Yohana 8 - Ebibulia 2001

Omukazi ayakwatiirwe omu busiyani

¹ Yesu akwata omuhanda agenda omw'Ibanga ly'Emizeituni.

² Bwankya karai agaruka Rwensinga; abantu bona bamuhurulira, ashuntama abeegesa.

³ Abeegesa b'Amateka n'Abafarisayo baleta omukazi ayabaire akwetwe nasiyana, bamwemeleza omugati y'abantu

⁴ bagambira Yesu bati, “Mwegesa, omukazi ogu yakwatwa nasiyana.

⁵ Omuntu nk'ogu omu Mateka ga Musa tusaine kumuteza amabare. Iwe nomugambahoki?”

⁶ Ekyo bakakigamba nibamulenga, baije babone eky'okumutoijera. Yesu ainama abanza kuhandikisa orukumu omw'itaka.

⁷ Kabamubalize bakazigilira, ainuguka abagambira ati, “Okwo muli araba ataina bufu abe wa mbere kumuteza amabare.”

⁸ Ashuba ainama ahandikisa orukumu omw'itaka.

⁹ Orwo bahuliire ekyo yabahorora bakwata omuhanda bagenda, barugaho buli muntu wenkai, kubandiza aha mukuru kushaaga bona, Yesu asigara n'omukazi amwemeleire omu maisho.

¹⁰ Yesu ainuguka aleba, amugambira ati, “Iwe mukazi, balihai abalikukutoijera? Taliho n'omoi ayakuramura?”

¹¹ Omukazi agamba ati, “Taliho n'omoi Mukama wange.” Na Yesu agamba ati, “Nanye tindikukuramura. Iroko otalifakara rundi.”]

Yesu mushana gw'ensi

¹² Yesu ashuba agambira Abafarisayo ati, “N'inye mushana gw'ensi. Ampondera taraba mu mwilima, mara aligira omushana gw'oburora.”

¹³ Nirwo Abafarisayo bamugambire bati, “Noyejulira iwe wenene; eby'olikwejulira tibya mazima.”

¹⁴ Yesu ahorora ati, “N'orwo ndaba ntalikwejulira, ebyo ndikugamba by'amazima, enshonga nimanya mbali narugire na mbali ndikugya. Kyonkai inywe timulikumanya mbali narugire, na mbali ndikugya timulikuhamanya.

¹⁵ Nimuramura emiramulire ey'abantu, kyonkai inye tindikuramura n'omoi.

¹⁶ Kandi n'orwo nakuramura, eiramu lyange ly'amazima, kuba t'inye nyenkai ndikuramura. Nindamura nyemire na Tata ayantumire.

¹⁷ Kikahandikwa omu Mateka ganyu okwo obujulizi bw'abantu babili buba bw'amazima.

¹⁸ Inye nyenene n'inyejulira, kandi na Tata ayantumire nanjulira.”

¹⁹ Aha rw'ekyo bamugambira bati, “Sho alihai?” Yesu ahorora ati, “Inye timulikummanya, na Tata timulikumumanya. Kuba nimummanya, na Tata mwakumumanyire.”

²⁰ Ebigambo ebi Yesu akabigambira Rwensinga omu kiyumba ky'amasanduku g'ebihongo.

Mbali ndikugya timwina kwijayo

²¹ Abafarisayo abo Yesu ashuba abagambira ati, “Ninyija kugenda, mulimpiga mushube mugwe omu mafu ganyu. Mbali ndikugya timwina kugyayo.”

²² Aho Abayahudi bati, “Isi naija kweita, orwo alikugamba ati, ‘Mbali ndikugya timwina kwijayo?’ ”

²³ Yesu abagambira ati, “Inywe muli b'omu nsi, inye ndi w'omw'iguru. Muli b'ensi egi, inye tindi wa nsi egi.

²⁴ Nabagambira okwo muligwa omu mafu ganyu, mara muligagwamukwo kamutaikiliize okwo n'inye asingiire.”

²⁵ Bamubaza bati, “Oli ohai?” Yesu abagambira ati, “Nibyo nkabagambira kwema aha mbandizo.

²⁶ Nyinai eby'okubagambaho bingi n'eby'okubaramura. Kyonkai ayantumire w'amazima, mara n'ensi ningigambira ebyo nahuliire ahali wenene.”

²⁷ Tibashobokeirwe okwo alikubagambira Ishe.

²⁸ Nikwo Yesu kugamba ati, “Kamuramara kuhanika Omwana w'Omuntu, muramanya okwo n'inye asingiire, mumanye okwo ntalikwekolera byange, shana okugamba ebyo Tata yanyegesize.

²⁹ Mara wenene ayantumire tuli hamoi, tannagirane, aha rw'okuba buli kaanya ninkora ebilikumushemelera.”

³⁰ Bangi abahuliire Yesu nagamba ebyo, bamwikiliza.

Abegeleere n'abairu

³¹ Yesu agambira Abayahudi ababaire bamwikiliize ati, “Kamuraikara mukwete ebigambo byange, muraba muli begesibwa bangekwo,

³² kandi muramanya amazima, mara amazima ago garabaha obwegeleere.”

