Yohana 9 - Ebibulia 2001

Yesu nakiza omuntu ayazairwe ahumire

¹ Ka Yesu yabaire nahingura, abona omuntu ayabaire ali mpume kwema okuzarwa.

² Abegesibwabe bamubaza ati, “Rabi, omuntu ogu kuzarwa aigaire amaisho, ayafakaire n'ohai? Ni wenene anga abazairebe?”

³ Yesu abahorora ati, “Tiyahumisiibwe kufakarakwe anga kwa bazairebe. Ekyo kikabaho ebikorwa bya Ruhanga kabibonekera omuli wenene ogu.

⁴ Turagiirwe kukora emilimo y'ayantumire, orwo omushana gukyajwa. Nikija kuba kiro orwo omuntu atashobore kukora mulimo.

⁵ Orwo nkyali omu nsi, inye n'inye mushana gw'ensi.”

⁶ Kayabaire nagamba atyo, achwa ahansi ebichwanta abijungisa eitaka, eitaka elyo alisiga omushaija omu maisho,

⁷ namugambira ati, “Ogende onabe omu kitunga kya Siloamu” (nikwo kugir'oti, “Ayantumire.”) Omushaija agenda anaba, agaruka nabona.

⁸ Batanibe na bona abamubonaga nashabiliza bebaza bati, “Ogu tiwe mushaija atura ashuntamire nashabiliza?”

⁹ Abantu abandi bati, “N'iwe,” abandi bati, “Chei, namushusha.”

¹⁰ Bamubaza bati, “Amaisho gawe gahumuruguka gatai?”

¹¹ Abahorora ati, “Omushaija alikwetwa Yesu yajunga eitaka yalinsiiga omu maisho, yamara yangambira ati, ‘Ogende Siloamu onabe;’ aho ngenda naba, mbona.”

¹² Bamubaza bati, “Ali nkahai?” Ahorora ati, “Tindikumanya.”

Abafarisayo nibabaliiliza emikilire y'empume

¹³ Abayahudi bakwata ayabaire ali mpume bamutwalira Abafarisayo.

¹⁴ Orwo Yesu yajunga eitaka akakiza empume ekaba eli Sabato.

¹⁵ Abafarisayo bashuba babaza ayabaire aigaire amaisho emikilireye. Abagambira ati, “Yajunga eitaka yalinsiiga omu maisho, nanaba, mbwenu nimbona.”

¹⁶ Abafarisayo abamoiho bati, “Omuntu ogu talikuruga ahali Ruhanga, enshonga talikwekomya Sabato.” Kyonkai abandi bati, “Omufakare yakukora atai ebitangazo nk'ebi?” Aho Abafarisayo bahakana.

¹⁷ Kityo bashuba babaza ayatambirwa obwigare bati, “Iwe nomugambahoki ogwo orwo yakukiza obwigare bw'amaisho?” Ahorora ati, “Murangi.”

¹⁸ Abayahudi tibaikiliize okwo omushaija yabaire ali mpume n'okwo yatambirwa obwigare bw'amaisho, kuhika orwo bayesire abazaire ba wenene,

¹⁹ bakababaza bati, “Ogu ni mutabani wanyu, owo mulikugamba okwo yazairwe atalikubona?”

²⁰ Abazairebe bahorora bati, “Nitumanya okwo ogu ali mutabani waitu, n'okwo yazairwe atalikubona.

²¹ Kyonkai emibonereye eya mbwenu aha titulikugimanya. Mumubaze; muntu mukuru, ayehorolere.”

²² Abazairebe okugamba batyo bakaba nibatina Abayahudi, enshonga Abayahudi bakaba barahiire okwo omuntu aragamba okwo Yesu ali Kirisito baramubinga omu sinagogi.

²³ Nikyo abazairebe bagambiire bati, “Muntu mukuru, mubaze wenene.”

²⁴ Kityo beta omushaija ayakiziibwe obuhume omurundi gwa kabili, bamugambira bati, “Osiime Ruhanga, kuba nitumanya Yesu ogu okwo ali mufakare.”

²⁵ Abahorora ati, “K'araba ali mufakare, inye tindikumanya. Nimanya ekigambo kimoi kishai, okwo nabaga mpume, kyonkai mbwenu nimbona.”

²⁶ Bamubaza bati, “Yakugira atai?”

²⁷ Abashubamu ati, “Nabagambiire kyonkai timulikuhulira. Nimwenda kushuba kuhulira ekigambo ekyo? Nainywe nimwenda kuba begesibwabe?”

²⁸ Bamujuma bati, “Omwegesibwawe n'iwe; ichwe tuli begesibwa ba Musa.

²⁹ Nitumanya okwo Ruhanga yafumoire na Musa; nawe omuntu ogu mbali alikuruga titulikuhamanya.”

³⁰ Ayakiziibwe obwigare abahorora ati, “Aha kiki? Eki kyaba kitangazo! Mbali alikuruga timulikuhamanya, kyonkai inye yampumurura amaisho.

³¹ Nitumanya okwo Ruhanga tahulira bafakare. Kyonkai k'omuntu aba ali wa Ruhanga kwo akamara akakora eby'alikwenda, omuntu ogwo Ruhanga amuhulira.

³² Kwema ensi yabaho tikikahulirwaga omuntu kuhumuurura ayazairwe ali mwigazi w'amaisho.

³³ K'omuntu ogu atakurugire ahali Ruhanga, taliho kyoyakukozire.”

³⁴ Bamuhorora bati, “Okazalirwa omu bufu wabukuliramu, mbwenu noija kwegesa ichwe?” Aho bamubinga omu sinagogi.

Obuhume bw'omwoyo

³⁵ Yesu agya amanya okwo omushaija bamubinga omu sinagogi. Kayamazire kumubona amubaza ati, “Iwe noikiliza Omwana w'Omuntu?”

³⁶ Ahorora ati, “N'ohai waitu, mwikilize?”

³⁷ Yesu amugambira ati, “Wamuboine, mara n'iwe alikufumora naiwe.”

³⁸ Ogwo agambira Yesu ati, “Mukama, naikiliza,” amara amufukamira.

³⁹ Yesu agamba ati, “Nkaija omu nsi kugiramura, abatalikubona babone, kandi abalikubona bahume amaisho.”

⁴⁰ Abafarisayo ababaire bamuli haihi bahulira ekigambo ekyo, bamubaza bati, “Aho naichwe tuhumire?”

⁴¹ Yesu abagambira ati, “Kuba muli mpume mwakubaire mutaina ntambara; kyonkai mbwenu orwo mulikugamba muti, ‘Nitubona,’ aho entambara yanyu nebaikaraho.”