Yobu 6 - Ebibulia 2001

Yobu

¹ Aho Yobu ahorora ati,

² “K'enaku zange zakupimirwe obusikizi bwazo, n'amatangwa gange gona gakagya aha munzani,

³ byakusikire nk'omushenye gw'enyanja, aha rw'ekyo okugamba kwange kwakubaire kuhongongwa.

⁴ Ahakuba Rushoborabyona anteire emyambi, obumara bwayo bwanshenshera omu mubili, Ruhanga ankangire muno.

⁵ Endogobeishwa ejuga nely'obunyasi? Isi enumi yakujuga nelya?

⁶ Ekitalikunura kakitaina mwonyu kyakulibwa? Anga ekilikwera ky'omw'ihuli kigira akanuzi kona kona?

⁷ Ebyab'ebyo tibinnulira, nibishusha ebyakulya ebinsheshemukya.

⁸ Nimbe nabona ekyo ndikushaba, Ruhanga akantunga ekyo ndikwegomba!

⁹ Ruhanga nabe nasinga akanyita, akaimukya omukono akansilikya!

¹⁰ Ekyo kyakummaramazire, nangu n'omu mashasi nakushandukire ntalikunanukwa, aha rw'okuba ebyo Ruhanga Omutakatifu ahanga tinkabishagaga.

¹¹ Inye nyina maniki kutafa? Nyegumisiliize mberehai?

¹² Ninguma nk'amabare, anga naba mulinga?

¹³ Tinkiina geyamba, tinkiina bwirukiro.

¹⁴ Omuntu ayanga kujuna munywanyiwe, aba atakitina Rushoborabyona.

¹⁵ Barumuna bange ngobya nk'omugera gwomire, nibashusha obwiga obwoma.

¹⁶ Obwiga obwo bwiraguzibwa ebarafu, nimwo eseluji eyesheleka.

¹⁷ Omu kyanda bwoma, k'omushana gujwa buba butakili mbali bw'aba buli.

¹⁸ Abagenzi basiga omuhanda bahaba, bagya omwirungu bagwayo.

¹⁹ Abagenzi ba Tema bahiga amaizi, aba Sheba nibashubira kugabona.

²⁰ Bashuburugukwa okwo bashubire, bagya aha bwiga obwo bahwa amakabakaba.

²¹ Na inywe mwanshusira obwab'obwo, nimubona amatangwa gange kyonkai nimutina.

²² Inye nyina ekyo nabashabire? Anga nagizire nti, ‘Mungilire rushwa?’

²³ Anga nagizire nti, ‘Munyhiye omu mikono y'omubisha?’ Anga nti, ‘Munchungure omu mikono y'abangingiza?’

²⁴ Munyegese inye ndabahuliliza, kandaba nashobya munshoborore.

²⁵ Ebigambo birungi bigira enkozo, mbwenu inywe empaka zanyu zanjunaki?

²⁶ Isi nimulenga ningamba obushai, mbwenu kandikugamba nshuburugukirwe nka nimumporora?

²⁷ Nangu mukwatilire entabwa kugitekera enshoga, na mutahi wanyu kumugura.

²⁸ Kyonkai mbwenu mundebe munyeteke; okwo mukandebire tindikwija kubabeiya.

²⁹ Nimbatagiliza muhindure ebitekelezo mutaija mukafakara, muhinduke kuba inye ndi omu mazima.

³⁰ Isi omu byo nkagambire natalize? Tindikushobora kumanya kirungi na kibi?”