Yobu 2 - Ebibulia 2001

Sitani nashuba kulengesa Yobu

¹ Kir'ekindi abamalaika ba Ruhanga baija kukurata Omukama, Sitani nawe abetabamu kukurata.

² Omukama amubaza ati, “Iwe warugahai?” Sitani amuhorora ati, “Naba ningendagenda kushai omu nsi.”

³ Omukama amabaza ati, “Isi wayekomize omwiru wange Yobu? Omu nsi talimu n'omoi alikumwigana. Muntu murungi ataina kamogo. Antina mara ayelinda kukora kubi. Wenene akyali mwesigwa muno n'orwo onyorobize nkamukunagira k'omusilikiza bushai.”

⁴ Aho Sitani ahorora Omukama ati, “Omuntu aragiraga buli kantu kwechungura ayekuure obwoya aha murundi.

⁵ Kyonkai mbwenu mwake eby'ainabyo byona, oije obone okwo arakukeena omu bantu!”

⁶ Omukama amugambira ati, “Leba, ali omu bushobora bwawe, ekiliho otamwita.”

⁷ Kityo Sitani aruga aha Mukama ashasa Yobu amubujuura omubili gwona kwema aha mutwe kugoba aha kalenge anuka chuchuchu.

⁸ Ashuntama omw'ijwi akwata oruguhyo ayeyaga.

⁹ Aho mukaziwe amugambira ati, “Okyazigiliire muno okuba mwesigwa? Keena Ruhanga oshube ofe.”

¹⁰ Kyonkai Yobu amugambira ati, “Nogamba nk'abakazi abafera. Isi Ruhanga atutunge kurungi tubitore, mbwenu ebibi tubyange?” Omuli ebi byona Yobu tiyatalize aha rulimi.

¹¹ Banywanyi ba Yobu bashatu kabahuliire enaku ezo zona ezamugwireho, buli omoi akwata omuhanda aija. Banywanyibe abo ni: Elifazi Omutemani, Bilidadi Omushuhi na Sofari Omunaamati. Bategeka kwija kumulebesa ekyo n'okumumaramara.

¹² Kabamuboine bakyali harai, tibamumanyire. Bachura muno, batagura ebijwaro byabo, benaga n'eitaka omu mitwe nilitumuukira eiguru.

¹³ Bashuntama nawe ahansi ebiro mushanju n'omushana gwaho, mara taliho n'omoi yamugambiire kigambo, aha rw'okuba bakabona okwo yabaire nashasha muno.