Yohana 11 - Ebibulia 2001

Okufa kwa Lazaro

¹ Hakaba haliho omuntu omoi arwaire, n'iwe Lazaro owa Betania, ekyaro ekyo Maria n'omurumuna Marita barugagamu.

² Maria ogwo owo Lazaro, munyanya, yabaire arwaire, n'iwe yabaire asiigire Omukama amajuta akashuba akamuragaza n'eishokelye.

³ Abarumuna abo bombili baragiraho Yesu bati, “Mukama, munywanyi wawe murwaire.”

⁴ Yesu kayaikihuliire yagamba ati, “Endwara egi tiyakumwita, shana y'okuhaisa Ruhanga ekitinwa, n'Omwana w'Omuntu ahaisilizibwe aha rw'enshonga y'endwara egyo.”

⁵ Yesu yagonzaga Marita n'omurumuna na Lazaro.

⁶ Aho orwo yahuliire okwo Lazaro ali murwaire, mbali yabaire ali akelererwayo ebiro ebindi bibili.

⁷ Ahanyuma agambira abegesibwabe ati, “Tugaruke Buyahudi.”

⁸ Abegesibwa bamugambira bati, “Rabi, Abayahudi babaire nibahiga kukuteza amabare, mbwenu oshube ogyeyo?”

⁹ Yesu abahorora ati, “Manya omushana gugira esaa 12. K'omuntu agenda omushana gujwire tasitara, enshonga omushana gw'ensi egi nagubona.

¹⁰ Kyonkai omuntu agenda kili kiro asitara, aha rw'okuba talikubona mushana.”

¹¹ Agamba atyo, ashuba abagambira ati, “Munywanyi waitu Lazaro anagiire.”

¹² Abegesibwa bamugambira bati, “Rugaba, k'araba anagiire araikya.”

¹³ Nawe Yesu hakaba nabagambira okwo afire, bonene batekeleza okwo anagire kwikya.

¹⁴ Aho Yesu abaatulira ati, “Lazaro afire;

¹⁵ mara aha bwanyu ninshemelerwa kubona okwo mbaire ntaliho, mwije mwesige. Kyonkai katugende.”

¹⁶ Tomasi omurongo agambira abegesibwa batahibe ati, “Naichwe tugende tugye tufe nawe.”

Yesu n'iwe kuhimbuka mara burora

¹⁷ Orwo Yesu yagobire Betania, ashanga bamazire ebiro binai baziikire Lazaro.

¹⁸ Betania ekaba eyataine Yerusalemu, nk'emaili ibili zonkai,

¹⁹ n'Abayahudi bakaba baizire bangi kushura Marita na Maria n'orufu rwa munyanyabo.

²⁰ Marita kayahuliire okwo Yesu alikwija, agenda kumwakilira, kandi Maria ogwo hakaba ali omu nju ashuntamire.

²¹ Marita agambira Yesu ati, “Mukama, kuba obaire oliho, munyanyazi tiyakufire.

²² Kandi mbwenu aha nimanya okwo kyona kyona eky'orashaba Ruhanga arakikutunga.”

²³ Yesu agambira Marita ati, “Munyanyoko naija kuhimbuka.”

²⁴ Marita amushubamu ati, “Nimanya okwo alihimbuka aha ihimbuka ely'ekiro ky'enzindo.”

²⁵ Yesu amuhorora ati, “N'inye kuhimbuka mara burora; alinyesiga n'orwo yakufa, alirora.

²⁶ N'alirora akanyesiga talifa n'akati. Ekigambo eki nokikiliza?”

²⁷ Marita amugambira ati, “Ego Mukama, ninyikiliza okwo oli Kirisito, Omwana wa Ruhanga, atura ategeirwe kwija omu nsi.”

Yesu nachulira Lazaro

²⁸ Marita kayamazire kugamba atyo, akwata omuhanda agya agambira omurumuna Maria omu kahwe ati, “Omwegesa yaija, nakweta.”

²⁹ Maria kayahuliire ekyo, aimuka bwangu ahondera Yesu.

³⁰ Yesu hakaba akyali mbali Marita yabaire amushangire, atakagobire aha kyaro.

