Yobu 12 - Ebibulia 2001

Yobu

¹ Aho Yobu ahorora ati,

² “Obutalengeshanyia muli bantu, n'obumanyi bwanyu mulifa nabwo.

³ Kyonkai nanye nyina amagezi nka inywe, timulikunkira. Ebyab'ebi atalikubimanya n'ohai?

⁴ Inye banywanyi bange nibanshekelera, inye ayatakiire Ruhanga akamporora, inye omugorogoki enzira kamogo nibanshekelera.

⁵ Omuntu agumire nagaya agweleirwe enaku, nimwita omufu atali wanyu.

⁶ Abashuga n'abatatina Ruhanga balige, amani gabo niwe ruhanga wabo.

⁷ Baza ebigunju bikwegese, baza ebinyonyi bikugambire.

⁸ Baza ensi ekwegese, n'enfuru z'enyanja zikugambire.

⁹ Omuli ebi byona n'ohai atalikumanya okwo ebi byakozirwe obushobora bw'Omukama?

¹⁰ Ebiina oburora byona bili omu bushoborabwe, kwakwo n'oburora bw'abantu bona.

¹¹ Okwo orulimi ruroza ekyakulya, nikwo n'amatwi gamanya ekirungi n'ekibi.

¹² Obumanyi bugirwa abagurusi, n'amagezi gagirwa abantu bakuru.

¹³ Obumanyi n'amani bigirwa Ruhanga, niwe agira amagezi n'entegeka.

¹⁴ K'akambura taliho yakushuba kwombeka, k'afunga omuntu taliho wa kumutaishura.

¹⁵ K'atanga amaizi goma, k'agataishura gabunda ensi.

¹⁶ Amani n'obumanyi bigirwa wenene, kibeiya na kibeihwa nabo ba wenene.

¹⁷ Abatwazi abaka obumanyi, n'abaramuzi abaka amagezi.

¹⁸ Abakama abaihya aha nketo, ashuba abafunga.

¹⁹ Abakuhani abaka ekitinwa, n'aba'amani abatera aha mutwe.

²⁰ Abashongore ababuza ebigambo, n'abagurusi abaka amagezi.

²¹ Ashonaza abakama, n'aba'amani abafutika.

²² Mbali hali omwilima lindindi, ajwisaho omushana.

²³ Amahanga agaha ekitinwa ashuba agasilikya, agahanguhya ashuba agafunfuniza.

²⁴ Abakama b'amahanga abaka amagezi, ashuba abajenjeza omw'irungu elitaina muhanda.

²⁵ Babumbwiga omu mwilima, basiraituka nk'omutamiire.”