Yoeli 2 - Ebibulia 2001

Enzige nizishura ekiro ky'Omukama

¹ Mweme Sioni mutere enzamba, muzitere mwemire aha ibanga lyange elitakatifu! Abanyansi bona bajugumbe, kuba ekiro ky'Omukama kyaija, kyagoba.

² Kiro ky'omwilima n'ekiire, kiro ky'ebichwi n'omwilima lindindi! Yaijwa eihanga lihango ely'amani, amabanga lyagabamba bundi mwilima. Okuruga karai takabagaho ihanga nk'elyo, mara amakiro agalija elyab'elyo tililizoka.

³ Omuliro niguhya gubebembeire, n'endimi zagwo nizibarug'enyuma. Ensi ebali omu maisho neshusha ebusitani ya Edeni, kandi mbali balikuruga irungu elisilikire, taliho kalikubahungaho.

⁴ Nibashusha efarasi, emiirukire nk'efarasi z'endashana.

⁵ Nibaguruka aha mitwe y'amabanga, nibahinda nk'amagali g'endashana. Nibabarabaruka nk'omuliro omu bibuba, nibashusha eihe ly'amani lyetekatekeire endashana.

⁶ Amahanga niganja batakagagobire, buli omoi atukwirwe amaisho.

⁷ Nibarashana nk'emanzi, nibatemba eboma okw'abaisherukare bagira. Buli omoi omuhanda akwete gumoi, taliho alikugurugamu.

⁸ Taliho alikusiima mutahiwe, buli omoi naraba muhandagwe. Ebikwato nibyo balikutemesa omuhanda, taliho kyakubemeleza.

⁹ Nibabunda ekigo, nibairukira aha boma eiguru, nibakuuba amaju nibataha omunda, nibaraba omu madirisha nk'omushuma.

¹⁰ Ensi netengeta batakagigobiremu, n'eiguru nilichundwa; eizoba n'okwezi nibibambwa omwilima, n'enyanyinyi nizilekera kwaka.

¹¹ Omukama ayebembeire eihelye nayatangura eiraka, kuba eihelye lihango muno munonga, n'omuntu akora eky'Omukama amuragiire omuntu ogwo aina obushobora. Orw'okuba ekiro ky'Omukama kikuru mara nikitiinisa muno, n'ohai ayakukyemera?

Omweto gw'okwechuza

¹² Omukama nagamba ati, “Nangu na mbwenu mungarukeho n'emitima yanyu yona, musiibe, mulire, muchure.

¹³ Mutagure emitima yanyu, tikutagura bijwaro byanyu.” Mugarukire Omukama Ruhanga wanyu, kuba wenene agira embabazi n'obuganyizi, tayanguha kutamwa, agira ekisha, k'aba yaizire kutubonabonyia ayeiza.

¹⁴ N'ohai alikumanya nk'Omukama Ruhanga wanyu atahindure mutima akeiza, akashuba akatusingira tukabona ensano n'eby'okunywa eby'okumuhongera?

¹⁵ Mweme Sioni mutere enzamba murange ekisiibo, habeho enteko.

¹⁶ Mwete abantu, mubatekateke aha rw'enteko ntakatifu, muhuruze abagurusi n'abaana, nangu n'abalikwonka. Ashweire aruge omu kitabo, n'omugore ayaruke.

¹⁷ Abakuhani abakozi b'Omukama, beme omugati ya alutare n'ekishasi kya Rwensinga balire nibagamba bati, “Waitu Mukama, ganyira abantu bawe, leka kushonaza endonkwa zawe, amahanga gatabachwaho mugani bakwese, ‘Ruhanga wabo ali nkahai?’ ”

Ruhanga nagarulira ensi einura

¹⁸ Ahanyuma Omukama akafaho ensiye, yashasibwa abantube.

¹⁹ Akahorora abantube abo yabagambiire ati, “Leba ndibatwekera emyaka, edivai n'amajuta; muliiguta, kandi tindibashonaza mu mahanga gandi.

²⁰ Ndibaihyaho eihe lya bikara ndiilize harai, ndibingire omu nsi y'eirungu eyomangaine. Ekichweka kyayo ekyebembeire nkinage omu nyanja y'oburugaizoba, eky'enyuma nkinage omu nyanja y'obugwaizoba. Eihe elyo lilijunda linuke muno, orwo likozire ebishaguliraine.

²¹ Iwe nsi, otatina. Shemelerwa oshanduke kuba Omukama akozire eby'amaani.

²² Inywe nyamaishwa mutatina, obunyasi omw'ishwa bwamezire, n'emiti yarabire ebiraba. Kandi omutini n'omuzabibu ebirabire muno.

²³ Aba Sioni mushanduke, mushemelerwe Omukama Ruhanga wanyu. Abahaire enjura y'omuhanguko omu kirumo kyayo, yabagwisiza enjura emazire. Ey'omuhanguko n'ey'etoigo abahaire nk'ey'orwa mbere.

²⁴ Enyano ziraijura engano, amajungiro gaijure gasheshekane edivai n'amajuta.

²⁵ Ndibagarulira ebyo mwafeleirwe omu myaka ey'emijumbi y'enzige yalire emyaka yanyu. N'inye nabateize eihe eli lihango ly'enzige.

²⁶ Mulilya bingi mwigute, Musingize Omukama Ruhanga wanyu ayabakoleire eby'okutangaza. Abantu bange tibaligorwa rundi n'akake.

²⁷ Ahanyuma BaIsiraeli mulimanya okwo mba Mukama Ruhanga wanyu, tabaho ondijo, mumanye n'okwo ntura omuli inywe. Abantu bange tibaligorwa rundi n'akake.”

Ekiro ky'Omukama

²⁸ Omukama nagamba ati, “Ahanyuma abantu bona ndibaha Mwoyo wange. Batabani banyu na bahara banyu baliranga. Abagurusi omuli inywe balirota ebiroto, n'abasigazi banyu babonekerwe.

²⁹ Omu makiro ago nangu n'abairu n'abazana ndibaha Mwoyo wange.

³⁰ “Ndyoleka eby'okutangaza aha iguru n'omu nsi. Halibaho okwitangana, n'omuliro n'omwika gulikuchunka.

³¹ Eizoba lilihinduka mwilima, n'okwezi kuliba bwamba; ebyo nibyo bilyebembera ekiro ky'amani eky'Omukama eky'kitininwa.

³² Kyonkai bona abashaba Omukama k'abajuna balirokoka; kuba aha Ibanga lya Sioni n'omuli Yerusalemu halibamu ab'okuhunga nk'okwo nagambire, kandi abalihonoka nibo ndigira abo narondamu.”