Yohana 2 - Ebibulia 2001

Obugenyi bw'obushwere omuli Kana

¹ Aha kiro kya kashatu, omuli Kana eya Galilaya, bhakaba halimu obugenyi bw'obushwere; na nyina Yesu hakaba aliho.

² Yesu n'abegesibwabe nabo bakaba baraliziibwe aha bugenyi obwo.

³ Edivai egya ehwa, nyina Yesu amugambira ati, “Tibaina divai.”

⁴ Yesu amubaza ati, “Mawe, nonyenzaki? Esaa yange tekagobire.”

⁵ Nyinai Yesu agambira abairu ati, “Eky'arabagambira kyona kyona mukikore.”

⁶ Hakaba haliho emuga mukaaga z'amabare, z'emichonchozo y'Abayahudi ey'okunaba, buli emoi netahwamu elita nka 10 anga 150.

⁷ Yesu abagambira ati, “Mwijuze emuga ezi amaizi.” Baziijuza kugoba aha migoma.

⁸ Abagambira ati, “Mbwenu mutaheho mutwalire omugelezi w'obugenyi.” Batahaho.

⁹ Omugeleezi w'obugenyi kayagiire kuroza edivai, agaba gali maizi, atamanyire mbali divai yaruga (n'orwo abairu ababaire batahire amaizi babaire nibamanya), ayeta kishwera

¹⁰ amugambira ati, “Buli muntu abanza ayebembezayo edivai enungi. K'abantu baba batamiire bayanjagiire, aba nirwo ahondezaho edivai eya kaizi. Kyonkai iwe wabiika edivai enungi wagigobya mwaha!”

¹¹ Omu bubonero obwo Yesu yakozire, aka mbere aka akakakolera Kana eya Galilaya, yaba nikwo ayolekya atyo ekitinwakye; n'abegesibwabe bamwesiga.

¹² Ebyo kabyahoire yasongoka Kaperinaumu, hamoi na nyina n'abarumuna n'abegesibwabe, bamarayo ebiro bike.

Yesu nagya Rwensinga

¹³ Pasika y'Abayahudi ekaba eraliire kugoba, Yesu agya Yerusalemu.

¹⁴ Omuli Rwensinga ashangamu abalikugulizamu ente n'entaama n'ebiiba, n'abahingi b'empiha bali aha ikora lyabo.

¹⁵ Asibinkijanyia orushanju rw'enkoba ababinga bona omuli Rwensinga n'ente zabo n'entaama. Esarafu z'abahingi b'empiha azishesha, n'emeza zabo azikunengura.

¹⁶ Agambira n'ababaire nibaguza ebiiba ati, “Ihya ebiiba hanu aha; omwa Tata mutahahindura itundiro.”

¹⁷ Abegesibwa baijuka okwo kyahandikirwe kiti, “Ekihika ky'okurabira enju yawe kilimmara omwoyo.”

¹⁸ Aho Abayahudi bamubaza bati, “Wakukora kitangazoki kutwoleka okwo oinai obushobora bw'okukora ebintu nk'ebi?”

¹⁹ Yesu abahorora ati, “Mukambure Rwensinga egi, nyije ngyombekere ebiro bishatu.”

²⁰ Abayahudi bamushubamu bati, “Rwensinga egi ekombekerwa emyaka 40, iwe obe n'iwe ogyombekera ebiro bishatu?”

²¹ Kyonkai Rwensinga eyo Yesu yabaire nagamba, hakaba nagamba omubiligwe.

²² Kayabaire yahimbukire omu bafu, abegesibwabe bagamba okwo yabaire akigambire; aho baikiliza ebihandiko hamoi n'ebyo Yesu yagambire.

Yesu namanya emitima y'abantu

²³ Yesu kayabaire ali Yerusalemu aha kiro kikuru kya Pasika, abantu bangi bamwesiga orwo baboine ebitangazo ebyo yakora.

²⁴ Kyonkai wenene tiyabesigire,

²⁵ aha rw'enshonga yamanyaga abantu bona, tiyayetagaga muntu kumumanyisa okwo abantu abandi bali. Yesu wenene yamanyaga ebitekelezo by'omuntu.