Yobu 13 - Ebibulia 2001

¹ “Ebi byona mbyeboneire, nabyehulilira mara nabishobokerwa.

² Ebyo mulikumanya nanye nimbimanya, timulikunkira.

³ Shana ngambire Rushoborabyona, ningonza kwetonganira ahali Ruhanga.

⁴ Kyonkai inywe nimunshuka, inywena muli batambi abatalikugasha.

⁵ Hakili kamwakwesilize, buzima mwakubonekire okwo muli bamanyi.

⁶ Mbwenu muhulire ebitekelezo byange, mara muhulilize okwetongorora kwange.

⁷ Inywe nimundemba, nimumbeiya ebyo Ruhanga atabatumire.

⁸ Mwina agamurabira mukamurwanilira?

⁹ Kayakubahenjuza aina akarungi ako yakubabonamu? Mumubeiya nk'okwo omuntu abeiya ondijo.

¹⁰ Kamuragira ekigonzi mukakisheleka, arabarwanisa.

¹¹ Ekitinwakye nikija kubatinisa, kibakange.

¹² Emigani yanyu nfumo ezitainamu kantu, n'empaka zanyu nizihomoka nk'eibumba.

¹³ Mwesizeho kake ngambe, ekiraba nikiba kibe.

¹⁴ Inye nayehoiremu, kandaba ninfa nfe.

¹⁵ Leba, okunyita naija kunyita tinyina shubi, kyonkai ndamutonganaho omu mabonage.

¹⁶ Nimanya okwo omufakare atakubona Ruhanga, ekyo nikyo kirandokora!

¹⁷ Muhulire kurungi ebyo ndikugamba, ebigambo byange bibatahe omu matwi.

¹⁸ Mulebe ninyija kutongana agange, nimanya okwo ndi murungi.

¹⁹ N'ohai ow'okuntoijera, kayakuzoka nyesiza, nfa.

²⁰ Singa ontunge ebintu bibili byonkai, aho ndaba ntakikwesheleka.

²¹ Waitu lekera kumbonabonyia, ndekere kukutina muno.

²² Aho banyete ndayetabuka, anga ngambe, osinge omporore.

²³ Entambara zange zingahai n'amafu gange gangahai? Singa obimmanyise.

²⁴ Kiki nka nonyesheleka, wantwaza oti ndi mubisha wawe?

²⁵ Notinisa akababi akalikuhutwa omuyaga, nobinga omushunga?

²⁶ Nimbona nompandikaho emishango esikiire, nombonabonyia kuntura entambara z'obusigazi bwange.

²⁷ Wankoma empingo omu maguru, ebyo ndikukora byona ontaireho amaisho, mbali ndi wankomeraho ntasimbukaho.

²⁸ Omuntu ahwaho nk'ekintu ekijunzire, ashusha omwendo oguliirwe enyenje.”