Yohana 5 - Ebibulia 2001

Yesu nakiza omurwaire aha rutunga

¹ Ebyo kabyahoire Abayahudi bakaba baina ekiro kikuru kyabo, Yesu nawe agya Yerusalemu.

² Omuli Yerusalemu haihi n'Ekihigi ky'Entaama bhakaba haliho ekitunga, omu Ruyahudi nikyetwa Betizata, kiina amataho gatanu.

³ Omu mataaho ago bhakaba habyamirwemu abarwaire bangi muno: Empume, abalema, abakabire orubaju, [balinzire amaizi kagatabukilira;

⁴ kuba omumalaika wa Ruhanga yasongokaga omu rutunga, atabura amaizi. Omuntu ayatahaga omu rutunga ali wa mbere amaizi gatabukiliire akira endwara yona eyaba emukwete.]

⁵ Omw'itaho bhakaba halimu omushaija amazire emyaka 38 arwaire.

⁶ Orwo Yesu yamuboine mara akamanya okwo yabyamire omwo omwanya gurai, amubaza ati, “Nogonza kutambirwa?”

⁷ Omurwaire amuhorora ati, “Waitu, tinyina muntu wa kunteeka mu kitunga orwo amaizi galikutabukilira; kandikuba ningenda omuntu ondijo agantahiramu mbere.”

⁸ Yesu amugambira ati, “Imuka, shutura amachera gawe, ogende.”

⁹ Aho n'aho omushaija akira, ashutura amachera ga wenene atambuka. Kir'ekyo ekaba eli Sabato.

¹⁰ Nikwo Abayahudi kugambira omushaija ayakizire bati, “Kiro kya Sabato; notangwa kushutura amachera gawe.”

¹¹ Ndi wenene abahorora ati, “Omushaija ayankiza yangambira ati, ‘Shutura amachera gawe otambuke.’ ”

¹² Bamubaza bati, “Omushaija ayakugambira kushutura amachera gawe okagenda n'ohai?”

¹³ Omushaija ayakiziibwe tiyamanyire n'ohai Yesu hakaba atakizoka, embaga eyabaire eli aho ekaba eli nyingi.

¹⁴ Ahanyuma Yesu ashanga omushaija ogwo Rwensinga, amugambira ati, “Wabona okwo wakira! Otalifakara rundi okaija okagwerwa enaku ezishaagireho.”

¹⁵ Omushaija akwata omuhanda agenda agambira Abayahudi okwo ayamukiza ni Yesu.

¹⁶ Nikwo Abayahudi kugingiiza Yesu aha rw'okugira atyo ahali Sabato.

¹⁷ Kyonkai Yesu abahorora ati, “Tata akyakora, na inye ninkora.”

¹⁸ Aho Abayahudi beyongera kumuhiiga kumwita, kuba tiyahenzire muhango gwa Sabato gwonkai, akashuba Ruhanga yamweta Ishe, yayeiganisa na Ruhanga.

Obushobora bw'Omwana

¹⁹ Yesu agambira Abayahudi ati, “Nimbagambira amazima, Omwana taina kukora kyo wenene yayenda, shana ekyo yabona Ishe nakora. Kuba ekyo Ishe akora, ekyo kyonene nikyo Omwana akora.

²⁰ Ishe agonza Omwana mara amwoleka byona ebyo akora. Kandi naija kumwoleka eby'amani kushaaga ebi mwije mutangare.

²¹ Orwo Ishe ahimbura abafu hakabaha oburora, kutyo n'Omwana aha oburora ab'ayenda.

²² Ishe taramura muntu, kyonkai obushobora bwona bw'okuramura akabuha Omwana,

²³ abantu bona babone kuha Omwana ekitinwa, ekitinwa ekyo baha Ishe. Ataha Mwana kitinwa aba nakiima Ishe ayamutumire.

²⁴ Nimbagambira amazima, ahulira ekigambo kyange akashuba akesiga ayantumire ogwo aina oburora obutalihwaho. Ogwo taliramurwa, kuba yakizire ahali rufu, yaboine oburora.

²⁵ “Nimbagambira amazima, esaa neija kwija, nangu na mbwenu aha niyo yonene, orwo abafu balihulira eiraka ly'Omwana wa Ruhanga, mara abalihulira eiraka elyo balirora.

²⁶ Kuba okwo Ishe wenene aina oburora, nikwo yasingiire Mwana na wenene kugira oburora,

²⁷ akamuha n'obushobora bw'okuramura, aha rw'okuba Mwana w'Omuntu.

²⁸ Eki kitabatangaza; kuba esaa neija kwija orwo bona abali omu bituro barahulira eirakalye

²⁹ bakahimbuka bakabona oburora, nibo baliinya abakozire kurungi. Kyonkai abakozire kubi n'orwo balihimbuka baliramurwa.

Yesu ajulirwa ebikorwabye

³⁰ “Taliho kyonakukora mu bushobora bwange. Okwo mpulira mba nikwo ndamura. Kandi eiramu lyange liba ly'amazima; kuba tinkora kyondikwenda, nkora ekyo ayantumire alikwenda.

³¹ Kandaba n'inyejulira inye nyenene obujulizi bwange ti bwa mazima.

³² Haliho ondijo anjulira, mara nimanya okwo obujulizi obwo alikunjulira bw'amazima.

³³ Mutumire ahali Yohana, yajulira amazima.

³⁴ Inye tindagiirwe kujulirwa muntu; ebi nimbigamba kamurokoka.

³⁵ Yohana abaire ali tara elikwaka, ekamulikiza banu. Mara mukabanza mwashemelerwaho akaanya kake kubona nabamulikiza.

³⁶ Kyonkai inye obujulizi obwo nyinabwo nibushaga obwa Yohana, kuba ebyo Tata yantungire kugobesheleza, nibyo byonene byonene ebi ebyo ndikukora, nibinjulira okwo natumirwe Tata.

³⁷ Na Tata ayantumire anjuliire. Timukahuliraga irakalye, kandi timukabonaga kwo ashusha.

³⁸ N'ekigambokye tikibasingiiremu, kuba owo yatumire timulikumwikiliza.

³⁹ Nimuhenjuuza Ebihandiko Bitakatifu nimulenga muti omwo nimwo muraihya oburora obutalihwaho; kandi Ebihandiko byonene nibyo bilikunjulira.

⁴⁰ Kyonkai nimwanga kunyijaho kubona oburora obutalihwaho.

⁴¹ Inye ekitinwa tindikukihabwa bantu.

⁴² Kandi nimanya okwo mutalikugonza Ruhanga.

⁴³ Nkaija omw'ibara lya Tata, kyonkai timulikunkunda. K'omuntu ondijo arayeizira, ogwo nimwija kumukunda.

⁴⁴ Nimugonza okuhaisilizangana, kandi timulikutaho mani kuhiiga kitinwa ekiruga ahali Ruhanga omoi wenkai, aho mwakunyikiliza mutai?

⁴⁵ Mutakutekeleza muti ninyija kubatoijela ahali Tata. Musa owo mushuubira n'iwe alikubatoijera.

⁴⁶ Kamwakubaire nimwikiliza Musa, nanye mwakunyikiliize, aha rw'okuba n'inye yahandikiireho.

⁴⁷ Nawesi kamutalikwikiliza byo yahandikiire, muraikiliza mutai ebyo ndikubagambira?”