Yona 4 - Ebibulia 2001

Ekiniga kya Yona n'obuganyizi bw'Omukama

¹ Yona kayaboine byaba bityo atamwa muno, anigara.

² Ashaba aha Mukama ati, “Waitu Mukama, eki tikyo nagambire orwo nabaire nkyali omwaitu? Nikyo nayanguhiire kwirukira Tarishishi. Nkamanya okw'oba Ruhanga omufura n'omuganyizi atanigara bwangu, kandi ogira ekisha; n'orwo oba wagondize kubonabonyia omuntu oyeiza, omuleka.

³ Mbwenu waitu Mukama, onyihyemu omwoyo; hakili nfe kushaga okurora.”

⁴ Omukama agamba ati, “K'olikugira ekiniga n'oba okozirege?”

⁵ Ahanyuma Yona aruga omu kigo, agya ashuntama oburugaizoba, azingazinga akaju akahungiramu omushana, alinda kubona okwo ekigo kiraba.

⁶ Ahanyuma Omukama Ruhanga ameza omujuna aha kaju eiguru ako Yona yabaire alimu, kumuhungya omushana ogwabaire nigumushasa. Yona ashemelerwa muno omujuna ogwo.

⁷ Kyonkai bukeire bwankya Ruhanga aragira ekihuka kilya omujuna ogwo gwoma.

⁸ Eizoba kalyabaire lyashabukire, Ruhanga asindika omuyaga gulikwokya ogw'oburugaizoba. Aho omushana gutera Yona omu mutwe aija kukaba. Ashaba kufa, nagamba ati, “Hakili nfe, kushaga okurora!”

⁹ Nawe Ruhanga amubaza ati, “K'olikunigalira omujuna noba okozirege?” Yona ahorora ati, “Ego, ego ninkorage kunigara, nangu nyina ekiniga eky'okunyita.”

¹⁰ Omukama amugambira ati, “Iwe noganyibwa omujuna ogw'otahendekeire, n'okugubyara obaire otagubyaire. Gwemelize omu kiro, gwayoma omu kiro ekihondeireho.

¹¹ Mbwenu inye ntaganyibwa Ninive, ekigo eki ekihango, ekinamu abaana abalikushaga 120,000 abatalikumanya kya kukora na kuleka, ekilimu n'ebitunganwa bingi?”