Yohana 12 - Ebibulia 2001

Yesu nasiigwa amajuta omuli Betania

¹ Ebiro mukaaga ebilikwebembera Pasika, Yesu agya Betania omwa Lazaro, owo yabaire ahimbwire.

² Omwa Lazaro omwo bamuchumbira ekyakulya kya bwaigoro; Marita n'iwe yaihwire, kandi Lazaro hakaba ali omoiho omu baraagiire na Yesu.

³ Maria akwata ekilo y'amajuta g'omugaju gwonene gwonene, agasiiga Yesu amaguru, kandi amaguru ago agaragaza n'eishokelye. Enju yona eijura akatachu k'amajuta ago.

⁴ Kyonkai Yuda Isikariote, omoiho omu begesibwa (ayabaire naija kumubanja), agamba ati,

⁵ “Kubaki amajuta aga gataguzibwa dinari 300 tukaziha abanaku?”

⁶ Eki tiyakigambire aha rw'okugir'oti yafagaho banaku. Akakigamba ahakuba yabaga mushuma. N'iwe yakwataga n'akasanduku k'empiha; ezo batekagamu hakaba nazihyamu.

⁷ Yesu agamba ati, “Mumuleke, k'agabiikire ekiro ky'okuziikwa kwange.

⁸ Ebiro byona abanaku muba mwinaibo, kyonkai inye tituli hamoi biro byona.”

Entegeka y'okwita Lazaro

⁹ Abayahudi abangi muno kabamanyiire okwo Yesu ali Betania, baija, ti aha rwa wenene wenkai, kyonkai baija kubona na Lazaro owo yabaire ahimbwire.

¹⁰ Kityo abakuhani bakuru bategeka kwita na Lazaro,

¹¹ kuba aha rw'enshongaye Abayahudi bangi bakabarugamu baikiliza Yesu.

Yesu nataaha Yerusalemu omu kanyahwera

¹² Bukeire abantu bangi muno ababaire baizire aha kiro kikuru bahulira okwo Yesu alikwija Yerusalemu.

¹³ Kityo bakwata amatagi g'emikindo bashohora kumwakilira, nibahoya bati, “Musingize Ruhanga! Aina omugisha ogwo alikwija omw'ibara ly'Omukama, nangu Mukama wa Isiraeli!”

¹⁴ Yesu akwasa omwana gw'endogobe agushuntamaho; nk'okwo kyahandikirwe kiti,

¹⁵ “Otatina iwe kigo kya Sioni, leeba omukama wawe naija, ashuntamire aha mwana gw'endogobe!”

¹⁶ Abegesibwabe tibabandize kushobokerwa kigambo eki. Kyonkai ka Yesu yabaire yaboine ekitinwa nirwo baijukire okwo kyabaire kimuhandikirweho n'okwo kyaizire kikabahokwo ahali wenene.

¹⁷ Embaga eyabaire einaiwe orwo yayesire Lazaro omu nyanga akamuhimbura ekabarura amakuru ago.

¹⁸ Ekyo embaga yagendeleire kumwakilira ekaba yahuliire okwo Yesu yakozire ekitangazo ekyo.

¹⁹ Abafarisayo bagambirangana bati, “Mulebe okwo mutakina kya kukora; leeba ensi yona yamuhondeire.”

Abagiriki nibahiga Yesu

²⁰ Omuli balinya ababaire baizire aha kiro kikuru kufukamira Ruhanga, hakaba halimu Abagiriki.

²¹ Aho baija ahali Filipo owa Betisaida eya Galilaya, bamugambira bati, “Waitu, nitugonza kubona Yesu.”

²² Filipo agya agambira Anderea; bagenda hamoi bombili bagambira Yesu.

²³ Yesu abahorora ati, “Esaa yagoba, Omwana w'Omuntu yaija kubona ekitinwa.

²⁴ Nimbagambira amazima, k'enjuma y'engano etaragaire mw'itaka ekafa, esigara okwo eli; kyonkai k'efa eraba muno.

²⁵ Agonza oburorabwe bulimufera, kandi anoba oburorabwe omu nsi egi alibwihura, abone oburora obutalihwaho.

