Yona 1 - Ebibulia 2001

Yona naburwa kuhulira

¹ Omukama akagambira Yona eya Amitai ati,

² “Oimuke ogende Ninive, ekigo ekyo ekihango okitatire, kuba nimanya okwo bali babi.”

³ Kyonkai Yona airuka Omukama, asingirwa Tarishishi. Agya Yopa, ashangayo emeli eyabaire negya Tarishishi. Ahoora, ataha omu meli n'ababaire nibagya Tarishishi agendeleire kwiruka Omukama.

⁴ Nawe Omukama asindika omuyaga gungi omu nyanja, gwihya n'enkomaizi n'emeli eija kwatika.

⁵ Abalimba bahukuka; buli muntu atakira ruhangawe. Ebyabaire bili omu meli babinaga omu nyanja kukeyesa obusikizi. Yona akaba asongokire omunda y'emeli abyamire, anagiire muno.

⁶ Omugoba amugoba amubaza ati, “Nogiraki iwe, onagiire! Imuka otakire ruhanga wawe, shana yakutuganyira tukira.”

⁷ Ababaire bali omu meli bagambirangana bati, “Tuteke enshoga, tubone n'ohai omuli ichwe ayatuletera akabi aka.” Bateka enshoga, zikwata Yona.

⁸ Aho bamugambira bati, “Mpaho otugambire ayatuletera akabi aka. Okora mulimoki? Noruga nkahai? Oli wa nsiki? Isi oli wa ihangaki?”

⁹ Yona abagambira ati, “Ndi Muhebureo. Nfukamira Omukama Ruhanga ow'omw'iguru ayatonzire enyanja n'orukaru.”

¹⁰ Abashaija batina muno munonga, bamubaza bati, “Eki wakoraki?” Kuba bakamanya okwo alikwiruka Omukama enshonga akaba yakibagambiire.

¹¹ Enkomaizi ekaba neyeyongera kugira amani, bamubaza bati, “Tukugire tutai iwe, enyanja ekatekana tukagira emirembe?”

¹² Abahorora ati, “Munshuture munnage omu nyanja nirwo eratekana. Nimanya okwo mulikuzira inye, nikyo mulikutelerwa enkomaizi.”

¹³ Nawe abashaija beyongera kutera engahi n'amani kugarura emeli aha mwaro, kuba enkomaizi ekaguma ebakilize amani.

¹⁴ Aho batakira Omukama bati, “Waitu Mukama nitukutagiliza otatwita kututura muntu ogu; omuntu ogu ataina ntambara tutamwita okatukwata mushango. Rwona ebi kuba biti nikwo wayenda, waitu Mukama.”

¹⁵ Kityo bakwata Yona bamunaga omu nyanja, n'enyanja etekaana.

¹⁶ Abashaija batina muno Omukama, bamutambira ekitambo, mara baragana kumukolera.

¹⁷ Omukama aragira enfuru mpango kumira Yona. Amara omu ibunda ly'enfuru ebiro bishatu n'emishana yaho.