Yohana 20 - Ebibulia 2001

Enyanga eli bushai

¹ Aha kiro kya mbere ky'eilimansi, omu bwankya karai, Maria Magadalena aija aha nyanga kakyali kailima, abona okwo eibare liihirwe aha nyanga.

² Kityo airuka agya agobera Simoni Petero n'omwegesibwa ondijo owo Yesu yagonzaga, abagambira ati, “Baihya Omukama omu nyanga, kandi titulikumanya mbali bamuteka.”

³ Nikwo Petero kuturuka n'omwegesibwa ogwo, bakakwata omuhanda bagire aha nyanga.

⁴ Bombili bairuka, kyonkai omwegesibwa ondijo asiga Petero agoba mbere aha nyanga.

⁵ Ainama alinguliza omu nyanga, abonamu emyendo ya kitaani okwo eyazire, kyonkai tiyatahiremu.

⁶ Aho Simoni Petero aija amuhondeire, ataaha omu nyanga, abona okwo emyendo ya kitaani eyazire,

⁷ n'omutanda ogwo babaire bamutaire aha mutwe gutarabirane na myendo ndijo, guzingire guli ahagwo gwonkai.

⁸ Nikwo omwegesibwa ondijo ayagobire mbere aha nyanga nawe kutahamu, akabona akaikiliza.

⁹ Nobona bakaba batakamanyire bihandiko, okwo Yesu ali w'okuhimbuka omu bafu.

¹⁰ Abegesibwa bashuba omuka.

Yesu nahabukira Maria Magadalena

¹¹ Kyonkai Maria Magadalena yaikara ayemeleire aha nyanga nalira. Kayabaire nalira ainama kulinguliza omu nyanga.

¹² Abona abamalaika babili bajwete ebilikwera bashuntamire mbali omubili gwa Yesu gwabaire gubyamire, omoi ali aha mutwe, owa kabili ali aha maguru.

¹³ Bamubaza bati, “Iwe mukazi nolizibwaki?” Abahorora ati, “Enshonga batwara Mukama wange, kandi tindikumanya mbali bamuteka.”

¹⁴ Kayabaire akyali omu kugamba atyo, ahinduka omu rubaju abona Yesu ayemeleire, kyonkai tiyamanyire okwo ali Yesu.

¹⁵ Yesu amubaza ati, “Iwe mukazi nolizibwaki? Nohiiga ohai?” Magadalena akaba amwesire mukozi w'endimiro egyo, amugambira ati, “Waitu, k'oraba n'iwe wamutwara, ongambire mbali wamuteka ngye mwihyeyo.”

¹⁶ Yesu amweta ati, “Maria!” Maria ahinduka amugambira omu Ruheburania ati, “Raboni” (nikwo kugamba Mwegesa).

¹⁷ Yesu amugambira ati, “Otankwataho, aha rw'okuba tinkagiire wa Tata. Kyonkai ogende ahali barumuna bange obagambire okwo nagya owa Tata mara Isheinywe, Ruhanga wange mara Ruhanga wanyu.”

¹⁸ Maria Magadalena agenda agambira abegesibwa ati, “Nabona Omukama;” abagambira n'ebyo yamuragira.

Yesu nahabukira abegesibwa

¹⁹ Ekiro kya mbere ekyo ky'eilimansi bwaigoro, mbali abegesibwa babaire bali enyigi zikingire aha rw'okutina Abayahudi, Yesu aija abemelera omugati, abagambira ati, “Mugire emilembe.”

²⁰ Kayamazire kugamba atyo aboleka ebiganjabye n'orubaju. Aho abegesibwa orwo baboine Omukama bashemelerwa.

²¹ Yesu ashuba abagambira ati, “Mugire emilembe. Okwo Tata yantumire, nanye nikwo ndikubatuma.”

²² Kayabaire yagambire atyo abaikiza orwoya, abagambira ati, “Mutore Mwoyo Mutakatifu!”

²³ Abo muligarulira amafu, bagarulirwe. Abo mulyanga kugarulira amafu, bataligarulirwa.

Yesu na Tomasi

²⁴ Aho Tomasi, omoi omu 12 (owo bayetaga Murongo), hakaba atainabo orwo Yesu yaizire.

²⁵ Kityo abegesibwa abandi bamugambira okwo babona Omukama. Kyonkai wenene abagambira ati, “Kantaboine nkoju za mishumali omu biganja bya Yesu, nkatekamu n'orukumu omu nkoju ezo z'emishumali, nkatahya n'omukono omu rubajurwe, tinyikilize.”

²⁶ Ebiro munaana bikeire, abegesibwabe bashuba bashangwa bali omu nju, na Tomasi abalimu, kyonkai enyigi zibambire, Yesu aija abemelera omugati, abagambira ati, “Mugire emilembe.”

²⁷ Agambira Tomasi ati, “Teka orukumu rwawe omu, leba n'ebiganja byange. Leta n'omukono onkore omu rubaju; olekere obutaikiliza, oikilize.”

²⁸ Tomasi amuhorora ati, “Mukama wange, Ruhanga wange!”

²⁹ Yesu amubaza ati, “Waikiliza orwo wambona? Baina omugisha abaikiliza bataboine.”

Omugendelero gw'ekitabo eki

³⁰ Yesu akakora ebitangazo ebindi bingi omu maisho g'abegesibwa, ebitahandikirwe mu kitabo eki.

³¹ Kyonkai ebi byahandikwa kamwikiliza okwo Yesu aba Kirisito omwana wa Ruhanga, mushube mumwesige mubone oburora.