²⁶ Omuntu wena wena k'araba nankolera, naragirwa kumpondera. Mbali ndi niho n'omwiru wange araba ali. Omuntu wena wena k'arankolera Tata aramukunira.

Yesu naranga okufakwe

²⁷ “Mbwenu nimbanganwa omwoyo. Ngambeki? Nti, ‘Tata, ndokora esaa egi etagoba?’ Chei, ekyandesire nikyo kyangobya aha esaa egi.

²⁸ Tata, singa okuze eibara lyawe.” Aho eiraka liruga omw'iguru liti, “Eibara lyange nalikulize, mara ndashuba ndikuze.”

²⁹ Embaga eyabaire eliho ekahulira eiraka elyo, kyonkai bati, “Eiguru nilyo lyahinda.” Abandi bati, “Omumalaika yaba nafumora na Yesu.”

³⁰ Yesu ahorora ati, “Eiraka eli lyaija aha bwanyu; tilyaija aha bwange.

³¹ Mbwenu aha eiramu ly'ensi lyagoba, n'omutwazi wayo baija kumuchwa.

³² Nanye kabaramara kunyiha ahansi bakampanika, ndayehikya abantu bona.”

³³ Okugamba atyo akagonza kwoleka emifereye.

³⁴ Embaga emuhorora eti, “Amateka gatugambira okwo Kirisito ali w'okumelera eirai lyona. Wakugamba otai okwo Omwana w'Omuntu ali w'okuhanikwa?”

³⁵ Yesu abagambira ati, “Mukyaina omushana akaanya akandi kake. Orwo mukyaina omushana mutambuke, litaija likabatobelera omu kihanda. Ayagenda omu mwilima tamanya mbali alikugya.

³⁶ Orwo mwina omushana mugwikilize, nirwo murahinduka bantu b'omushana.” Yesu kayamazire kugamba atyo, yarugayo yabesheleka.

Okutaikiliza kw'Abayahudi

³⁷ N'orwo yabaire yakozire ebitangazo bingi omu maisho gabo, tibamwikiliize.

³⁸ Ekyo kikabaho ekyo Omurangi Isaya yagambiire kibone kugobeelera, kiti, “Mukama, n'ohai aikiliize ebyo tugambire? Isi n'ohai ashuruliirwe obushobora bwa Ruhanga?”

³⁹ Aha rw'ekyo tibaikiliza. Enshonga Isaya akashuba yagamba ati,

⁴⁰ “Abahumisize amaisho, yabagumanganisa emitima, batabonesa maisho gabo kandi emitima yabo etashobokerwa bakangarukaho nkabakiza.”

⁴¹ Okugamba atyo Isaya akabona ekitinwakye yashuba yamugamba.

⁴² Kyonkai abantu bangi, nangu n'abatwazi bakamwikiliza, nawe aha rw'okutina Abafarisayo tibayatwire kwo balikumwikiliza, bataija bakababinga omu sinagogi.

⁴³ Manyasi bagonzaga okusiimwa abantu, kushaaga okusiimwa Ruhanga.

Ebigambo bya Yesu binai eiramu

⁴⁴ Yesu agamba n'eiraka lihango ati, “Anyikiliza aba atalikwikiliza inye, shana aikiliza ayantumire.

⁴⁵ Kandi ambona abona ayantumire.

⁴⁶ Nkaija omu nsi ndi mushana, alikanyikiliza atalija akaikara mu mwilima.

⁴⁷ K'omuntu alikuhulira ebigambo byange atabyekomize, inye tindikumuramura.

⁴⁸ Omuntu atanyikiliza, akanga n'ebigambo byange ogwo aina omuramuziwe; ebigambo ebyo ngambire biliba muramuziwe aha kiro ky'enzindo.

⁴⁹ Inye ebyo ngambire timbigambisize bushobora bwange. Tata wenene ayantumire n'iwe yandagiire ebyo ndagamba.

⁵⁰ Kandi nimanya okwo ebyo yandagiire nibwo burora obutalihwaho. Aha rw'ekyo ebyo ndikugamba ningamba ebyo Tata yandagiire.”