigambo aha Baisiraeli.

²² Aho Yoshua agamba ati, “Kingura empako munyihiremu abakama abo bontanu mubandetere.”

²³ Bakora batyo; baihya abakama abo bontanu omu mpako babamuletera: Omukama wa Yerusalemu, owa Heburoni, owa Yarimuti, owa Lakishi n'owa Egiloni.

²⁴ Kababaturukize bhakabamuletera, Yoshua ayeta Abaisiraeli bona abashaija, agambira abakuru b'abaisherukare ababaire batabaire nawe ati, “Ija mulibate abakama aba aha bikya.” Aho baija babalibata aha bikya.

²⁵ Yoshua abagambira ati, “Mutatina, mara mutahwahwana, mugume, mumanzare, aha rw'okuba nikwo Omukama aragira atyo ababisha banyu abo mulikurashanisa.”

²⁶ Ahanyuma Yoshua tera abakama abo, abahanika aha miti etanu abaita. Basiba bahanikirwe aha miti egyo kugoba bwaigoro;

²⁷ kyonkai omu kanya ak'eizoba lyaizire kutobera, Yoshua aragira kubahanantura aha miti kubanaga omu mpako eyo babaire beshelekiremu. Empako bagikingisa amabare gahango kuhika kuhika kir'eki.

Yoshua nakwata ensi nyingi y'Abaamori

²⁸ Kiro ekyo, Yoshua akwata ekigo kya Makeda, akitera, n'omukama wakyo amwisa embanda. Asilikiza kimoi abamwo bona, tiyasigireho n'omoi. Kandi omukama wa Makeda amukora nk'okwo yakozire owa Yeriko.

²⁹ Aho Yoshua n'Abaisiraeli bona, baraba Makeda kugya Libuna, bagitera.

³⁰ Ekigo ekyo Ruhanga akinaga omu mikono ya Abaisiraeli, n'omukama wakyo kwakwo. Abaisiraeli baisa abamwo bona embanda, tiyasigiremu n'omoi. Kandi omukama wamwo amukora nk'okwo yakozire owa Yeriko.

³¹ Yoshua na Isiraeli yona, baraba Libuna bagya Lakishi, bagitanga embaju zona bagitera.

³² Aha kiro kya kabili Omukama anaga ekigo kya Lakishi omu mikono ya Isiraeli, abamwo babaisa embanda nk'okwo baisire aba Libuna.

³³ Aho Holamu omukama wa Gezeri atemba kujuna ekigo kya Lakishi. Yoshua amwita n'abaisherukarebe abamaraho.

³⁴ Yoshua araba Lakishi n'Abaisiraeli bona bagya Egiloni. Bagitanga embaju zona bagitera.

³⁵ Kir'ekyo bagikwata, abamwo babaisa embanda. Bona ababaire bhalimu abasilikiza kimoi nk'okwo yakozire aba Lakishi.

³⁶ Aho baruga Egiloni bagya Heburoni; nayo bagitera.

³⁷ Bagikwata, abamwo n'omukama wabo babaisa embanda. Ebigo ebyabaire bigyataine nabyo babikwata, na buli omoi ayabaire halimu bamwita. Tiyasigireho n'omoi; okwo yakozire Egiloni nikwo yasilikize Heburoni, akaita buli muntu ayabaire halimu.

³⁸ Yoshua n'Abaisiraeli bagaruka Debiri, nayo bagitera.

³⁹ Bagikwata n'omukama wayo n'ebigo ebyabaire bigyataine. Ababaire bhalimu babaisa embanda babasilikya. Tiyasigiremu n'omoi. Okwo yakozire Heburoni na Libuna n'omukama wayo nikwo yakozire Debiri n'omukama wayo.

⁴⁰ Kityo Yoshua asinga ensi yona, ensi z'amabanga n'eza Negebu n'ensi z'omuteleka n'ez'obusoka n'abakama bazo bona. Tiyasigiremu n'omoi. Abantu hakabaita bona nk'okwo Omukama Ruhanga wa Isiraeli yabaire ahangire.

⁴¹ Ensi agisinga yona kwema Kadeshibarinea kugoba Gaza, n'ensi yona ya Gosheni kugoba Gibeoni.

⁴² Akwata abakama abo bona n'ensi zabo omu kanya kamoi, aha rw'enshonga Omukama Ruhanga wa Isiraeli akarashanira eihangalye.

⁴³ Aho Yoshua n'Abaisiraeli bagaruka Giligali omu rusisira.