Yeremia 7 - Ebibulia 2001

Yeremia naranga omuli Rwensinga

¹ Omukama akagambira Yeremia ati,

² “Oyemelere omu kihigi kya Rwensinga y'Omukama, ogambe ekigambo eki oti, Inywe bantu ba Yuda, inywena abaraba omu bihigi ebi kufukamira Omukama, muhulire ekyo alikugamba.

³ Omukama w'amahe, Ruhanga wa Isiraeli nagamba ati: Mweshubeho omu bikorwa n'omu bigiro byanyu, aho nanye ndabaleka muture omu nsi egi.

⁴ Muleke kwebeiyabeiya nimugamba muti: ‘Egi ni Rwensinga y'Omukama! Rwensinga y'Omukama! Rwensinga y'Omukama!’ ”

⁵ “Kamurayeshubahokwo omu bikorwa n'omu bigiro byanyu, mukakolerangana amazima kwokwo kwo,

⁶ mutashasize banyamahanga, n'enfuuzi, n'entumbwa, mutaisire bantu bataina ntambara omu nsi egi, kufukamira baruhanga abandi mukeita,

⁷ aho ndabaleka muture omu nsi egi, eyo eirai naheleire kimoi bashwenkurw'inywe.”

⁸ “Leba nimwebeiya kushai.

⁹ Mwikare nimwiba, nimwita abantu, nimusiyana, nimunahira ebishuba, nimwoteza Baali obunuma, nimufukamira baruhanga abandi abo mutamanyaga;

¹⁰ mushube mwije munyemelere omu maisho omuli Rwensinga egi elikwetelerwa ahali inye, nimugira muti, ‘Tulige!’ Kandi okwo nimuzigilira kukora amahano ago gona?

¹¹ Rwensinga egi elikwetelerwa ahali inye, inywe nimubona ehindukire mpako y'abashuma? Naboine okwo nikwo mulikugibona. Alikugamba n'inye Omukama.

¹² Iroko mugye Shilo mbali naturaga obubere, mubone okwo nahagizire aha rw'enshonga y'amafu g'Abaisiraeli, abantu bange.

¹³ Mbwenu aho inye Omukama, ningamba nti: Orwo mukozire amafu aga gona, nkaikara nimbagambira mutahuliire, nabeta timwayetaba,

¹⁴ okwo nagizire Shilo nikwo ndagira na Rwensinga elikwetelerwa ahali inye, eyo mwesiga, hamoi n'ensi eyo nahaire bashwenkuru nainywe.

¹⁵ Ninyija kubachwa nk'okwo nachwire abanyaruganda banyu bona, baijukuru ba Efraimu.”

Omuhuliro ahali Ruhanga nigukira ebitambo

¹⁶ “Mbwenu iwe Yeremia, abantu aba otabashabira. Otabatakilira anga kubashabira, mara otakuntagiliza aha rw'okuba tindikwija kukuhulira.

¹⁷ Ebyo balikukolera omu bigo bya Yuda, na Yerusalemu omu mbarabara, tolikubibona?

¹⁸ Abaana nibashenya enkwi, baishebo nibahemba omuliro, abakazi nibakanda engano kuchumbira ruhanga omukazi owo balikweta Mukama w'Eiguru obukeki, kandi nibahongera baruhanga abandi ebihongo by'okunywa, nibantamisa.

¹⁹ Mbwenu inye Omukama kambaze: Nibashasa inye? Manya nibeshasa bonene, nibehemura.

²⁰ Aha rw'ekyo nikyo inye Omukama ndikugambira nti: Ninyija kutamwa nkanigara, nkasilikya Rwensinga egi, n'abantu, n'ebigunju, n'emiti, n'emyaka. Ninyija kunigara nkashusha omuliro ogw'omuntu atakuraza.”

²¹ Omukama w'amahe, Ruhanga wa Isiraeli nagamba ati, “Ebitambo byanyu ebyo mulikutamba, mubigelekeho n'ebihongo by'okwokibwa, mulye enyama egyo.

²² Kuba kiro ekyo naihya bashwenkurw'inywe Misiri tinabagambiire kigambo anga kugira kyonabaragira ekikwete aha bihongo by'okwokibwa anga aha bitambo.

²³ Kyonkai nkabaha omuhango ogu, nti, ‘Ebyo ndagamba mubikwate, nanye ndaba Ruhanga wanyu, kandi inywe muraba bantu bange. Buli kimoi ekyo ndikubaragira mukikwate, nirwo muligira emilembe.’

²⁴ Nawe bonene bakaburwa omuhuliro, n'amatwi tibagategire. Bakaba bantu babi, bakora ebyo balikwenda, bagira eijegu; bashuba enyuma, tibagiire mu maisho.

²⁵ Kwema kiro ekyo bashwenkurw'inywe barugire Misiri kugoba mambwenu, ntura nimbatwekera abairu bange bona abarangi, buli kiro.

²⁶ Kyonkai bonene bakagumanganisa emitima; tibampulira, tibagira matwi. Nangu kandi babi kushaga baish'enkurubo.”

²⁷ “Kityo orabagambira ebigambo ebi byona, kyonkai tibalikwija kukuhuliliza. Orabeta, kyonkai tibakwetabe.

²⁸ Orabagambira oti, ‘Eli ihanga elitahulira byo Mukama Ruhanga wabo abagambira, kyonkai tibakunda kuhanwa. Amazima gahoire, tibakigamba mazima.’ ”

Ruhanga nataisa aba Yuda okutamba abantu

²⁹ “Eishoke lyawe olishare olinage, ogye aha nshozi eiguru ochure, kuba omuzarwa ogu Omukama agutamirwe, yagwihyamu emikono, yaguhwamu.”

³⁰ “Enshonga Omukama nagamba okwo aba Yuda bamugokeire. Bakwete ebihuuku byabo babiteka omuli Rwensingaye eyo betelera aha ibaralye, bagihagaza.

³¹ Bombekire alutare omu Ruhanga rwa Benihinomu bagyeta Tofeti kuba niyo batambiraho batabani babo na bahara babo ebitambo, kubokya. Inye eki tinakibaragiire, kandi n'omu mutwe kikaba kitandimu.

³² Aha rw'ekyo Omukama nagamba okwo ebiro bilija, orwo altare egyo etalyetwa rundi Tofeti n'Oruhanga rwa Benihinoamu tirulyetwa ibara elyo, shana rulyetwa Ruhanga rw'Elyasiro. Omuli Tofeti nimwo barazikaga abafu, kuba ahandi obuziiko buliba bwahoireyo.

³³ Kandi emitumbi y'abafu aba eralibwaga ebinyonyi n'ebigunju; taliho muntu alibituntumura.

³⁴ Omu bigo bya Yuda n'omu mbarabara za Yerusalemu ndichwamu ebyera n'amashemelerwa, kishwerwa n'omugore tibalihulirwa; enshonga ensi yona eliba matongo.”