Yohana 1 - Ebibulia 2001

Ekigambo ky'oburora

¹ Orwa mbere na mbere Kigambo akashangwaho. Kigambo ogwo hakaba ajwangaine na Ruhanga, mara Kigambo hakaba ali Ruhanga.

² Orwa mbere na mbere akashangwa ali hamoi na Ruhanga.

³ Ebintu byona bikatondwa omuli wenene; kandi omu byakatonzirwe byona taliho kintu na kimoi ekitatonzirwe omuli wenene.

⁴ Omuli Kigambo ogwo hakaba alimu oburora, mara oburora obwo nibwo bwabaire mushana gw'abantu.

⁵ Omushana ogwo gwaka omu mwilima, mara omwilima tigukarazaga mushana ogwo.

⁶ Hakaba haliho omuntu atumirwe Ruhanga, eibaralye Yohana.

⁷ Yohana akaletwa obujulizi, kujulira omushana, abantu bona babone kwikiliza aha rwa wenene.

⁸ Hakaba atali mushana, shana akaija kujulira omushana.

⁹ Hakaba aliho omushana nyhakabara ogwaijaga omu nsi, nigwo gwakiza kaishe muntu.

¹⁰ Hakaba ali omu nsi, mara n'iwe yagitonzire, kyonkai ensi tiyamumanyire.

¹¹ Akaija omwabo, kyonkai aba wenene tibamunyegeize.

¹² Kyonkai bona abamunyegeize, bakamwesiga, hakabaha obushobora bw'okuba baana ba Ruhanga;

¹³ abatazairwe butondwa bwa muntu anga aha rw'omuntu kwenda, shana bakazarwa Ruhanga.

¹⁴ Kigambo hakaba muntu yasingira omuli ichwe, aijwire ekisha n'amazima. Tukabona ekitinwakye, ekitinwa ekisaine Omwana omumoi ahali Ishe.

¹⁵ Yohana akamujulira, yagamba n'eiraka lihango ati, “Ogu n'iwe nagambaga nti, ‘Alikunduga enyuma nanshaga. Akashangwaho inye nthakabaireho.’ ”

¹⁶ Aha mwijurogwe gw'ekisha niho tutura nitwihya ekisha obutosha.

¹⁷ Amateka gakaletwa ahali Musa; ekisha n'amazima byaletwa ahali Yesu Kirisito.

¹⁸ Taliho muntu n'omoi araboine Ruhanga; shana Omwana omumoi omugonzibwa muno ahali Ishe, n'iwe yamanyisize Ruhanga ogwo omu bantu.

Obujulizi bwa Yohana Omubatiza ahali Yesu

¹⁹ Obu nibwo bujulizi bwa Yohana orwo Abayahudi ba Yerusalemu batumire abakuhani n'Abalevita kumubaza bati, “Iwe oli ohai?”

²⁰ Akagamba tiyayetongire, ati, “Inye tindi Kirisito.”

²¹ Bamubaza bati, “Aho oli ohai? Isi oli Eliya?” Wenene ahorora ati, “Tindi Eliya.” Bati, “Isi oli murangi?” Ahorora ati, “Chei.”

²² Bamubaza bati, “Oli ohai? Otuhorore ekyo turagya tukagambira abatutumire. Noyegambahoki?”

²³ Abahorora ati, “Inye ndi iraka ly'alikukungeleza omw'irungu, ati, ‘Mugorore omuhanda gw'Omukama,’ nk'okwo omurangi Isaya yagambire.”

²⁴ Bonene abo bakaba batumirwe Abafarisayo.

²⁵ Bamubaza bati, “Aho orwo otali Kirisito, anga Eliya, anga omurangi, kubaki nobatiza?”

²⁶ Yohana abahorora ati, “Inye nimbatiza n'amaizi; kyonkai omuli inywe halimu owo mutalikumanya,

²⁷ nangu n'iwe alikunduga enyuma, owo ntasaine kukomorora rukoba rwa biratwa.”

²⁸ Ebyo bikabaho omuli Betania, buseli bwa Yorudani, mbali Yohana yabatilizaga.