³¹ Abayahudi abashangirwe baina Maria omu nju nibamumaraamara, kabaaboine okwo yabaratuka ahansi akaturuka, bamuhondera, batekeleize bati nagya kuchulira aha nyanga.

³² Aho ka Maria yagobire mbali Yesu ali akamubona, amugwa omu maguru namugambira ati, “Mukama, kuba obaire oliho, munyanyazi tiyakufire.”

³³ Yesu kayamuboine okwo alikuchura, n'Abayahudi abaija nawe nibachura, yaganya muno omu mwoyo, yashasha;

³⁴ abaza ati, “Mumuziikire nkahai?” Bamuhorora bati, “Mukama, waitu ija olebe.”

³⁵ Yesu alira.

³⁶ Aho Abayahudi bati, “Mubone okwo abaire namugonza!”

³⁷ Kyonkai abandi bati, “Ayahumurwize empume alemirwe kutanga omuntu kufa?”

Yesu nahimbura Lazaro

³⁸ Yesu ashuba aganya muno; aija aha nyanga. Enyanga egyo ekaba neshusha empako, bagitaireho n'eibare.

³⁹ Yesu abaragira kwihyaho eibare elyo. Marita munyanya kifa amugambira ati, “Mukama, kaanya aka omuntu yanukire, enshonga yamara ebiro binai afire.”

⁴⁰ Yesu amugambira ati, “Tinakugambira okwo k'orayesiga orabona ekitinwa kya Ruhanga?”

⁴¹ Aho baihyaho eibare. Yesu aleba eiguru agamba ati, “Tata, ninkusiima kuba wampulira.

⁴² Ntuura nimanya okwo buli kaanya ompulira, kyonkai eki nakigamba aha rw'abantu abali aha, babone kwikiliza okwo wantumire.”

⁴³ Kayabaire yagambiire atyo, agamba n'eiraka lihango ati, “Lazaro, turuka!”

⁴⁴ Ayaba afire aturuka, emikono n'amaguru bikomire ebitambara, n'obuso buzingazingire omu mwendo. Yesu abaragira kumukomorora mara kumuleka akagenda.

Abayahudi nibanaama kwita Yesu

⁴⁵ Abayahudi ababaire bahonderaine na Maria kabaaboine ekyo Yesu yakora, bamwikiliza.

⁴⁶ Kyonkai abandi bagya omu Bafarisayo bababarulira ebyo yakora.

⁴⁷ Kityo abakuhani bakuru n'Abafarisayo beta orukiiko, bagamba bati, “Tukoreki? Omuntu ogu nakora ebitangazo bingi.

⁴⁸ Katuramuleka akagendelera ati, buli omoi naija kumwikiliza, kandi Abaroma basilikye Rwensinga yaitu n'eihanga lyaitu.”

⁴⁹ Kyonkai omoi omuli bonene n'iwe Kayafa ayabaire ali Mukuhani Nyamukuru mwaka ogwo, abagambira ati, “Inywe timwina kyomulikumanya n'akake.

⁵⁰ Timulikumanya okwo kili ky'omugasho omuli inywe omuntu omoi akafa akatulilira embaga eihanga litalisiliika lyona?”

⁵¹ Ekigambo ekyo tiyakigambire aha rwa kweyendera. Okwo omwaka ogwo yabaire ali Mukuhani Nyamukuru, akabaasha okwo Yesu arafa akatulilira eihanga,

⁵² mara ti ihanga lyonkai, kyonkai kujwanganisa n'abantu ba Ruhanga bona abatali hamoi.

⁵³ Kwema aho bategeka okwo baramwita.

⁵⁴ Aha rw'ekyo Yesu aba atakigenda mu Bayahudi rubona. Arugayo agya bwatana aha irungu, omu kigo kilikwetwa Efuraimu; aba niyo aikara n'abegesibwabe.

⁵⁵ Na Pasika y'Abayahudi eshangwa eraliire kugoba, aho bangi bagya Yerusalemu Pasika etakagobire kugya kweshemeza.

⁵⁶ Bata nibahiga Yesu, orwo bemeleire Rwensinga bata kubazangana bati, “Nimulenga mutai? Talikwija aha kiro kikuru?”

⁵⁷ Abakuhani bakuru n'Abafarisayo bakaba barabizeho omuku okwo wena wena aramanya mbali ali abamanyise, bamukwate.