Yohana 4 - Ebibulia 2001

Yesu n'Omusamariakazi

¹ Orwo Omukama Yesu yamanyire okwo Abafarisayo bahuliire okwo aina abegesibwa bangi n'okubabatiza kubashagya Yohana,

² (n'orwo Yesu wenene atabatizaga, shana abegesibwabe),

³ akwata omuhanda aruga Buyahudi agaruka Galilaya,

⁴ araba Samaria.

⁵ Agoba omu kigo kimoi kya Samaria ekyetwa Sikari, bwatana endimiro eyo Yakobo yabaire ahaire omutabani Yozefu.

⁶ Mwonene omwo bhakaba halimu eiziba lya Yakobo, aho na Yesu ashangwa yalemeirwe omu rugendo ashuntama aha iziba elyo. Zikaba zili nk'esaa mukaaga.

⁷ Omukazi wa Samaria aija kutaaha amaizi. Yesu amugambira ati, “Ompeho amaizi g'okunywa.”

⁸ Abegesibwabe bakaba bagiire omu kigo kugura ekyakulya.

⁹ Omusamariakazi amushubamu ati, “Kyaija kitai iwe Omuyahudi kwenza inye Omusamariakazi amaizi g'okunywa?”

¹⁰ Yesu amuhorora ati, “Kuba nomanya amatungwa ga Ruhanga, okamanya n'alikukugambira ati, ‘Ompeho amaizi g'okunywa,’ iwe wenene wakubaire wamushabire amaizi g'oburora yagakuhaire.”

¹¹ Omukazi amugambira ati, “Waitu, toinai kyakutahisa, kandi eiziba lili harai muno; iwe aho amaizi g'oburora wagaihya nkahai?

¹² Iwe wakira tataichwe Yakobo ayanyoire amaizi aha iziba eli, n'abaanabe, n'ebitunganwabye, akamara akalituha?”

¹³ Yesu amugambira ati, “Buli muntu anywa amaizi aga alishuba agire eiliho,

¹⁴ kyonkai wena alinywa amaizi ago ndikwija kumuha, taligira iliho rundi. Amaizi ago ndikwija kumuha galimubera nchuro etalyoma ey'okumugobya aha burora obutalihwaho.”

¹⁵ Omukazi amugambira ati, “Waitu, bampe amaizi ago, ntaligira iliho rundi, nangu ntaligaruka hanu aha rundi kutaaha amaizi.”

¹⁶ Yesu amugambira ati, “Iroko oyete mushaija wawe aije hanu aha.”

¹⁷ Omukazi amuhorora ati, “Tinyina mushaija.” Yesu amushubamu ati, “Wagambage okugir'oti, ‘Tinyina mushaija.’

¹⁸ Washweirwe abashaija batanu, n'ow'oinaiwe mbwenu aha ti mushaija wawe. Eki wagamba eky'amazima.”

¹⁹ Omukazi amugambira ati, “Waitu nabona okw'oli murangi.

²⁰ Batataichwe bafukamiraga aha ibanga eli; kandi inywe mugamba okwo omuli Yerusalemu nimwo hali omwanya ogw'abantu balikuragirwa kufukamiramu.”

²¹ Yesu amugambira ati, “Mukazi, oikilize, okuba esaa neija kwija orwo mutalifukamira Tata aha ibanga eli anga omuli Yerusalemu.

²² Mufukamira owo mutalikumanya. Ichwe tufukamira owo tulikumanya, aha rw'okuba okurokoka kwema omu Bayahudi.

²³ Kyonkai akaanya kalija, na mbwenu aha nik'aka, orwo abalikufukamira Ruhanga kwo balifukamira Isheichwe omu mwoyo n'amazima okwo akali mara okwo alikwenda.”

²⁴ Ruhanga aba Mwoyo, kandi n'abamufukamira nibaragirwa kumufukamira omu Mwoyo n'amazima.

²⁵ Omukazi amugambira ati, “Nimanya okwo Masiha, n'iwe Kirisito, alija. K'alija alitwoleka ebintu byona.”

²⁶ Yesu amugambira ati, “Inye alikufumora na iwe ndi wenene.”

