Yoeli 3 - Ebibulia 2001

Ruhanga aliramura amahanga

¹ Omukama nagamba ati, “Leba, omu makiro ago, ndigarulira Yuda na Yerusalemu emilembe.

² Ndihikanisa amahanga gona ngahikanise omu ruhanga rwa Yehoshafati. Omwo nimwo ndibahera ekibonabonyio kubatura abantu bange, endonkwa zange za Isiraeli abo banaganagire omu mahanga, bakashuba bakalya ensi yange;

³ bakatekera abantu bange enshoga, omwana w'omwojo bakamutunda empiha z'okuhonga malaya; omwana w'omwisiki bamutunda empiha z'okunywa amarwa, baganywa bagatamiira.”

⁴ “Nimugonza kungira mutai inywe Tiro, Sidoni n'emikoa yona ya Filisitia? Mwina ekyo mulikugonza kunyehoroleza aha rw'ekyo nabakoleire? Kamuranyehoroza nanye ndarahuka mbehoroze aha rw'ebyo mwakozire.

⁵ Mukatwara efeza yange n'ezahabu yange, mwatwara ebintu byange by'eiguzi lingi mwabiteka omuli rwensinga zanyu.

⁶ Aba Yuda na Yerusalemu mwabaguza omu Bagiriki, mwabafurulira harai n'ensi yabo y'obuzarwa.

⁷ Kyonkai mbwenu ndabaihya mbali mwabagulize, nshube inywe mbehoroze aha rw'ebyo mwakozire.

⁸ Batabani banyu na bahara banyu ndibaguza aba Yuda, nabo babaguze aba Sheba, eihanga elili harai. Kuba inye Omukama n'inye nakigamba.

⁹ Ekigambo eki mukirange omu mahanga, muti: ‘Mwetekatekere endashana, muchumbize abaisherukare, abarashani bona bahurure batabare.

¹⁰ Enfuka zanyu muziheshemu embanda, n'empabyo zanyu muziheshemu amachumu. Ataina mani ayebuge ati mba mwisherukale.

¹¹ Inywe mahanga ag'embaju zona, murahuke muhurure hamoi.’ ” Waitu Mukama, sindika eihe lyawe libatere.

¹² “Amahanga gaimukye, gaije omu Ruhanga rwa Yehoshafati. Ahakuba omwo nimwo ndishuntama kuramura amahanga g'embaju zona.

¹³ Mukwate empabyo mubashare okwo bagesha engano, mubalibate okwo balibata ezabibu ziijwire omw'ijungiro. Amaato gaijwire edivai nigasheshekana; aha rw'okuba babi muno.”

¹⁴ Enkumi n'enkumi bali omu Ruhanga rw'Eiramu, kuba nimwo ekiro ky'Omukama kiragobera.

¹⁵ Eizoba n'okwezi byabambwa omwilima, n'enyanyinyi zalekera kwaka.

Ruhanga alitunga eihangalye omugisha

¹⁶ Omukama ayemire Sioni nasinda, ayemire Yerusalemu atungamize eiraka; eiguru n'ensi nibitengeta. Kyonkai Omukama wenene niwe buhungiro bw'abantube, niwe boma ya Isiraeli.

¹⁷ “Aho nirwo mulimanya okwo inye ndi Mukama Ruhanga wanyu, Nsingiire Sioni aha ibanga lyange elitakatifu. Yerusalemu eliba ntakatifu, kandi abanyamahanga tibaligiguturanamu rundi.

¹⁸ Kir'ekyo amabanga galitonona edivai elikunura, enshozi ezo ziligerwa amata. Obwiga bwona bwa Yuda buligerwa amaizi; enchuro elitabuka omuli Rwensinga y'Omukama, eitilire Oruhanga rwa Shitimu.

¹⁹ Misiri eliba ndaara, na Edomu eliba irungu lishai. Enshonga bakakolera aba Yuda obukatili, baita abantu b'ensi egyo abataina ntambara.

²⁰ Nawe Yuda eliturwa ebiro byona, na Yerusalemu eturwemu amakiro gona.

²¹ Ndyeholera abaisirwe abo, kandi abalikwatwa omushango tindibaganyira; kuba inye Omukama ntura aha Ibanga lya Sioni.”