Yohana 13 - Ebibulia 2001

Yesu nanabisa abegesibwabe amaguru

¹ Ekiro kikuru kya Pasika kikaba kitakagobire, Yesu amanya okwo esaa yagoba kuruga omu nsi egi kugaruka owa Ishe. Buli kaanya yagonzaga ababaire bali ba wenene omu nsi, yabagonza kugoba aha ndekelero.

² Kababaire nibaraagira, Sitani akaba yatahire omu mutima gwa Yuda Isikariote eya Simoni kubanja Yesu.

³ Yesu nawe hakaba namanya okwo Ishe yamutungire buli kantu; n'okwo yabaire namanya okwo yarugire ahali Ruhanga mara nagaruka ahali Ruhanga,

⁴ aruga aha kiihuro, ajura ebijwarobye, ayekoma etauro omunda.

⁵ Ashesha amaizi omu beseni, abanza kunabisa abegesibwabe amaguru. Abaragaza n'etauro eyo yabaire ayekomire omu nda.

⁶ Agobera Simoni Petero. Petero amugambira ati, “Rugaba, waitu waija kunabisa inye amaguru?”

⁷ Yesu amuhorora ati, “Ekyo ndikukora tolikukimanya mbwenu aha, orakishobokerwa ahanyuma.”

⁸ Petero amugambira ati, “Tolikwija kunnabisa maguru.” Yesu amushubamu ati, “Kantakunabisize, aho mpaho toli wange.”

⁹ Simoni Petero amugambira ati, “Rugaba, waitu otannabisa maguru gonkai, onnabise n'emikono n'omutwe!”

¹⁰ Yesu amugambira ati, “Ayayogire takyetaaga kunaba, shana kunaba amaguru gonkai, kuba naba nayera wena. Nainywe nimwera, kyonkai ti inywena.”

¹¹ Okugamba atyo Yesu hakaba namanya alikwija kumubanja; niyo nshonga akagamba ati, “Timulikwera inywena.”

¹² Kayamazire kubanabisa amaguru akajwara n'ebijwarobye, agaruka aha mwanyagwe, abagambira ati, “Ekyo nabakolera mwakimanya?

¹³ Inywe munyeta Mwegesa mara Mukama; mara muli omu mazima, mba Mwegesa kwo mara Mukama.

¹⁴ Ka inye Omukama wanyu mara Omwegesa wanyu ndaba nabanabisa amaguru, nainywe kutyo muragiirwe kunabisangana amaguru.

¹⁵ Kuba nabaha obulebero, okwo muragiirwe kugira okwo nabagilira.

¹⁶ Nimbagambira, omwiru takira mukamawe, n'entumwa teshaga agitumire.

¹⁷ Kamuramanya ebigambo ebi mukabigobesheleza muraba muli baberwa.

¹⁸ Tindikugamba inywena. Abo ndonzire nimbamanya; Ebihandiko Bitakatifu bigobelere biti, ‘Ayaliire ebyakulya byange, yanteza ekisinziro.’

¹⁹ Ebi nimbibagambira mbwenu aha bithakabaireho, kabiramara kubaho mwikilize okwo ‘N'inye asingiire.’

²⁰ Nimbagambira amazima, alitora owo ntumiire aliba atoire inye. N'alintora aliba atoire ayantumire.”

Yesu nabaasha okubanjwakwe

²¹ Orwo Yesu yamazire kugamba ebigambo ebyo, ashagashaga omu mwoyo, agamba ahamisa ati, “Nimbagambira amazima, omuli inywe halimu alikwija kumbanja.”

²² Abegesibwa balebangana, owo yagamba tibafa gamumanya.

²³ Omoiho omu begesibwabe owo Yesu wenene yagonzaga, hakaba amubyamire omu kifuba;

²⁴ nikwo Simoni Petero kumutigisa akamugambira ati, “Otugambire owo alikugamba n'ohai.”

²⁵ Okwo omwegesibwa ogwo yabaire abyamire Yesu omu kifuba, amubaza ati, “Mukama, n'ohai?”

²⁶ Yesu amuhorora ati, “Owo ndakoleza ekichweka ky'omukate niw'ogwo.” Kayamazire kukoza ekichweka ky'omukate yakiha Yuda eya Simoni Isikariote.

²⁷ Yuda kayamazire kutora ekichweka ekyo ky'omukate, Sitani amutahamu. Yesu amugambira ati, “Yanguha ogye okore eky'olikugya kukora.”

²⁸ Okwo babaire nibaraagira taliho n'omoi yamanyire ekyo yamugambiliire atyo.

²⁹ Abandi batekeleza bati orwo Yuda yakwataga akasanduku k'empiha, Yesu hakaba namugambira kugya kugura ebyo babaire nibetaga aha kiro kikuru; anga kujuna abanaku.

³⁰ Yuda kayamazire kutora ekichweka ky'omukate, tiyalinzire, ashohora; mara kikaba kili kiro.

Omuhango oguhya

³¹ Yuda kayabaire yaturukire, Yesu agamba ati, “Mbwenu aha Omwana w'Omuntu yahabwa ekitinwa, mara omuli wenene na Ruhanga ekitinwa nakihabwa.

³² Ka Ruhanga araba nahabwa ekitinwa omu Mwana w'Omuntu, Ruhanga nawe arakuza Omwana w'Omuntu omuli wenene, mara amukuze aho n'aho.

³³ Baana bange, nkyaina inywe hakabanga kake. Mulimpiga; nk'okwo nagambire Abayahudi nikwo ndikugambira nainywe: Mbali ndikugya inywe timwina kugyayo.

³⁴ Nimbaha omuhango oguhya: Mugonzangane; okwo inye mbagondize, nainywe kwakwo mugonzangane.

³⁵ Omu kugonzangana kwanyu, nimwo abantu bona balimanyira okwo muli begesibwa bange.”

Yesu nabaasha okwo Petero aramwetonga

³⁶ Simoni Petero abaza Yesu ati, “Mukama, waitu noija kugya nkahai?” Yesu amuhorora ati, “Mbali ndikugya mbwenu aha toina kumponderayo.”

³⁷ Petero amugambira ati, “Mukama, kubaki ntakuhondera? Ndakufera.”

³⁸ Yesu amubaza ati, “Iwe oije ofere inye? Nkugambire amazima, enkoko etakakokoromire oraba wanyetongire kashatu.”