Yoshua 1 - Ebibulia 2001

Ruhanga naragira Yoshua kutera Kanaani

¹ Musa omwiru w'Omukama kayabaire yafire, Omukama agambira Yoshua eyai wa Nuni, omuheleza wa Musa ati,

² “Musa omwiru wange afire. Mbwenu aho imuka oshabuke Yorudani egi, iwe n'abantu aba bona, mutahe omu nsi eyo ndikubaha inywe Abaisiraeli.

³ Buli mwanya ogwo ekilenge kyawe kiralibataho nagukuha nk'okwo nagambire Musa.

⁴ Kwema omw'irungu na Lebanoni egi kugoba aha Mwiga Guhango ogwa Efurati, ensi yona y'Abahiti kugoba aha Nyanja Mpango, kwolekera obugwaizoba eraba nsi yawe.

⁵ Talibaho muntu alikwehanga ebiro byona by'oburora bwawe. Nk'okwo mbaire ndi na Musa, nikwo ndaba na iwe. Tinkunage anga kukusigaho.

⁶ Ogume, omanzare, aha rw'okuba n'iwe olisikisa abantu aba ensi eyo nanahiliire baishebo kugibaha.

⁷ Ekiliho ogume, omanzare muno, oyelinde, okwate Amateka gona ago Musa omwiru wange yakuragiire. Otaligashobya n'akake nirwo oligoshoka hona hona mbali oragyaga.

⁸ Ebili omu kitabo eki eky'Amateka oikarega nobigamba. Obyekuume omushana n'ekiro obone kwelinda kukora byona ebikihandikirwemu; aho nirwo n'ebindi eby'olikora biligenduka; mara aho oligoshoka.

⁹ Nakuragira. Ogume, mara omanzare; otatina anga kuhwahwana inye Omukama Ruhanga wawe ndi hamoi na iwe hona hona mbali oragyaga.”

Yoshua naha abantu ebiragiro

¹⁰ Aho Yoshua aragira abakuru b'embaga ati,

¹¹ “Murabe omu nsisira muragire embaga muti, ‘Mutekateke entanda zanyu, ahakuba omu biro bishatu nimwija kushabuka Yorudani egi, kutaha omu nsi ey'Omukama Ruhanga wanyu alikubaha mugilye.’ ”

¹² Agambira Abarubeni n'Abagadi n'enusu y'oruganda rwa Manase ati,

¹³ “Mwijuke ekyo Musa omwiru w'Omukama yabaragiire ati, ‘Omukama Ruhanga wanyu alibaha ensi egi ey'emilembe.’

¹⁴ Mbwenu abakazi banyu n'abana banyu n'ebitunganwa byanyu barasigara omu nsi eyo Musa yabahaire buseli bwa Yorudani. Kyonkai abaisherukare mushabuke mukwete ebikwato by'endashana, mwebembere barumuna banyu mubajune,

¹⁵ kuhika orwo Omukama araha barumuna banyu ensi y'emilembe nka inywe, nabo bakalya ensi ey'Omukama Ruhanga wanyu arabaha. Aho mugaruke omu butaka bwanyu, mulye ensi eyo Musa omwiru w'Omukama yabahaire buseli bwa Yorudani oburugaizoba.”

¹⁶ Bamuhorora bati, “Byona ebyo waturagira turabikora, na hona hona mbali oratutuma turagenda.

¹⁷ Nk'okwo twahuliire Musa omuli byona, nikwo turahulira na iwe; ekikuru Omukama Ruhanga wawe abe na iwe nk'okwo yabaire ali na Musa.

¹⁸ Omuntu wena wena arashengaga omuhango gwawe anga atahuliire by'olikugamba, akahondera eky'olikumuragira, bamwite. Ekiliho iwe ogume, omanzare.”