Yohana 7 - Ebibulia 2001

Yesu n'abarumuna

¹ Ebyo kabyahoire, Yesu arambura Galilaya. Hakaba atalikwenda kurambura Buyahudi. Abayahudi bakaba nibagonza kumwita.

² N'ekiro kikuru ky'Abayahudi ekyetwa Kiro kikuru ky'Ensisira kikaba kiraliire kugoba.

³ Abarumuna bamugambira bati, “Ruga aha ogye Buyahudi, abegesibwa bawe bagye babone eby'olikukora.

⁴ Kuba taliho muntu agonza kumanyika kandi akesheleka.”

⁵ Nobona n'abarumuna abo bakaba batalikumwikiliza.

⁶ Yesu yabahorora ati, “Obukiro bwange tibukagobire; kyonkai obukiro bwanyu bwa buli kaanya.

⁷ Inywe ensi teina kubanoba, kyonkai inye nennoba, aha rw'okuba ninjulira okwo ebigiro byayo bili bibi.

⁸ Inywe mugye aha bugenyi. Inye tinkabaire kugya aha bugenyi obwo, kuba akaanya kange tikakagobire.”

⁹ Kayamazire kubagambira atyo yaikara Galilaya.

Yesu aha Kiro kikuru ky'Ensisira

¹⁰ Abarumuna kababaire bagiire Yerusalemu aha kiro kikuru, na wenene agyayo. Kyonkai akagenda bwesheleke atalikubonwa muntu.

¹¹ Aha kiro kikuru Abayahudi bamuhiga nibabaza bati, “Ali nkahai?”

¹² Abantu bakaba nibamugambaho muno; abamoi bati, “Muntu murungi;” abandi bati, “Chei, nashengesa embaga.”

¹³ Kyonkai aha rw'okutina Abayahudi, taliho muntu yamugambiireho orubona.

¹⁴ Ekiro kikuru kakyagobire omugati, Yesu yagya Rwensinga yayegesa.

¹⁵ Abayahudi batangalira emyegeshezeye bati, “Omuntu ogu obumanyi akabwihya nkahai, okwo takegaga?”

¹⁶ Nikwo Yesu kubahorora ati, “Okwegesa okwo nyegesa tikuba kwange, kuba kw'ayantumire.

¹⁷ Kaishe muntu alikunda kukora ebyo ayantumire agonza n'iwe alimanya okwo okwegesa kwange kuruga ahali Ruhanga, anga nka nyegesa ninkoza obushobora bwange.

¹⁸ Omuntu ayagamba nakoza obushobora obwe nyabwe ogwo aba nahiga ekitinwa. Kyonkai alikuhiga ekitinwa ky'ayamutumire ogwo n'iwe w'amazima, kandi naba ali muhikiilire.

¹⁹ Musa tiyabahaire Mateka? Kyonkai okwo muli taliho ahikya Mateka ago. Mbwenu nimwenda kunyitiraki?”

²⁰ Abantu bamuhorora bati, “Otungamiirwe eisitani. Alikwenda kukwita n'ohai?”

²¹ Yesu abahorora ati, “Nkakora ekintu kimoi mwakitangalira inywena.

²² Musa hakabateraho okutahiri (ti kugir'oti okutahiri kukatabuka ahali Musa, kukatabuka ahali bashw'enkurw'inywe); kandi mutahiri omuntu ahali Sabato.

²³ Mbwenusi kamuraba mutahiri omuntu ahali Sabato mutashagire Mateka ga Musa, nimunigalira inye aha rw'okuba nakiza omuntu wena ahali Sabato?

²⁴ Mutaliihwa aha mizokere ya muntu mukaramura; mube nimuramura eiramu ely'amazima.”

Yesu ni Masiha

²⁵ Kandi abandi aba Yerusalemu bagamba bati, “Omuntu owo balikuhiga kwita tiw'ogu?

²⁶ Mbwenu ali aha nagamba orubona, mara tibaina kwo bamugira! Kyonkai mbwenu abatwazi nibamanya okwo ogu ali Kirisito?

²⁷ Ichwe mbali omushaija ogu alikuruga nituhamanya. Kyonkai ka Kirisito alija taliho n'omoi alimanya mbali aliruga.”

