Yohana 3 - Ebibulia 2001

Yesu na Nikodemo

¹ Hakaba haliho Omufarisayo eibaralye Nikodemo, ali mutwazi omu Bayahudi.

² Omushaija ogu aija ahali Yesu omw'itumbi amugambira ati, “Rabi, nitukumanya okwo oli mwegesa ayarugire ahali Ruhanga. Nitumanyira aha kubona okwo taliho muntu yakukora bitangazoki nk'ebyolikukora, shana Ruhanga abe amwemiremu.”

³ Yesu amuhorora ati, “Nkugambire amazima, omuntu k'atazairwe bundi buhya taina kubona bukama bwa Ruhanga.”

⁴ Nikodemo amubaza ati, “Omuntu ayagurusire yakuzarwa atai bundi buhya? Agaruke omuli nyina azarwe elya kabili?”

⁵ Yesu amuhorora ati, “Nkugambire amazima, omuntu k'atazairwe mu maizi na mu Mwoyo tiyakutaha mu bukama bwa Ruhanga.

⁶ Ekyakazarwa omubili kiba mubili, n'ekyakazarwa Mwoyo guba Mwoyo.

⁷ Otatangara kubona ninkugambira okwo olikuragirwa kuzarwa bundi buhya.

⁸ Omuyaga kagwihya gugya mbali gwayenda, mara ohulira akahiliro kagwo. Kyonkai mbali gulikuruga na mbali gulikugya tohamanya. N'omuntu azairwe Mwoyo nikwo ali atyo.”

⁹ Nikodemo amubaza ati, “Eki kyakuba kitai?”

¹⁰ Yesu amushubamu ati, “Iwe omuli Isiraeli oba mwegesa, kyashuba kyakulema kukishobokerwa?

¹¹ Nkugambire amazima, ebyo tulikugamba nitubimanya, n'ebyo tuboine nitubijulira; kyonkai ebyo tulikubagambira timulikubikiliza.

¹² Kandabagambira eby'omu nsi mutabikiliize isi kandabagambira eby'omw'iguru murabiikiliza mutai?

¹³ Taliho aragiire mw'iguru, shana Omwana w'Omuntu ayarugireyo.

¹⁴ Okwo Musa yahanikire enjoka omw'irungu nikwo Omwana w'Omuntu alikuragirwa atyo kuhanikwa,

¹⁵ wena alikamwesiga aije abone oburora obutahwaho.

¹⁶ “Ruhanga akagonza ensi muno yagoba n'aha kuhayo Omwanawe omumoi, wena alimwikiliza talifa, nawe abone oburora obutahwaho.

¹⁷ Ruhanga akatuma Omwanawe omu nsi kugirokora, tikugiramura.

¹⁸ Amwikiliza taramurwa, kandi atamwikiliza ogwo yaramwirwe, aha rw'okuba taikiliza Mwana omumoi wa Ruhanga.

¹⁹ Eiramu niligenda liti: Omushana gukaija omu nsi, abantu bagonza omwilima kushaaga omushana gwonene, enshonga ebikorwa byabo bikaba bili bibi.

²⁰ Manyasi buli muntu akora kubi anoba omushana, mara taija aha mushana ebikorwabye bitaija bikazoka.

²¹ Ayakora eky'amazima aija aha mushana, kishobore kumanyika okwo ebigirobye bilikuruga ahali Ruhanga.”

Yesu na Yohana

²² Ebyo kabyahoire, Yesu n'abegesibwabe bagya Buyahudi; aikarayo nabo abatiza.

²³ Na Yohana hakaba nabatiliza Enoni bwatana Salimu, aha rw'enshonga kulinya bhakaba haliyo amaizi gangi. Abantu baija babatizibwa.

²⁴ Nomanya omu bir'ebyo Yohana hakaba atakafungirwe.

²⁵ Aho agya aimukwa empaka omu begesibwa ba Yohana n'Omuyahudi omoi, bahakanira okunaba.

²⁶ Bagoba Yohana bamugambira bati, “Rabi, owo mubaire muli hamoi buseli bwa Yorudani, ow'obare nojulira ali aha nabatiza, mara abantu bona nibagya ahali wenene.”

²⁷ Yohana abahorora ati, “Taliho muntu n'omoi ayakubona kintu kyona kyona atakihairwe kuruga mw'iguru.

²⁸ Inywe nywenene nimunjulira okwo nagambire okwo ntali Kirisito, shana nkatumwa kumwebembera.

²⁹ Omuntu aina omugore bamweta kishwera. Munywanyi wa kishwera k'ayemelera akamuhulira, ak'ahulira n'eirakalye ayeshanda muno. Aha rw'ekyo ebyera byange ebi byagobelera.

³⁰ Wenene aragiirwe kukura, inye ndagiirwe kutoha.”

Ayarugire omw'iguru

³¹ Ayarugire omw'iguru nashaga bona. Omuntu ow'omu nsi aba w'ensi, mara afumora eby'ensi; ayarugire omw'iguru nashaga bona.

³² Mujulizi w'ebyo yahuliire n'ebyo yaboine, kyonkai eby'alikugamba taliho alikubikiliza.

³³ Alikwikiliza eby'alikugamba, omu kwikiliza okwo naba nahamisa okwo Ruhanga aba w'amazima.

³⁴ Kuba owo Ruhanga atumire nagamba ebigambo bya Ruhanga, aha rw'enshonga Ruhanga k'alikumuha Mwoyo amumuha wena.

³⁵ Ish'emuntu agonza Omwanawe, mara byona abimutaire omu bushoborabwe.

³⁶ Aikiliza Mwana agira oburora obutalihwaho. Atahulira Mwana talibona burora, shana ekiliho Ruhanga aliikara amubonabonyize.