Yobu 16 - Ebibulia 2001

Yobu

¹ Aho Yobu ahorora ati,

² “Ebyab'ebi ndahuliire bingi, inywe nywena okwo muli, timulikummaramara nimunjunaza.

³ Okuhongongwa tolekera, anga oshasibweki kumporora otyo?

⁴ Kamwakuba muli okwo ndi nanye nakugambiire nkainywe, mbagambaho bingi nshuba neganegya omutwe.

⁵ Nakugambiire ebyo kubagumisa, ebigambo byange bibamaramara.

⁶ N'orwo ndagamba, obushasi bwange tibuchweke, kandayegumisiliza ndaikyamuki?

⁷ Mazima mbwenu Ruhanga ankozire omulimo, yammaraho n'abali bange bona.

⁸ Anzingazingire aho niho ndikumanyira, nateba nahwa aha magufa n'aha maisho nimumbona.

⁹ Annigalire yantamwa, yanyita orubi, yannenera amaino, yannoba yandeba kubi.

¹⁰ Abantu bankomorolera akanwa, bangaya, bangeleka, bantera empi.

¹¹ Ruhanga yanagira ababi, yannaga omu mikono y'abafakare.

¹² Nkaba ngoijagiire yambaragura, yansinjagulikya, akandengelera kyere.

¹³ Yansindikira enaku embaju zona. Tiyanganyira, yantagura ensigo, yanyihyamu endurwe yanyitira kimoi.

¹⁴ Yantundatundwigura, yampinyahinya nk'omwisherukare.

¹⁵ Nkechura najwara orugunia obutarujura, leba mbwajagaire omw'itaka.

¹⁶ Nalizire amaisho gantukwire, ebisige byanzimbire;

¹⁷ mara okwo tinkaitaga muntu, n'ebyo nshaba biba birungi.

¹⁸ Inywe bantu, ebyo bankora mutabitaitiramu, okutaka kwange kuhulirwe.

¹⁹ Omw'iguru nyinayo ow'okundabira, niwe mujulizi wange.

²⁰ Banywanyi bange nibanjuma, kyonkai inye nintakira Ruhanga;

²¹ asinge arwaniliire omwiruwe, nk'okwo omuntu arwanilira omwatani.

²² Kuba emyaka yasigara mike, naija kugenda mbali ntaliruga.