Yobu 5 - Ebibulia 2001

¹ “Mbwenu aho Yobu yeta, haliho wena wena arakuhorora? Kandi orahindukira batakatifu bahai?

² Mazima ekiniga kita omufera, n'ekiisho kiita omulenga.

³ Nkabona omufera atalikutengeta, kyonkai inye aho n'aho nakeena obuturobwe.

⁴ Abaanabe tibaina buge, kabakugubwaho omushango tibakubona wa kubarabira.

⁵ Eby'agesire bilibwa abajara, kandi okwo abihire omu mahwa, ab'eiliho eitungalye baligilira ekyakakwe.

⁶ Kuba enaku tiziruga mu chuchu, n'ebiyengo tibimera mw'itaka.

⁷ Kyonkai omuntu azarwa kubona enaku, nk'okwo enshasi z'omuliro zituntira eiguru.

⁸ Inye kampiige Ruhanga, Ruhanga mbe niwe nyekwasa;

⁹ niwe akora eby'amaani ebishaga amagezi gaitu, ebitangazo ebitaina rubara.

¹⁰ Niwe agwisiza ensi enjura, endimiro akazigobyamu amaizi.

¹¹ Atungika abajege, ainunura abalikuchura, abaha emilembe.

¹² Atabura entegeka z'engobya, ebyo bakora tibigoshoka.

¹³ Abamanyi abakwatira omu bugobya bwabo, n'entegeka z'abagezi azichwa aho n'aho.

¹⁴ Omushana gubabera mushana, kandi eihangwe libabera itumbi.

¹⁵ Kyonkai arokora enfuzi bataziita, n'omujege amwihya omu mikono y'omunyamani.

¹⁶ Kityo ashuubiza omunaku, omubi amusiza.

¹⁷ Leba, muberwa omuntu owo Ruhanga abonabonyia, aha rw'ekyo otagaya kibonabonyio kya Rushoborabyona.

¹⁸ Aha rw'okuba ahutaza ashuba ashemba engoga, atera, ashuba akiza.

¹⁹ Omu biyengo araikaraga nakujuna, toliba kantu.

²⁰ Omw'ifa alikuchungura tolifa, n'omu ndashana alikwihura aha mbanda.

²¹ Ab'okukugeya alibakujuna, n'okusilika kakulibaho tolitina.

²² Omu kibundo n'omw'ifa iwe olisheka, n'ebikaaka tolibitina.

²³ Omu ndimiro zawe tolishangamu mabare, n'ebikaaka tibilikutabalira.

²⁴ Oligira emilembe omw'ihema lyawe, orabaraga entama zawe oshange zigobire.

²⁵ Kandi oligira abaijukuru bangi, n'oruzaro rwawe ruliba rungi nk'obunyasi omu rweya.

²⁶ Olifa wabondabonzire, okw'obona omw'igesha nibaleta omuganda gw'engano aha rwano.

²⁷ Iwe, ebi tukabihenjuza twabona okwo bili by'amazima, obihulire, obyeteke, obikunde.”