Yona 2 - Ebibulia 2001

Enshara ya Yona

¹ Yona ayema omw'ibunda ly'enfuru egyo, ashaba Omukama Ruhangawe ati,

² “Nkatakira Omukama omu matangwa gange, yamporora. Nkalira nyemire Sheoli, wahulira eiraka lyange.

³ Kuba okannaga obuziba omu nyanja engundu, amaizi gangi ago gambunda; amayengo gawe g'amaani gandaba eiguru.

⁴ Aho nagamba nti, ‘Rwona wanchwa, Rwensinga yawe entakatifu tindishuba kugibona.’

⁵ Amaizi gakambunda, nabulira omu nyanja engundu, n'amalebe g'enyanja ganyezinga omu mutwe.

⁶ Nkasongoka okuzimu nagoba omu nsimbo y'amabanga, nagoba omu nsi y'okuzimu emihingo yankingirayo ebiro byona. Kyonkai Mukama Ruhanga wange, ompimbwire wanyihya omu kiina.

⁷ Kanayanzire, naijuka Omukama, enshara yange yakugoba, omuli Rwensinga yawe entakatifu.

⁸ Abafukamira ebishushani ebitaina mugasho baba baisire obwesigwa bwabo ahali iwe.

⁹ Kyonkai inye ndakuhoyera nkusiime, nkutambire n'ekitambo, ebyo ndagaine mbigobesheleze. Omukama niwe arokora.”

¹⁰ Aho Omukama aragira enfuru, etanaka Yona aha rukaru.