³³ Bonene bamuhorora bati, “Ichwe tuba baana ba Aburahamu, titukabaga bairu ba muntu wena wena. Aho kyaija kitai iwe kugamb'oti, ‘Muraba begeleere?’ ”

³⁴ Yesu abahorora ati, “Nimbagambira amazima, buli omoi akora obufu aba mwiru wabwo.

³⁵ Omwiru taba mwana muzarwa ebiro byona; omwana n'iwe aba mwana muzarwa ebiro byona.

³⁶ Kityo k'Omwana arabashoboza kuba begeleere, muraba begeleere kwokwokwo.

³⁷ Nimanya okwo muba baana ba Aburahamu. Kandi okwo nimuhiga kunyita, ahakuba ebigambo byange tibilikubataha.

³⁸ Inye ebyo naboine ahali Tata nibyo ndikubagambira, nainywe ebyo muhuliire ahali isheinywe mubikore.”

³⁹ Bamushubamu bati, “Tataichwe aba Aburahamu.” Yesu abagambira ati, “Kamwakubaire muli baana ba Aburahamu mwakukozire ebyo Aburahamu yakozire.

⁴⁰ Kyonkai mbwenu inye abagambiire amazima ago nahuliire ahali Ruhanga, nimuhiga kunyita. Ebyo Aburahamu tiyabikozire.

⁴¹ Ebyo isheinywe yakozire nibyo mulikora.” Bamugambira bati, “Ichwe tituba baana ba busiyani; twinai Isheichwe omoi, n'iwe Ruhanga.”

⁴² Yesu abagambira ati, “Kuba Ruhanga ali Isheinywe, mwakungondize, aha rw'enshonga nzarwa Ruhanga mara nkaruga ahali wenene. Inye tinaizire aha bwange, wenene n'iwe yantumire.

⁴³ Kubaki ebyo ndikugamba mutalikubishobokerwa? Timulikushobokerwa aha rw'enshonga ebigambo byange nibibashasa kamulikubihulira.

⁴⁴ Isheinywe ni Sitani, mara nimugonza kukora ebyo isheinywe ogwo alikwenda. Manya kwema akarai kona aba mwisi, n'amazima tagagonza n'akake, taba wa mazima. Abeiya, agamba okwo ashangwa ayemire, enshonga aba w'ebishuba, mara aba ishe wa bona abagamba ebishuba.

⁴⁵ Inye timulikunyikiliza aha rw'enshonga nimbagambira amazima.

⁴⁶ Okwo muli alikungamba okwo ndakozire obufu n'ohai? Kandaba ningamba amazima kubaki mutalikunyikiliza?

⁴⁷ Omuntu ashangwa ali wa Ruhanga, n'ebigambo bya Ruhanga abihulira. Ekyo mutalikuhulilira bigambo ebyo manyasi timuli ba Ruhanga.”

Yesu na Aburahamu

⁴⁸ Abayahudi bashubamu Yesu bati, “Tituli mu mazima katulikugamba okwo oli Musamaria mara oinaimu eisitani?”

⁴⁹ Yesu abahorora ati, “Inye tinyina sitani; inye ninkunisa Tata, kandi inywe timulikunkunisa.

⁵⁰ Mara okwo tikugir'oti n'inyehigira ekitinwa ekyange; haliho omoi alikukihiga, mara n'iwe alikundamulira.

⁵¹ Nimbagambira amazima, k'omuntu alyekomya ebigambo byange, ogwo taliziza kufa.”

⁵² Abayahudi bamugambira bati, “Mbwenu twamanya okwo oinaimu eisitani. Aburahamu akafa, n'abarangi bafa; iwe noshuba nogamba oti, ‘Omuntu alyekomya ebigambo byange taliziza kufa?’

⁵³ Iwe washaga isheichwe Aburahamu ayafire? N'abarangi bakafa! Nolenga oli ohai iwe?”

⁵⁴ Yesu abagarukamu ati, “Kandaba n'inyeha ekitinwa, aho ekitinwa kyange kya bushai. Ekitinwa ninkihabwa Tata, owo mulikugamba okwo ali Ruhanga wanyu.

⁵⁵ Kyonkainu timumumanya; kandi inye nimummanya. Kanakuba ngambire okwo ntalikumumanya, nakubaire ndi mugambi w'ebishuba nka inywe. Kyonkai nimumanya n'ebigambobye nimbyekomya.

⁵⁶ Isheinywe Aburahamu yashemelerwaga ekiro kimoi kugya akambona; mara akambonakwo yashemelerwa.”

⁵⁷ Aho Abayahudi bamugambira bati, “Tokagobize myaka makumi gatanu, Aburahamu wamubon'otai?”

⁵⁸ Yesu abagambira ati, “Nimbagambira amazima, Aburahamu athakabaireho, inye nsingiire.”

⁵⁹ Baronda amabare kugamuteza, kyonkai ayesheleka, aruga Rwensinga.