Yobu 21 - Ebibulia 2001

Yobu

¹ Aho Yobu ashubamu ati,

² “Mpuliliza kurungi mbagambire, mbamaramare.

³ Munyegumisilize ngambe, kandaba nagambire mwije musheke.

⁴ Inye kangambire, nyina owo nagambire? Ntatamwe mbeki?

⁵ Mundebe mutangare, mukwate aha munwa.

⁶ Kandikutekeleza agambaireho nshasha, njugumba nyena.

⁷ Kubaki ababi batura, bakahangara, bakagira obushobora n'amani?

⁸ Abaana babo baguma, na baijukuru babo bakanya.

⁹ Amaju gabo gagira emilembe, Ruhanga tagabonabonyia.

¹⁰ Enumi zabo nizifukira obusito nibukwata, ente zabo zizara tizitoroga.

¹¹ Obwana bwabo buturuka nk'obuhyo bw'entaama, bugenda nibuguruka.

¹² Kabahulira akadiika n'enanga bahoya, kabahulira omulere bashemelerwa.

¹³ Ebiro byabo byona bagoijagira, n'okufa bafage.

¹⁴ Nibagambira Ruhanga bati, ‘Rugamu’, emihango yawe titulikugyetaga.

¹⁵ Rushoborabyona yab'ohai ichwe kumukolera? Okumushaba kutugasireki?

¹⁶ Mara leba, eitunga bainalyo, kyonkai ebyo bagamba inye timbilimu.

¹⁷ Ababi baikara bagoshokire, enaku tizibagwera.

¹⁸ Ruhanga takanigaraga akababonabonyia, kandi tibatwarwa muyaga nka binyasi, kushusha omushunga ogukukumbwa embuyaga.

¹⁹ Inywe mugamba muti, ‘Entambara zabo Ruhanga alizitura abaana babo;’ kyonkai asinge abonabonyie bonene, bamanye.

²⁰ Basilike bonene bonene, babe nibo baitwa ekiniga kya Rushoborabyona.

²¹ Kababa bali hai kufa, baba batakiina kyobakyamanya aha babo.

²² Haliho ayakwegesa Ruhanga, Ruhanga aramura abakama?

²³ Haliho omuntu afa ali murungi, aina emilembe agoijagiire.

²⁴ Agomokire, nabengeya.

²⁵ Ondijo aitwa obujune omu mwoyo, atakarozagaho karungi kona kona.

²⁶ Bombili omu nyanga baiganirana, baliibwa enzito.

²⁷ Ebitekelezo byanyu, n'okwo mulikugonza kunkora kubi, nabimanyire.

²⁸ Nimubaza mbali nyaruju eli, n'enju eyaturwagamu ababi.

²⁹ Timukabazaga bagenzi, mukaikiliza ebyo bagamba,

³⁰ okwo omuntu omubi aganyirwa aha kiro ky'eiramu, n'okwo arokoka aha kibonabonyio.

³¹ Ow'okumutoijera n'ohai, anga ow'okumubonabonyia aha rw'ebyo yakozire?

³² Kababa nibamutwara kumuziika, enyangaye eshangwa elinzirwe.

³³ Abamwebembeire aha nyanga tibaina rubara, abasigaire bona bamuhondeire enyuma, mara atabirwage omu nyanga egyo.

³⁴ Aho mwakummaramara mutai nimugamba etabangu? Ebyo mwamporora byona bishuba kushai.”