Yohana 10 - Ebibulia 2001

Enfumo y'omushumba

¹ Yesu agamba ati, “Nimbagambira amazima, omuntu ataaha omu buhyo bw'entaama atalesirwe mu rwigi, akaletwa muhanda gundi akakuuba akabugwamu, omuntu ogwo mushuma mara mushuga.

² Kyonkai aletwa omu rwigi ogwo mushumba w'entaama.

³ Ogwo omukumilizi amukingulira; entaama zihulira eirakalye, mara entaama ezo azeta buli emoi ibara lyayo, azishohoza aheru.

⁴ K'aba yazishohoize zona azebembera, zonene zimuhondera, enshonga nizimanya eirakalye.

⁵ Owo zitalikumanya tizimuhondera, zimwiruka, aha rw'okuba abo zitalikumanya n'amaraka gabo tizigamanya.”

⁶ Yesu hakabachwera enfumo egi, kyonkai tibashobokeirwe kyoyabaire nabagambira.

Yesu omushumba murungi

⁷ Yesu ashuba abagambira ati, “Nimbagambira amazima, inye n'inye mulyango gw'entaama.

⁸ Abanyebembeire bona bashuma mara bashuuga, n'entaama tizabahuliliize.

⁹ Inye n'inye mulyango. Omuntu alitaahira omuli inye alirokoka; alitaaha omu kiraro ashube aturuke agye omw'ilisizo.

¹⁰ Omushuma aija kwiba kushai n'okwita n'okusilikya. Inye nkaija k'entaama zigira oburora, mara zikabugilira kimoi.

¹¹ N'inye mushumba murungi. Omushumba murungi ayehayo kufera entaamaze.

¹² Omupakasi kushai atali mushumba, atali mukama wa ntaama, k'abona omushega nigwija anagaho entaama airuka; aho omushega ogwo gukwata entaama guzinaganaga.

¹³ Ekimwirukya ashangwa ali mupakasi, entaama tazifaho kantu.

¹⁴ N'inye mushumba murungi; entaama zange ninzimanya, nazo nizimmanya;

¹⁵ nk'okwo Tata amanya inye nanye nkamumanya, nikwo ndikwehayo kufera entaama zange.

¹⁶ Kandi nyinayo entaama ezindi ezitali za buhyo obu. Nazo ndagiirwe kuzileta omu buhyo obu, mara zirahulira eiraka lyange. Kityo harabaho obuhyo bumoi n'omushumba omoi.

¹⁷ Enshonga egi niyo Tata angondeza, aha rw'okuba n'inyehayo oburora bwange nyije nshube mbubone.

¹⁸ Taliho yakubunyaka, kandi inye n'inyehayo oburora bwange okwo nyeyendeire. Nyina obushobora bw'okwehayo oburora bwange, mara nyina n'obushobora bw'okushuba kububona, omuruka ogu nkagwihya ahali Tata.”

¹⁹ Abayahudi bashuba babeganuka aha rw'ebigambo ebyo.

²⁰ Abangi omuli bonene bagamba bati, “Ainaimu eisitani, muraru; nshongaki kumuhuliliza?”

²¹ Abandi bagamba bati, “Omuntu ainamu eisitani tiyakugamba bigambo nk'ebi. Eisitani lyakuhumuurura omuntu?”

Yesu nibamwanga

²² Kikashangwa kili kiro kikuru ky'okwijukiraho okuhabwa omugisha kwa Rwensinga omuli Yerusalemu.

²³ Kili kirumo ky'embeho Yesu ashangwa nagendagenda omu itaho lya Solomoni.

²⁴ Abayahudi bamubumbilira, bamugambira bati, “Oraberahai iwe n'okutugiza ekihika? K'oraba n'iwe Kirisito otugambire akaature.”

²⁵ Yesu abahorora ati, “Nabagambiire, kyonkai timulikwikiliza. Emilimo eyo ndikukoza obushobora bwa Tata nenjulira.

²⁶ Kyonkai timulikwikiliza, kuba omu ntaama zange timulimu.

²⁷ Entaama zange nizimmanya eiraka lyange, ninzimmanya, mara nizimpondera.

²⁸ Ninziha oburora obw'eira lyona; tizilifa, kandi taliho alizinkwaikura mu mikono.

²⁹ Entaama ezo Tata yantungire nizinshagira ebintu byona, mara taliho muntu ashobora kuzikwaikura Tata mu mikono.

³⁰ Inye na Tata tuba kigambo kimoi.”

³¹ Abayahudi baronda amabare kugamuteza.

³² Yesu abashubamu ati, “Mbakoleire ebirungi bingi kuruga ahali Tata; omuli ebyo, ebyo mbakoleire ni kiki ekyo mulikwenda kunteleza amabare?”

³³ Abayahudi bamugarukamu bati, “Ti kigiro kirungi ekyo tulikwenda kukuteleza mabare, nitugonza kugakuteza aha rw'okuba warogota; iwe kuba muntu okashuba okehindura Ruhanga?”

³⁴ Yesu abahorora ati, “Tikihandikire mu Mateka ganyu kiti, ‘Nkabagambira okwo muli baruhanga?’

³⁵ Ka balinya Ruhanga araba yabesire baruhanga abo yagambire ekigambokye, mara kandi ebihandiko bitakatifu tibina kuhinduka,

³⁶ mbwenu owo Tata yatendekire akashuba akamutuma omu nsi n'iwe mulikugira muti, ‘Warogota,’ aha rw'okuba nagamba nti, ‘Ndi Mwana wa Ruhanga?’

³⁷ Kandaba ntalikukora bya Tata, ahonu mutanyikiliza;

³⁸ nawe kandikukora ebya Tata, mwikilize ebyo ndikukora ebyo, mumanye mara mushobokerwe okwo Tata asingiire omuli inye, nanye ndi omuli Tata.”

³⁹ Bashuba balengesa kumukwata, kyonkai abanyubuka omu mikono.

⁴⁰ Yesu ashuba ashabuka Yorudani mbali Yohana yabaire abandiize kubatiliza, aikarayo.

⁴¹ Abantu bangi bamugoba bati, “Yohana tiyakozire kitangazo; kyonkai byona ebyo yagambire aha muntu ogu by'amazima.”

⁴² Abantu bangi bamwikililizayo.