Yohana 21 - Ebibulia 2001

Yesu nahabukira abegesibwa mushanju

¹ Ahanyuma Yesu ashuba abonekera abegesibwa aha Nyanja ya Tiberia; hakababonekera ati:

² Simoni Petero, Tomasi owo bayetaaga Omurongo, Natanaeli ow'ekigo kya Kana eya Galilaya, batabani ba Zebedayo, n'abegesibwa abandi babili bakaba bali hamoi.

³ Simoni Petero abagambira okwo wenene alikugya kujuba. Bamugambira okwo nabo baragenda nawe. Baturuka basabara omu bwato, kyonkai omw'itumbi elyo tibakwete nfuru n'emoi.

⁴ Kabwakeire abegesibwa babona Yesu ayemeleire aha mwaro, kyonkai tibamumanyire.

⁵ Yesu ababaza ati, “Baana bange, mwinaiho enfuru?” Bamuhorora bati, “Chei.”

⁶ Abagambira ati, “Munage eishambo mukono ogwa bulyo gw'obwato, muragira ezo mwakwasayo.”

⁷ Omwegesibwa olinya owo Yesu yagonzaga agambira Petero ati, “Ni Mukama!” Simoni Petero kayahuliire okwo ali Mukama, ajwara emyendoye kuba hakaba ali bushai aha rw'okujuba, ayetuura omu nyanja.

⁸ Kyonkai abegesibwa abandi basabara omu bwato nibasika eishambo, likaba lijwire enfuru, kandi bakaba batali harai na mwaro. Bakaba bali nke'mita 100 kwema aha mwaro gwonene.

⁹ Orwo bagobire aha mwaro babonaho omuliro gw'amakara guliho enfuru, aha rubaju haliho omukate.

¹⁰ Yesu abagambira kuletaho enfuru ezo baruga kujuba.

¹¹ Simoni Petero agaruka omu bwato, asika eishambo alileta aha mwaro, lijwire enfuru; zikaba zili 153. N'orwo zabaire zili zingi zityo, eishambo tilyagutukire.

¹² Yesu abeta kulya akakulya ka bwankya. Taliho mwegesibwa yamalize kumubaza ali ohai. Bakamanya okwo ali Mukama.

¹³ Yesu aija, akwata omukate agubaha, n'enfuru kwakwo.

¹⁴ Ogu gukaba guli murundi gwa kashatu Yesu kubonekera abegesibwa yamazire kuhimbuka omu bafu.

Yesu na Petero

¹⁵ Kabamazire kulya aka bwankya, Yesu abaza Simoni Petero ati, “Simoni eya Yohana, nongonza kushaaga okwo aba balikungonza?” Simoni Petero amuhorora ati, “Inya Rugaba, nomanya okwo ndikukugonza.” Yesu amugambira ati, “Liisa obwana bwange bw'entaama.”

¹⁶ Amubaza elya kabili ati, “Simoni eya Yohana, nongonza?” Simoni Petero amuhorora ati, “Waitu inya, Mukama; nomanya okwo nkugonza.” Yesu amugambira ati, “Oramanya entaama zange.”

¹⁷ Amubaza omurundi gwa kashatu ati, “Simoni eya Yohana, nongonza?” Petero ashasha aha mwoyo kubona namubaza elya kashatu nka namugonza. Amugambira ati, “Mukama, nomanya buli kantu; nomanya okwo nkugonza.” Yesu amugambira ati, “Liisa entaama zange.

¹⁸ Nkugambire amazima, orwo wabaire oli muto wayekomaga omukandara ogya mbali olikwenda. Kyonkai orwo olimara kugurusha, olitega emikono, omuntu ondijo abe n'iwe akukoma omukandara akakutwara mbali otalikwenda kugya.”

¹⁹ (Akagamba atyo kumwoleka ni rufuki orwo alifa kubonesa Ruhanga ekitinwa). Ahanyuma amugambira ati, “Mpondera.”

Yesu n'omwegesibwa ondijo

²⁰ Petero ahinduka abona omwegesibwa ondijo owo Yesu yagonzaga abahondeire, n'iwe yabaire abyamire Yesu omu kifuba nibaraagira akamubaza ati, “Mukama, waitu n'ohai alikwija kukubanja?”

²¹ Petero kayamuboine agambira Yesu ati, “Mukama, waitu kandi ogu?”

²² Yesu agambira Petero ati, “Isi kandaba n'inyenda k'aikaraho atafire kuhika orwo ndija, iwe nofaki? Ompondere!”

²³ Ekigambo ekyo kikagoba abegesibwa okwo omwegesibwa ogu atalifa. Kyonkai okwo atalifa ekyo Yesu tiyakigambire, akagamba kushai ati, “Isi kandaba n'inyenda k'aikaraho atafire kuhika orwo ndija, iwe nofaki?”

²⁴ Ogu n'iwe mwegesibwa omujulizi w'ebigambo ebyo, mara n'iwe abihandikire; kandi nitumanya okwo obujulizibwe buli bw'amazima.

Enzindo

²⁵ Mbwenu aliho n'ebindi bingi ebyo Yesu yakozire. Kabyakuhandikirwe byona nindenga ensi tiyakushoboire kubona bubiiko bwa bitabo ebyakuhandikirwe.