Yohana 15 - Ebibulia 2001

Yesu muzabibu gw'amazima

¹ “Inye ndi muzabibu gw'amazima, kandi omulimi wagwo ni Tata.

² Buli itagi lyange elitaraba, Tata aliihyaho. Buli itagi elitaraba alisharaho, nirwo omuzabibu guraraba muno.

³ Ekigambo ekyo naruga kubagambira kyabelize.

⁴ Okwo eitagi litakuraba lili lyonkai litali aha muzabibu, nainywe kutyo, shana kamuraikara omuli inye.

⁵ Inye ndi muzabibu, inywe muli mataagi. Omuntu aikara omuli inye, na inye nkaikara omuli wenene, ogwo n'iwe araba ebiraba bingi, kuba kamutaina inye timwakukora kantu.

⁶ K'omuntu aliba ataikaire muli inye, alinagwa nk'eitagi ayome. Amatagi nk'ago garondarondwa, ganagwa omu muliro, gokibwa.

⁷ Kamuliikara omuli inye n'ebigambo byange bikabaikaramu, mushabe ekyo mulikwenda kyona, mulikitungwa.

⁸ Kamulikuraba ebiraba bingi, aho Tata abona ekitinwa, nainywe musiimwa okwo muli begesibwa bange.

⁹ Okwo Tata yangondize nikwo nanye mbagonza; mwikare omu ngonzi zange.

¹⁰ Kamurayekomya emihango yange muraikara omu ngonzi zange, okwo nanye nyekomize emihango ya Tata nkaikara omu ngonzize.

¹¹ Nabagambira ebigambo ebi, ebyera byange kabiikara omuli inywe, mara ebyera byanyu bigobelere.

¹² “Omuhango gwange nigw'ogu, mugonzangane okwo inye nabagondize.

¹³ Tabaho muntu agira ngonzi zilikukira ezi, omuntu kwemera kufa kutulilira batahibe.

¹⁴ Muraba bataahi bange kamurayekomya emihango yange.

¹⁵ Inye tinkibeta bairu, enshonga omwiru tamanya mukamawe akoraki. Kyonkai inywe mbesire banywanyi bange; kuba byona ebyo nahuliire ahali Tata mbibamanyisize.

¹⁶ Timwandonzire, shana inye nkaronda inywe, kugenda mukaraba ebiraba mara ebiraba byanyu biikareho; ekyo murashabaga Tata omw'ibara lyange akibatunge.

¹⁷ Eki ninkibaragira, mugonzangane.

Enobi y'ensi

¹⁸ “K'ensi elibanoba, mumanye okwo yanobire inye etakanobire inywe.

¹⁹ Kuba muli b'ensi, ensi yakubaire negonza abali bayo. Kyonkai orwo mutali ba nsi, nkabaronda omu nsi, aha rw'ekyo ensi nebanoba.

²⁰ Mwijuke ekigambo ekyo nabagambiire, ‘Omwiru takira mukamawe.’ Kabaraba bangingiize inye, nainywe barabagingiiza. Kabaraba nibekomya ebigambo byange, nainywe ebyanyu barabyekomya.

²¹ Kyonkai ebi byona barabibakora nibabatura inye, aha rw'okuba ayantumire tibalikumumanya.

²² Kanakuba ntaizire nkabagambira, bakubaire bataina bufu; kyonkai mbwenu tibaina kya kwetonganira aha rw'obufu bwanyu.

²³ Anoba inye anoba na Tata.

²⁴ Kanakuba ntabakoleire bitangazo eby'omuntu n'omoi atakakoraga, bakubaire bataina bufu; kyonkai mbwenu baboine bashuba bannoba, banoba na Tata.

²⁵ Byona bibaireho kugobesheleza ekyahandikirwe omu Mateka kiti, ‘Bakannobera bushai.’

²⁶ Orwo Omujuni alija, owo ndibatwekera kuruga ahali Tata, n'iwe Mwoyo w'amazima, alikutabuka ahali Tata, ogwo n'iwe alinjulira.

²⁷ Nainywe muli bajulizi, enshonga kwema aha mbandizo tutura hamoi.