²⁸ Nikyo Yesu yagambire n'eiraka lihango nayegesa omuli Rwensinga ati, “Lero nimummanya, nimummanya na mbali narugire? Kyonkai tinaizire aha bwange. Ayantumire munyamazima, nawe inywe timulikumumanya.

²⁹ Inye nimumanya; nkaruga ahali wenene, mara n'iwe yantumire.”

³⁰ Kityo bahiga kumukwata, kyonkai taliho yamutaireho mikono, kuba esaa ekaba etakagobire.

³¹ N'orwo kili kityo abantu bangi bakamwikiliza, bagamba bati, “Orwo Kirisito alija alikora ebitangazo kushaaga eby'omuntu ogu alikukora?”

Nibatuma ab'okukwata Yesu

³² Abafarisayo bahulira embaga nemunyanyanta etyo, aho nikwo abakuhani bakuru n'Abafarisayo bonene kutuma abakuru b'abaisherukare kumukwata.

³³ Yesu agambira abantu ati, “Nkyaina inywe hakabanga akandi, nyije nshube ow'ayantumire.

³⁴ Mulimpiga kyonkai timulimbona; mbali ndiba ndi timwina kwijayo.”

³⁵ Abayahudi begeya bonene bonkai bati, “Omuntu ogu naralira kugya nkahai mbali tutakumubona? Nagonza kugya omu Bayahudi abali Bugiriki kugya kwegeshezayo Abagiriki?

³⁶ Nagendeleraki kugamba ati, ‘Mulimpiga kyonkai timulimbona,’ kandi ati, ‘Mbali ndiba ndi timwina kwijayo?’ ”

Emigera y'amaizi g'oburora

³⁷ Ekiro ky'enzindo ky'obugenyi, nikyo kiro kikuru muno, Yesu ayemelera agamba muno ati, “K'omuntu aragiraga eiliho, aije ahali inye anywe.

³⁸ Alikanyikiliza alishusha okwo ebihandiko bitakatifu bilikugamba biti, ‘Emigera y'amaizi g'oburora eliruga omu mutimagwe.’ ”

³⁹ Aha hakaba nagamba Mwoyo, owo abalimwikiliza balihabwa; kuba kugoba kaanya ako Mwoyo bakaba batakamuhairwe, aha rw'enshonga Yesu hakaba atakaboine kitinwakye.

Abantu nibabeganuka

⁴⁰ Orwo abantu abandi bahuliire ebigambo ebyo bagamba bati, “Ogu murangikwo.”

⁴¹ Abandi bati, “Ogu ni Kirisito.” Kyonkai abandi bati, “Kirisito aruge Galilaya?

⁴² Ebihandiko bitakatifu tibigamba okwo Kirisito alitabuka ahali Daudi, omu kyaro kya Betelehemu, mbali Daudi yaturaga?”

⁴³ Aho abantu baba nikwo bamuhakanaho batyo bakabeganuka.

⁴⁴ Nangu abandi benda kumukwata, kyonkai taliho yamutaireho ngaro.

Okutaikiliza kw'abatwazi b'Abayahudi

⁴⁵ Abakuru b'Abaisherukare kabagarukire omu bakuhani bakuru n'Abafarisayo, bababaza bati, “Kubaki mutamuleta?”

⁴⁶ Ndi bonene babagarukamu bati, “Taliho muntu aragambiire nk'ogu!”

⁴⁷ Abafarisayo babahorora bati, “Nainywe nibyo mwagiiremu ebyo?

⁴⁸ Haliho omukuru wena wena anga Omufarisayo n'omoi ayamwikiliize?

⁴⁹ Nawe embaga egi etalikumanya Mateka, yabaire ndaamwa.”

⁵⁰ Nikodemo ayabaire yagiire owa Yesu, mara hakaba ali Mufarisayo mutahi wabo, abagambira ati,

⁵¹ “Amateka gaitu garamura omuntu gatabandize kumuhuliliza n'okumanya eby'alikukora?”

⁵² Bamushubamu bati, “Iwe na iwe oli wa Galilaya? Henjuza Ebihandiko Bitakatifu obone okwo hataliho murangi yakuruga Galilaya.” [

⁵³ Bakwata omuhanda bagenda, buli omoi ashuba omuka.