Yohana 19 - Ebibulia 2001

¹ Aho Pilato atwara Yesu amutera.

² Abaisherukare basibinkijanyia orukinga rw'amahwa barumuteka aha mutwe, bamujweka n'ekanzu ya zambarau.

³ Bamugoba bamugambira bati, “Kamelere Mukama w'Abayahudi!” Bashuba bamutera empi.

⁴ Pilato ashuba ashohora abagambira ati, “Mulebe namuturukya kumubaletera, mumanye okwo ntamubonamu kabi.”

⁵ Aho Yesu aturuka ajwete orukinga rw'amahwa n'ekanzu ya zambarau. Pilato agambira Abayahudi ati, “Leba omuntu niw'ogu!”

⁶ Orwo abakuhani bakuru n'abaofisa bamuboine, bakunga bati, “Omubambe, omubambe!” Pilato abagambira ati, “Mumwetwalire inywe mumubambe, enshonga tinamubonamu kabi.”

⁷ Abayahudi bamuhorora bati, “Ichwe tugira eiteka, okwo eiteka elyo lili aragiirwe kufa, orwo ayeyesire Mwana wa Ruhanga.”

⁸ Pilato kayahuliire atyo atina okushagaho.

⁹ Agaruka omu kikaarekye abaza Yesu ati, “Oli wa nkahai?” Nawe Yesu tiyahoroire.

¹⁰ Aha rw'ekyo Pilato amubaza ati, “Tolikwenda kugamba nanye? Tolikumanya okwo nyina obushobora bw'okukutaishura anga kukubamba?”

¹¹ Yesu amuhorora ati, “Wakubaire otaina bushobora ahali inye k'otakubuhairwe kuruga mw'iguru. Aha rw'ekyo ayakundetera n'iwe aina obufu obuhango kushaaga.”

¹² Pilato kayahuliire atyo ahiiga kumutaishura, kyonkai Abayahudi baashana bati, “K'olikutaishura omuntu ogu mpaho toli munywanyi wa Kaisari. Buli omoi ayekora mukama aba ashengire Kaisari.”

¹³ Orwo Pilato yahuliire ebigambo ebyo ashohoza Yesu, ashuntama aha kituuti ky'amabare, omu Ruyahudi nibakyeta Gabata.

¹⁴ Kir'ekyo kishangwa kili kiro ky'okweteekateekera Pasika; zikaba zili nk'esaa mukaaga omw'ihangwe. Agambira Abayahudi ati, “Leba Omukama wanyu!”

¹⁵ Bakunga bati, “Ihamu, ihamu, omubambe!” Pilato ababaza ati, “Kandi mbambe Omukama wanyu?” Abakuhani bakuru bahorora bati, “Titugira mukama shana Kaisari.”

¹⁶ Aho amubaha kumubamba.

Yesu nabambwa

¹⁷ Batwara Yesu, ashohora agiire mbali halikwetwa “Akahanga k'ekitwe,” ashutwire omusaraba. Omwanya ogwo omu Ruyahudi nigwetwa Goligota.

¹⁸ Baba niho bamubambira, hamoi n'abandi babili, ogu rubaju oru, n'ondijo rubaju oru, Yesu abagya omugati.

¹⁹ Pilato ahandika ekihandiko akiteka aha musaraba; kikaba kihandikire kiti, “Yesu owa Nazareti Omukama w'Abayahudi.”

²⁰ Abayahudi bangi bashoma ekihandiko ekyo, aha rw'okuba mbali Yesu yabambiirwe bhakaba hataine ekigo; kikaba kihandikire omu Ruyahudi, omu Rulatini n'omu Rugiriki.

²¹ Aho Abakuhani bakuru b'Abayahudi bagambira Pilato bati, “Otahandika oti, ‘Mukama w'Abayahudi,’ ohandike oti, ‘Omuntu ogu akagamba ati: Ndi Mukama w'Abayahudi.’ ”

²² Pilato ahorora ati, “Ekyo nahandika nikyo!”

