Yeremia 9 - Ebibulia 2001

Okujanga kwa aba Yuda

¹ Omutwe gwange nigube gwaba niguba iziba ly'amaizi, amaisho gange gakaba nchuro etabukwamu amalira, nkalira kiro na mushana, nkachulira Abaisiraeli batahi bange abo baisire!

² Nimbe naba nyina eikumbi nk'ely'abagenzi omw'irungu, nkasigaho Abaisiraeli batahi bange nkabagya harai! Bona nsiyani, kisimba ky'engobya.

³ Endimi bazikondeka nk'obuta, amazima tigakili munsi, ebishuba ensi byagikilize amani. Omukama nagamba ati, “Kuba obufu nibabutungika ahali bunu, kandi tibalikunyetaho.

⁴ Buli muntu ayelinde mutahiwe, kandi atesiga murumuna, kuba buli munyaruganda ngobya, na buli muntu nagenda nageya mutahiwe.

⁵ Buli omoi nabeiya mutahiwe, kandi taliho alikugamba mazima. Bamanyiire okugamba ebishuba; nibafakara kandi tibaina gechuza.

⁶ Nibazigilira okushasa banu, n'ebishuba nibabizigilira. Nanye nibanga kyere okunyetaho. Inye Omukama n'inye ndikugamba.”

⁷ Ah'arw'ekyo Omukama w'amahe nagamba ati, “Abantu bange ninyija kubajuguta nkabalenga amagezi, kuba ekindi eky'okubakolera tikiliho.

⁸ Endimi zabo nizishusha omwambi ogulikwitiraho, ndimi z'ebishuba. Buli muntu naha mutahiwe akalimi karungi, kyonkai aha mutima nagonza kumunaga omu kabi.

⁹ Ninyija kubabonabonyia nkabatura ebigiro ebi; eihanga nk'eli ndyehoroze. Inye Omukama n'inye ndikugamba.”

¹⁰ Aho nirwo inye nagambire nti, “Nchulire amabanga, nchulire n'amalisizo g'omw'irungu. Kuba bihindukire ishwa, tibikirabwamu muntu, n'ente tizikijugiramu. Ebinyonyi n'enyamaishwa bisingirwe byagenda.”

¹¹ Ahanyuma Omukama ati, “Yerusalemu ninyija kugisilikya ekaba ntumiro y'amatongo, eturwe emiha. N'ebigo bya Yuda mbinukise omushaka, tibiliturwamu bantu.”

¹² Nanye aho mbaza Omukama nti, “Ni muntuki omumanyi atyo ow'okushobokerwa ekigambo eki? N'ohai ow'Omukama akigambire kukigamba? Kubaki ensi esilikire ekaba irungu, hakabura ow'okugirabamu?”

¹³ Omukama nawe ati, “N'aha rw'okuba balekeire kukwata Amateka gange ago nabahaire, tibahulira byo ndikubagambira n'okubikora tibabikora,

¹⁴ bagira eijegu, bakora ebyo bonene balikwenda, bafukamira ebihuuku bya Baali nk'okwo baish'enkurubo babegesize.

¹⁵ Aha rw'ekyo inye, Omukama w'amahe, Ruhanga wa Isiraeli, ndabalisa ebyakulya ebilikushalira, mbanyoise amaizi againamu esumu.

¹⁶ Mbaanaganage omu mahanga ago batamanya, mara ago na baish'enkurubo batamanyaga, nshube mbahondeze embanda kuhika orwo ndibamaraho.”

Aba Yerusalemu nibataka kujunwa

¹⁷ Omukama w'amahe nagamba ati, “Mwetekatekere ebilikwija, mwete n'abakazi ababuya b'okuchura baije.”

¹⁸ Abantu nabo bahorora bati, “Barahuke baije batuchulire, tulire amaizi gaturuge omu maisho.

¹⁹ Kuba n'omuli Sioni nibachura bati, ‘Twafa tutai! Twahemukira kimoi. Twasigaho ensi yaitu, n'amaju gaitu bagakambura.’ ”

²⁰ Nanye aho nabagambira nti, “Inywe bakazi, muhulire eky'Omukama alikugamba, kibatahe omu matwi. Bahara banyu mubegese okuchura, buli omoi ayegese mutahiwe okutongya.

²¹ Kuba orufu rwarabire omu madirisha gaitu, rwatahire omu bikaare byaitu, kutwitira abaana omu mbarabara, n'abasigazi kubaitira nyakabuga.”

²² Ahanyuma Omukama nawe angambira ati, “Obagambiire oti, ‘Emitumbi y'abantu erarambira omw'ishwa, eshushe amasha, eshushe emiganda y'engano eyo omugesi asiga enyuma, ekaburwa ow'okugishomboza.’ ”

Obumanyi nyakabara kuba kutina Omukama

²³ Mbwenu Omukama nagamba ati, “Omumanyi aleke kwebona obumanyibwe, n'ow'amani atesiga manige. Omutungi eitungalye atalyesiga.

²⁴ Ow'okwesiga ayesige eki: Amanye mara ashobokerwe okwo n'inye mba Mukama ow'ekisha, ow'amazima n'obugorogoki omu nsi; manya ebi nibyo ngonza. Inye, Omukama n'inye ndikugamba.”

²⁵ Omukama nagamba ati, “Amakiro galija orwo ndibonabonyia abatahiriirwe batatahiriirwe.

²⁶ Aba Misiri, aba Yuda, aba Edomu, aba Amoni, aba Moabu, n'abatura omw'irungu bona abasharamemba, kuba amahanga aga gona tigatahiriirwe, kandi n'ab'oruganda rwa Isiraeli bona tibatahiriirwe mu mutima.”