Yohana 17 - Ebibulia 2001

Yesu nashabira abegesibwabe

¹ Orwo Yesu yamazire kugamba ebigambo ebyo, yainunura amaisho yaleba omw'iguru, yagamba ati, “Tata, esaa yagoba. Singa okuze Omwana wawe, n'Omwana wawe ogwo akuhe ekitinwa,

² Aha rw'okuba omutungire obushobora aha bantu bona, abo wamutungire bona abahe oburora obutalihwaho.

³ Mara oburora obutalihwaho nibw'obu: Bakumanye iwe Ruhanga omumoi ow'amazima, bamanye na Yesu Kirisito owo watumire.

⁴ Omu nsi nkuhaire ekitinwa, orwo ngobesheleize omulimo ogwo wampaire kukora.

⁵ Mbwenu Tata singa onkuze omu businge bwawe, ontunge ekitinwa ekyo nanye naiwe twabaire twinakyo ensi etakatonzirwe.

⁶ “Abantu abo waronkire omu nsi okabantunga, mbakumanyisize. Bakaba baawe, iwe wabantunga, mara n'ekigambo kyawe bakyekomize.

⁷ Mbwenu bamanyiire okwo buli kantu ako wantungire nikaruga ahali iwe;

⁸ enshonga mbagambire ebigambo ebyo iwe wangambire, mara babitoire, bamanya n'okwo gali mazima okwo narugire ahali iwe, baikiliize okwo wantumire.

⁹ Ninshabira bonene; tindikushabira nsi, shana abo wantungire, enshonga bawe.

¹⁰ Abange bona bawe, n'abawe bange, mara ekitinwa kyange nikimanyikira omuli bonene.

¹¹ Mbwenu inye tinkili mu nsi, kyonkai bonene bali omu nsi, kandi inye ninyija ahali iwe. Tata Omutakatifu, singa obagumise omw'ibara lyawe elyo wantungire babone kuba bamoi okwo inye na iwe tuli bamoi.

¹² Orwo mbaire nkyainabo mbagumisize omw'ibara lyawe. Mbalinzire, taliho alikuburaho n'omoi shana omuraamwa wenkai, kugobesheleza Ebihandiko Bitakatifu.

¹³ Kyonkai mbwenu ninyija ahali iwe. Kandi ebigambo ebi nimbigambira omu nsi, ebyera byange bishobore kubaijura.

¹⁴ Ekigambo kyawe nkibahaire, kandi ensi nebanoba aha rw'okuba bonene tibayo, okwo nangu nanye ntali wayo.

¹⁵ Tindikubashabira k'obaihya mu nsi. Nimbashabira k'obahungya aha Mubisha.

¹⁶ Bonene ti ba nsi, okwo nanye ntali wayo.

¹⁷ Singa obahindure batakatifu nibajunwa amazima; ekigambo kyawe gaba mazima.

¹⁸ Nk'okwo wantumire omu nsi, kutyo nanye mbatumire omu nsi.

¹⁹ Ninkwehongera aha bwa bonene, na bonene babone kukwehongera omu mazima.

²⁰ “Tindikubashabira bonkai, ninshabira na bona abalikwikiliza ebyo aba balikubagambira,

²¹ bona babe omoi. Mara okwo iwe Tata osingiire omuli inye, nanye ndi omuli iwe, na bonene babone kuba omuli ichwe, ensi eshobore kwikiliza okwo wantumire.

²² Ekitinwa eky'ontungire nikyo mbahaire, bashobore kuba omoi okwo ichwe tuli omoi,

²³ inye ndi omuli bonene, na iwe osingiire omuli inye, bonene kuba omoi emalimali, ensi eije emanye okwo wantumire n'okwo wangondize okagonza na bonene.

²⁴ Tata, ningonza n'abo wantungire tube hamoi mbali ndi, babone ekitinwa kyange ekyo wangondize okantunga ensi ethakabaireho.

²⁵ Tata omugorogoki, ensi tekakumanyaga, kyonkai inye ninkumanya; mara n'aba nibamanya okwo wantumire.

²⁶ Mbakumanyisize, mara ndashuba mbakumanyise, engonzi ezo wangondize zibone kusingira omuli bonene, nanye mbe omuli bonene.”