Yohana 18 - Ebibulia 2001

Yesu nakwatwa

¹ Yesu kayamazire kugamba ebigambo ebyo, yashohora n'abegesibwabe, yashabuka Oruhanga rwa Kidironi mbali habaire hali endimiro, omu ndimiro omwo atahamu n'abegesibwabe.

² Kandi Yuda ayamubanzire nawe hakaba namanya omwanya ogwo, aha rw'enshonga Yesu yagyagayo n'abegesibwabe.

³ Aho Yuda kayamazire kukwasa abaisherukare n'abakuru abandi abarugire omu bakuhani bakuru n'Abafarisayo, bagyayo baina etara n'emuli n'ebiiso.

⁴ Yesu ashangwa namanya agalikwija kumugwaho, arugayo ababaza ati, “Nimuhiiga ohai?”

⁵ Bamuhorora bati, “Yesu owa Nazareti.” Abagambira ati, “N'inye.” Yuda ayamubanzire hakaba ayemeleire nabo.

⁶ Orwo Yesu yabagambiire ati, “N'inye,” bashuba enyuma bagwa ahansi.

⁷ Yesu ashuba ababaza ati, “Nimuhiiga ohai?” Bahorora bati, “Yesu owa Nazareti.”

⁸ Abagambira ati, “Nabagambira okwo n'inye, aba mubaleke bagende.”

⁹ Eki kikabaho kugobesheleza ekyo yabaire agambire ati, “Abo wantungire timbulizeho n'omoi.”

¹⁰ Aho Simoni Petero ashangwa aina embanda, agihya omu kiraro agiteza omwiru w'Omukuhani Nyamukuru amusharaho okutwi kwa bulyo. Omwiru ogwo eibaralye hakaba nayetwa Malikusi.

¹¹ Yesu agambira Petero ati, “Garura embanda omu kiraro kyayo, ekikompe ky'obushasi ekyo Tata yampa ntakinywa?”

Yesu omu maisho ga Anasi

¹² Kityo abaisherukare hamoi na mukuru wabo n'abaofisa b'Abayahudi bakwata Yesu bamuboha.

¹³ Babanza bamutwalira Anasi, ishezara Kayafa ayabaire ali Mukuhani Nyamukuru mwaka ogwo.

¹⁴ Kayafa n'iwe yabaire ategekeire Abayahudi okwo kili kirungi kufa omuntu omoi akatulilira abantu bona.

Petero nayetonga Yesu

¹⁵ Simoni Petero ahondera Yesu, n'omwegesibwa ondijo kutyo. Orwo omwegesibwa ogwo kushangwa namanyika aha Mukuhani Nyamukuru, ataaha nyakabuga y'Omukuhani Nyakumuru, atahiramu kimoi na Yesu.

¹⁶ Kyonkai Petero ayemeelera aheru aha mulyango. Omwegesibwa ondijo ayabaire namanyika aha Mukuhani Nyamukuru, aturuka agambira omuzana ayabaire ali mukumilizi, atahya Petero omunda.

¹⁷ Omuzana ayabaire ali mukumilizi agambira Petero ati, “Naiwe toli mwegesibwa w'omuntu ogu?” Petero ati, “Inye tindi mwegesibwawe.”

¹⁸ Aho abairu n'abaofisa bakaba bahembire omuliro, beemeleire nibota. Petero nawe hakaba abalimu, ayemeleire nawe nayota.

Omukuhani Nyamukuru nabaza Yesu

¹⁹ Omukuhani Nyamukuru abaza Yesu aha begesibwabe n'emyegeshezeye.

²⁰ Yesu amuhorora ati, “Ntuura ningambira ensi orwatu; buli kaanya nyegesa omu sinagogi n'omuli Rwensinga mbali Abayahudi bona bateranira; tinkagambaga kantu aheheleire.

²¹ Nombalizaki? Obaze abampuliire ebyo nabagambiire; ebyo nagambire nibabimanya.”

²² Kayamazire kugamba atyo, aho ofisa omoi omu babaire bemeleire aho atera Yesu oruhi nagamba ati, “Oku nikwo olikuhorora Omukuhani Nyamukuru?”

²³ Yesu amushubamu ati, “Kandaba nashobya omu migambire, ogambe ekyo nashobya; kyonkai kandaba nagambage nonteleraki?”

²⁴ Anasi amutwekera Kayafa Omukuhani Nyamukuru abohirwe.

Petero nashuba nayetonga Yesu

²⁵ Aho Simoni Petero hakaba ayemeleire nayota omuliro. Bamubaza bati, “Iwe naiwe toli mwegesibwawe?” Petero ayetonga okwo ali mwegesibwawe, agamba ati, “Tindi mwegesibwawe.”

²⁶ Omwiru omoi w'Omukuhani Nyamukuru, omunyaruganda w'omushaija owo Petero yabaire atemireho okutwi, amubaza ati, “Iwe tinaikubona oinawe omu ndimiro?”

²⁷ Petero ashuba ayetonga; niho honkai enkoko ekookoroma.

Yesu omu maisho ga Pilato

²⁸ Baihya Yesu omwa Kayafa bamutwara omu kikaare kya gavana. Likaba lili bwankya karai. Bonene omu kikaare kya gavana tibatahiremu, bataija bakahagara, nirwo baralya Pasika.

²⁹ Kityo Pilato aturuka abagoba, ababaza ati, “Omuntu ogu nimumutoijeraki?”

³⁰ Bamuhorora bati, “Kuba omuntu ogu atali mufakare titwakumukuleteire.”

³¹ Pilato abagambira ati, “Mumutware inywe nywenene mumuramulire aha Mateka ganyu.” Abayahudi bamugambira bati, “Ahali ichwe nikitangwa kwita omuntu wena wena.”

³² Eki kikabaho kugobesheleza ekigambo ekyo Yesu yabaire agambire kwoleka ni mifereki eyo arafa.

³³ Pilato agaruka omu kikaarekye, ayeta Yesu amubaza ati, “N'iwe Mukama w'Abayahudi?”

³⁴ Yesu amugarukamu ati, “Ekigambo ekyo wakigamba aha bwawe angasi abandi barakikugambiireho?”

³⁵ Pilato ahorora ati, “Inye ndi Muyahudi? Eihanga lyawe n'abakuhani bakuru bakundetera; wakoraki?”

³⁶ Yesu ahorora ati, “Obukama bwange ti bwa nsi egi. Kuba obukama bwange buli bw'ensi egi, abairu bange bakurashaine ntaija nkanagwa omu mikono y'Abayahudi. Obukama bwange ti bwa nsi egi.”

³⁷ Pilato amugambira ati, “Kityo oli mukama?” Yesu ahorora ati, “Wakigamba okwo ndi mukama. Nkazarwa kuba mukama, mara obukama nibwo bwandesire omu nsi, kugamba amazima. Buli muntu ow'amazima ahulira eiraka lyange.”

³⁸ Pilato amubaza ati, “Amazima kiki?” Pilato kayamazire kugamba atyo, ashuba aturuka agoba Abayahudi, abagambira ati, “Tindikumubonamu ntambara.

Yesu naramurwa kufa

³⁹ Kyonkai mumanyiire kuta nimbataishulira omuntu omoi ahali Pasika. Mwakugondize mbataishulire Omukama w'Abayahudi?”

⁴⁰ Abayahudi bashuba bakunga bati, “Otatutaishulira muntu ogwo, otutaishulire Baraba.” Kandi okwo Baraba yabaga mushuga.