²³ Abaisherukare kabamazire kubamba Yesu, bakwata ebijwarobye babibeganamu kanai; buli mwisherukale yatwara ekichweka ekye, n'ekanzuye kutyo. Kyonkai ekanzu egyo ekaba etabaliliire. Ekaba eshukirwe kushai kuruga omu bikya kuturuka aha maguru.

²⁴ Nikwo kugambirangana bati, “Tutagitagura, tugitekere enshoga kushai tubone eraba y'ohai.” Eki kikabaho kugobesheleza Ebihandiko Bitakatifu, biti, “Bakabegana ebijwaro byange, ekanzu yange bagitekera enshoga.” Oku nikwo abaisherukare bagizire.

Yesu nasigira Yohana nyina

²⁵ Aha musaraba gwa Yesu hakaba ayemeleirweho nyina, na nyin'ento, n'iwe Maria muka Keleopa, na Maria Magadalena.

²⁶ Yesu kayaboine nyina n'omwegesibwa owo yagonzaga ayemeleire haihi, agambira nyina ati, “Mawe, leba mutabani wawe niw'ogwo!”

²⁷ Ashuba agambira omwegesibwa ati, “Leba nyoko niw'ogwo!” Kwema saa egyo omwegesibwa atwara nyina Yesu omwe.

Okufa kwa Yesu

²⁸ Ahanyuma Yesu kayamanyire okwo mbwenu aha byona byahwa, agamba (kugobesheleza Ebihandiko Bitakatifu) ati, “Nyina eiliho.”

²⁹ Honene aho hakaba haliho epakuli eijwire edivai y'enshalizi; aho bakwata ekikunjuzo kiijwire edivai y'enshalizi, bakiteka aha ruti rwa hisopo, bakimulenga aha munwa.

³⁰ Orwo Yesu yamazire kunywa edivai egyo, agamba ati, “Byahwa.” Nikwo kwinika omutwe, omwoyo gukahwamu.

Yesu nibamuchumita omuganya

³¹ Aha rw'enshonga kikaba kili kiro ky'okwetekatekera Pasika, kwanga emibili etaikara aha misaraba ahali Sabato (kuba Sabato kikaba kili kiro ky'amani), Abayahudi bashaba Pilato kuhenda amaguru g'ababambirwe hamoi na Yesu babone kuruga aha misaraba.

³² Kityo abaisherukare bahenda omushuga wa mbere amaguru, n'owa kabili kutyo ayabaire abambirwe nawe.

³³ Kyonkai kabaagobire Yesu bakabona okwo yafire, tibamuhenzire maguru.

³⁴ Nawe omwisherukare omoi akwata eichumu amuchumita orubaju rurugwamu obwamba n'amaizi.

³⁵ Ayaboine ekyo n'iwe yakigambire, n'obujulizibwe bw'amazima, mara namanya okwo alikugamba amazima, nainywe mushobore kwikiliza.

³⁶ Ebigambo ebi bikabaho k'Ebihandiko Bitakatifu bigobelera ebyagambaga biti, “Talihendekwamu igufa na limoi.”

³⁷ Ahandi Ebihandiko Bitakatifu byonene biti, “Balimuleba ogwo owo bachumisire.”

Okuziikwa kwa Yesu

³⁸ Ahanyuma Yozefu owa Arimatea, ayabaire ali mwegesibwa wa Yesu kyonkai nayesheleka aha rw'okutina Abayahudi, ashaba Pilato kutwara omubili gwa Yesu.

³⁹ Nikodemo kwakwo ayabaire yaizire ahali Yesu omu kiro, aija n'ekilo 30 z'omujwanga gwa mira n'eudi.

⁴⁰ Baihya omubili gwa Yesu aha musaraba, baguzinga omu myendo ya kitaani, batamu n'emibazi elikunukage, nigwo gwabaire guli mugenzo gw'Abayahudi gw'okuziika.

⁴¹ Mbali bamubambire hakaba haliho endimiro, kandi omu ndimiro omwo alimu enyanga empya etakaziikwagamu muntu.

⁴² Ahakuba kikaba kili kiro ky'Abayahudi ky'Okwetekatekera Sabato, n'enyanga yashangwa eli hagufi, omu nyanga egyo baba nimwo baziika Yesu.