Akataama ka Ruhanga

²⁹ Bukeire Yohana abona Yesu namwijaho, agamba ati, “Mulebe Akataama ka Ruhanga, akaiza okufakara kw'ensi!

³⁰ Ogu n'iwe mbagambira nti, ‘Alikunduga enyuma nanshaga ekitinwa, enshonga akashangwaho inye nthakabaireho.’

³¹ Tinamanyaga alija ali wa ngeliki, kyonkai inye nkabatiza n'amaizi, aije amanyike omuli Isiraeli.”

³² Yohana ajulira ati, “Nkabona Mwoyo nahanantuka omw'iguru omu mishusire y'ekiiba, ekiiba ekyo kyaija kyamubandaraho.

³³ Inye nyenene tinamumanyaga; kyonkai ayantumire kubatiza n'amaizi akangambira ati, ‘Ow'orabona Mwoyo nahanantuka akamubandaraho, ogwo n'iwe alibatiza na Mwoyo Mutakatifu.’

³⁴ Inye nayeboneire mara ndi mujulizi okwo ogu ali Mwana wa Ruhanga.”

Abegesibwa ba Yesu aba mbere

³⁵ Bukeire bunu Yohana ashangwa ayemeleire n'abegesibwa babili.

³⁶ Aleba Yesu nagenda agamba ati, “Mulebe Akataama ka Ruhanga!”

³⁷ Abegesibwabe bamuhulira nagamba atyo, bahondera Yesu.

³⁸ Yesu kayahindukire abona okwo bamuhondeire, ababaza ati, “Nimuhigaki?” Bamuhorora bati, “Rabi,” nikwo kugamba kuti, “Mwegesa, noikara nkahai?”

³⁹ Abahorora ati, “Mwije mulebe.” Bagenda babona mbali yabaire naikara; zikaba zili nk'esaa 10, bagenda batobeza nawe eizoba.

⁴⁰ Omu begesibwa babili abahuliire Yesu nagamba, omoi arugaho amuhondera: N'iwe Anderea murumuna Simoni Petero.

⁴¹ Anderea owo yaboine mbere ni Simoni mukuruwe, amugambira ati, “Twabona Masiha,” nikwo kugir'oti Kirisito.

⁴² Amuletera Yesu. Yesu kayamulebire agamba ati, “N'iwe Simoni eya Yohana? Orayetwaga Kefa,” nikwo kugir'oti Rwazi.

Yesu nayeta Filipo na Natanaeli

⁴³ Bukeire, Yesu aimukya kugya Galilaya. Abona Filipo, amugambira ati, “Ompondere.”

⁴⁴ Filipo ogwo yarugaga Betisaida, ekigo kya Anderea na Petero.

⁴⁵ Filipo abona Natanaeli, amugambira ati, “Twabona owo Musa yagambire omu Mateka owo abarangi barangire, n'iwe Yesu owa Nazareti, mutabani wa Yozefu.”

⁴⁶ Natanaeli amugambira ati, “Nazareti yakurugwamu akarungi kona kona?” Filipo amushubamu ati, “Ija obone.”

⁴⁷ Yesu abona Natanaeli naija, amugambira ati, “Leba Omunyaisiraeli nyhakabara, atainamu bugobya!”

⁴⁸ Natanaeli abaza Yesu ati, “Wamany'otai?” Yesu amuhorora ati, “Filipo atakakwesire, orwo waba oshuntamire aha muti gw'omutini, nakubona.”

⁴⁹ Natanaeli amuhorora ati, “Rabi, oli Mwana wa Ruhanga! Oli Mukama wa Isiraeli?”

⁵⁰ Yesu amugarukamu ati, “Aha rw'okuba nakugambira okwo nakubona oshutamiire aha mutini, nikyo waikililiza? Noija kubona eby'amani kushaaga ebi.”

⁵¹ Ashuba amugambira ati, “Mazima, mazima ninkugambira nti, mulibona eiguru likingukire, n'abamalaika ba Ruhanga nibatemba nibasongoka baizire aha Mwana w'Omuntu.”