Yobu 41 - Ebibulia 2001

¹ Wakushobora kujubisa Leviatani eirobo, anga orulimirwe kurukomesa omuguha?

² Wakumutahya omuguha omu nyindo, anga omuchumisa eirobo orushaya?

³ Nolenga oti yakukutagiliza muno, anga yakufumorage naiwe?

⁴ Yakukora endagano kuba mwiru wawe ebiro byona?

⁵ Isi wakumuzanisa nk'ekinyonyi, anga omukoma aha nyoma aha rw'abazana bawe?

⁶ Abatunzi bakumuramuuza, bakumushanshana n'abachuruza?

⁷ Isi wakushobora kumuchumisa emposho zikamutaha, anga omutwegwe gukatahwa amachumu?

⁸ Omuteho omukono, omanye okwo yaba ndashana, tolishubira.

⁹ Eshubi y'omuntu ehwa; agwa ahansi omu maishoge asharara.

¹⁰ Taliho n'omoi yakumaza kumwimukya. Isi aho n'ohai ayakunyemelera omu maisho?

¹¹ N'ohai arampozire mumalire? Kyona kyona ekili omu nsi yona kyange.

¹² Tinakuburwa kugamba aha maguru ga Leviatani, n'amanige gona, n'ekyemakye.

¹³ N'ohai ayamwihyaho oruhu? N'ohai ayakushenshera omu makotige g'ekyoma?

¹⁴ N'ohai ayakumwashamura enshaya? Amainoge nigatinisa muno!

¹⁵ Omugongogwe gwina amakarakamba nk'engabo, gatembekeraine oti gakomirwe omuhuri.

¹⁶ Buli limoi lyataine n'elindi, n'akayaga tikashobora kugashenshera.

¹⁷ Gakwataine hamoi, gakomerainwe buli limoi na litahi lyalyo, tigashobora kutaishukana.

¹⁸ K'ayesaimura omushana gumuruga omu nyindo, amaishoge garabya nk'emambya.

¹⁹ Omu kanwake harugwamu omuliro ogulikurabagira, enshasi z'omuliro nizitunta.

²⁰ Omu nyindoze harugwamu omwika, nk'orwoya oruruga omu nyungu elikutogota, anga nk'ebibingo bilikuhya.

²¹ Orwoyarwe rwakya amakara, n'endimi z'omuliro zimuruga omu kanwa.

²² Omu bikyabye nimwo amani gatura, omuntu k'amubona amutina.

²³ Omubiligwe gwona gwina ebigonya, bigumire, tibishobora kurugaho.

²⁴ Omutimagwe gugumire nk'eibare, gugumire nk'orubengo.

²⁵ Orwo aimuka emanzi zitina, kwetengya kushai bahwa omwoyo.

²⁶ N'orwo embanda emugobaho temushenshera, lilikaba ichumu anga mwambi anga muhunda.

²⁷ Ekyoma akileba nk'ebishagate, n'omulinga aguleba nk'orukwi rujunzire.

²⁸ Omwambi tigushobora kumubinga, ahali wenene amabare g'ekihubeezo gaba binyasi.

²⁹ Enkoni z'emituli zihinduka bishagate, ashekelera emihunda elikujunjuma.

³⁰ Orubaju rwo abyamisize ni nk'enguhyo z'obwogi, abyama aha shabo ashusha ekyoma kitera engano.

³¹ Enyanja engundu agichumba etogota nk'enyungu, enyanja agishushanisa enyungu y'amajuta.

³² Mbali aruga asiga nihengelera, omuntu yakumanya obuziba haliyo eifuro.

³³ Omu nsi talimu kilikumushusha, talimu kishusha kitondwa eki ekitaina butini.

³⁴ Agaya ebikaaka byona, niwe aba mukama wabyo.”