²⁷ Omu kaanya ako abegesibwabe baija. Batangara kubona nafumora n'omukazi, kyonkai taliho yamubalize ky'alikwenda anga enshonga eyamufumoza n'omukazi.

²⁸ Omukazi asigaho emuga y'amaizi akwata omuhanda agya omu kigo, agambira abantu ati,

²⁹ “Mwije mubone omuntu ayangambira byona ebyo ndakozire. Wenene ogu tiyakuba Kirisito?”

³⁰ Baruga omu kigo baija ahali Yesu.

³¹ Aho abegesibwa bamutagiliza bati, “Rabi, oboneke.”

³² Ndi wenene abagambira ati, “Inye nyina eky'okulya ekyo mutalikumanya.”

³³ Kityo abegesibwa babazangana bati, “Haliho ayamuletera ekyakulya?”

³⁴ Yesu abagambira ati, “Ekyakulya kyange ni kukora ebyo ayantumire alikwenda, kugobesheleza eikoralye.

³⁵ Timugamba muti, ‘Hakyaliyo emyezi enai kwija kugesha?’ Nimbagambira, mulebe mubone okwo emyaka yayezire, eigesha lyabaho.

³⁶ Omugesi abona emperwaye, mara abona empeerwa y'oburora obutalihwaho, omubibi n'omugesi baija bashemelerwa hamoi.

³⁷ Aho enfumo egi ekaba y'amazima bati, ‘Ogu abiba, ondijo agesha.’

³⁸ Nkabatuma kugesha ebyo mutahendekeire. Abandi bakahendwa emilimo, inywe mwaija mwataaha omu byobahendekeire.”

³⁹ Abasamaria bangi ab'ekigo ekyo kya Sikari bammikiliza aha rw'eby'omukazi yagambire ati, “Yangambira byona ebyo ndakozire.”

⁴⁰ Abasamaria kabamugobire bamushaba k'abaikaraho; amarayo ebiro bibili.

⁴¹ Bamwikiliza bangi kushagaho aha rw'ekigambokye.

⁴² Bagambira omukazi bati, “Titukiikiliza aha rwa bigambo byawe, aha rw'okuba twayehulilira, mara twamanyakwo okwo ogu ali murokozi w'ensi.”

Yesu nakiza omwana w'omukuru

⁴³ Ebiro kabyakeire bibili Yesu aruga Sikari agya Galilaya.

⁴⁴ Wenene akakyegambira okwo omurangi atagira kitinwa mu nsiye.

⁴⁵ Kityo aija Galilaya, Abanyagalilaya bamunyegeza, nobona bakaba baboine ebyo yabaire akozire Yerusalemu aha kiro kikuru, bakashangwa baliho.

⁴⁶ Kandi agaruka Kana omuli Galilaya, mbali yabaire ahinduliire amaizi ekaba divai. Aho omuli Galilaya bhakaba halimu omukuru omoi aina omutabani ali murwaire.

⁴⁷ Kayahuliire okwo Yesu yarugire Buyahudi akaija Galilaya, agenda amutagiliza kugenda akamukiliza omwana, enshonga hakaba ali kubi agafa.

⁴⁸ Yesu amugambira ati, “K'oraba otaboine bubonero na bitangazo timulikwija kwesiga.”

⁴⁹ Omukuru amugambira ati, “Waitu basinge baije omwana atakafire.”

⁵⁰ Yesu amugambira ati, “Iroko, omwana wawe narora.” Omushaija aikiliza ekigambo ekyo Yesu yamugambira, akwata omuhanda agenda.

⁵¹ Kayabaire nasongoka atanganwa abairube, bamugambira okwo omwanawe alikurora.

⁵² Ababaza esaa eyo yabandizaho kutururamu. Bamugambira bati, “Nyeigoro omu saa mushanju nirwo omushwago gumurugireho.”

⁵³ Ishemuntu amanya okwo niyo saa eyo Yesu amugambiliireho ati, “Omwana wawe narora;” ayesiga hamoi n'ekaye yona.

⁵⁴ Eki kikaba kili kitangazo kya kabili ekyo Yesu yakoleire Galilaya arugire Buyahudi.