Yoeli 1 - Ebibulia 2001

Abantu nibachulira emyaka efire

¹ Omukama akagambira Yoeli eya Petueli ati,

² “Inywe bagurusi muhulire ekigambo eki, mutege amatwi banyansi inywena. Kwema mwabaho anga omu makiro ga bashwenkurw'inywe, ekyab'eki kirabaireho?

³ Mukigambire abana banyu, n'abaana banyu bakigambire baijukuru banyu, na baijukuru banyu babigambire ebizimbere byanyu.”

⁴ Emijumbi y'enzige ehonderaine yalya emyaka. Ebisigirweho omujumbi ogu bilirwe omujumbi ogundi.

⁵ Musisimuke inywe abatamiire, mulire; muchure inywe inywena abanywamarwa, kuba amarwa agarungi gachwekire, timuliganywa rundi.

⁶ Abantu b'eihanga ly'amani abatakubarwa batabaliire ensi yange. Baina amaino nk'ag'entare, kandi ag'enshongeza baina nk'ag'entare enkazi.

⁷ Eihanga elyo lisire emizabibu yange, lyahenda emitini yange. Ligishushubwire ebishushu lyabinaga ahansi; amatagi gayo gasigara nigera.

⁸ Muchure nk'omwisiki ajwete orugunia, alikuchulira abaire namushelera.

⁹ Ebihongo by'ensano n'eby'okunywa, bichwekire omuli Rwensinga y'Omukama, n'abakuhani abakozi b'Omukama nibachura.

¹⁰ Endimiro zisilikire, ensi nechura, kuba emyaka bagiisire, edivai tekizoka, n'amajuta gahambire.

¹¹ Inywe balimi mushoberwe, muchure inywe bakozi b'omu mizabibu. Mulizibwe engano n'eshayiri, kuba emisiri teinamu kyakugesha.

¹² Omuzabibu gwomire n'omutini gukabire, nangu n'omukomamanga, n'omutende n'omupera kwakwo. Emiti yona y'omu ndimiro eyomire, amashemelerwa omu bantu gahoiremu.

¹³ Inywe bakuhani mwekome engunia muchure, muchure inywe abakozi ba alutare. Inywe bakozi ba ruhanga wange, mutahe Rwensinga murare mweshwekire engunia! Aha rw'okuba ebihongo by'ensano n'eby'okunywa tibikija Rwensinga ya Ruhanga wanyu.

¹⁴ Muragire habeho ekisiibo, muralize n'enteko. Muhuruze abagurusi n'abanyansi bona, baije omuli Rwensinga y'Omukama Ruhanga wanyu, bamutakiire!

¹⁵ Yo! Kiroki ekyo! Ekiro ky'Omukama kyagoba, kiro kya Rushoborabyona kusilikya ensi.

¹⁶ Ebyakulya byatuhwaho, kandi ebyera n'amashemelerwa omuli Rwensinga ya Ruhanga waitu tibikirangwamu.

¹⁷ Empambo nizijundira omw'itaka, esitoa bazikambwire, bazitemire; kuba emyaka teyezire.

¹⁸ Enyamaishwa nizitaga! Amahyo g'ente nigabumbulikwa aha rw'okuburwa obunyasi; n'ag'entaama gashobeirwe.

¹⁹ Waitu Mukama ntakiire iwe! Enshonga omuliro gwayokya amalisizo g'omw'irungu, endimi zagwo zayokya emiti yona omw'ishwa.

²⁰ Nangu n'enyamaishwa nizikutakira aha rw'obwiga bw'amaizi kwoma, n'omuliro kwokya amalisizo omw'irungu.