Yohana 14 - Ebibulia 2001

Yesu muhanda gw'okugya ahali Isheichwe

¹ Yesu agambira abegesibwabe ati “Emitima yanyu etashoberwa. Mwesiga Ruhanga, nanye munyesige.

² Omwa Tata halimu ebiyumba bingi. Kakitakubaire kityo tinaikubagambiire kwo ndikugya kubashemeleza mwanya.

³ Orwo ndagenda nkabashemeleza omwanya, ndagaruka mbatware mbali ndi. Mbali ndi nainywe mube niho muba.

⁴ Mbali ndikugya omuhanda nimugumanya, na yonene nimuhamanya.”

⁵ Tomasi amugambira ati, “Mukama, mbali olikugya titulikuhamanya; aho omuhanda twagumanya tutai?”

⁶ Yesu amugambira ati, “N'inye muhanda, n'amazima, n'oburora. Taliho muntu agoba Tata atarabire ahali inye.

⁷ Kuba nimumanya na Tata mwakubaire nimummanya. Kyonkai kwema mbwenu mwamumanyire mara mwamuboine.”

⁸ Filipo amugambira ati, “Mukama, waitu batwoleke Sho, ekyo kiratumara.”

⁹ Yesu amugambira ati, “Filipo, mbali nakatulira nainywe tokamanyaga? Ayamboine yaboine Tata. Aho wakugamba otai oti, ‘Otwoleke Sho?’

¹⁰ Tolikwikiliza okwo ndi omuli Tata na Tata ali omuli inye? Ebigambo ebyo mbagambira timbyetuma; shana Tata asingiire omuli inye n'iwe alikwekolera emilimoye.

¹¹ Munyikilize okwo ndi omuli Tata, na Tata ali omuli inye; kakitali kityo, buzima mwikilize ebyo ndikukora.

¹² “Nimbagambira amazima, alikunyesiga, nawe alikora ebyo ndikukora; nangu aije akore ebilikushaga aha, aha rw'okuba ningya owa Tata.

¹³ Buli kimoi ekyo mulishaba omw'ibara lyange ndikikora, Tata aije asingizibwe omuli Mwana.

¹⁴ Kamulishaba kyona kyona omw'ibara lyange ndikikora.

Yesu nashuubiza abegesibwabe Mwoyo Mutakatifu

¹⁵ “Kamuraba nimungonza, murayekomya emihango yange.

¹⁶ Nanye ndashaba Tata abahe Omujuni ondijo ow'okutuura nainywe ebiro byona.

¹⁷ Ogwo n'iwe Mwoyo w'amazima, ow'ensi etakuhabwa, ahakuba telikumubona anga kumumanya. Inywe nimumumanya, asingiire omuli inywe, mara aliikara omuli inywe.

¹⁸ “Tindikwija kubasigaho muli ntaabwa; ndibagarukira.

¹⁹ Kandi omu kaanya kagufi ensi eraba etakimbona, nawe inywe murambona; enshonga ndi murora, nainywe muraba barora.

²⁰ Kir'ekyo mulimanya okwo ndi omuli Tata, nainywe omuli inye nanye omuli inywe.

²¹ Alimanya emihango yange akagyekomya, ogwo n'iwe aliba nangonza. Mara alingoza, aligonzibwa na Tata, nanye ndimugonza mara muzokeho.”

²² Yuda (atali Isikariote) amugambira ati, “Mukama, noija kutweyoleka otai oteyolekire nsi?”

²³ Yesu amuhorora ati, “K'omuntu arangonza, arayekomya ebigambo byange, na Tata aramugonza, mara turamuhabukira tuture omuli wenene.

²⁴ Omuntu atangonza tayekomya bigambo byange. Kandi ebigambo ebyo mulikuhulira ti byange, bya Tata ayantumire.

²⁵ “Ebigambo ebyo nimbibagambira tukyali hamoi.

²⁶ Kyonkai Omujuni, n'iwe Mwoyo Mutakatifu, owo Tata alibatwekera omw'ibara lyange, alibegesa ebintu byona, abaijukye n'ebyo mbagambiire byona.

²⁷ Nabasigira emilembe; nabaha emilembe yange; tindikubaha nk'okwo ensi eha. Mutashoberwa mara mutatina.

²⁸ Mukahulira ningamba nti, ‘Nagenda, ndashuba mbagarukire.’ Kuba nimungonza mwakushandukire, kuba ningya owa tata; enshonga Tata nanshaga.

²⁹ Mbwenu nabagambira kithakabaireho, orwo kirabaho mubone kwikiliza.

³⁰ Tindikwija kweyongera kufumora nainywe, enshonga omutwazi w'ensi egi aliho naija. Taina bushobora ahali inye;

³¹ kyonkai ninkora nk'okwo Tata andagiire, ensi emanye okwo ngonza Tata. Imuka turuge hanu aha.