Yeremia 6 - Ebibulia 2001

Yerusalemu nezingorwa ababisha

¹ Inywe Babenjamini mwiruke, muruge Yerusalemu mutafa. Mweme Tekoa mutere enzamba. Musimbe ebendera omuli Betihakeremu. Kuba orushengo rwayema Bikara rwasheba, ensi yaija kusilika muno.

² Ekigo kya Sioni kiba kirungi mara nkaba nkilezire n'elyana, kyonkai mbwenu naija kukisilikya.

³ Abakama nibaija kukitabalira n'amahe gabo, basimbe amahema obuzingora bwa Sioni, buli omoi asisiire mbali arayenda.

⁴ Baragamba bati, “Twetekateke kutabalira Sioni! Twetekateke! Tugitabalire omw'ihangwe!” Kyonkai ahanyuma nibaija kugira bati, “Eizoba lyalenga, lyatobera, lyabaire bwaigoro, n'ebinyumanyumi byaraihize.

⁵ Tutabare omu kiro n'eboma zayo tuzikambure.”

⁶ Aha rw'enshonga Omukama w'amahe nagamba ati, “Muteme emiti ya Yerusalemu, mutere n'ensinde ez'okwemaho kugibunda. Eki kigo ekiragiirwe kubona ekibonabonyio, abantu bamwo tibaina kyobakora shana okushasa banu.

⁷ Nk'okwo eiziba liikara nilitabukwamu amaizi, nikwo n'abantu b'omu kigo eki baikara nibakora kubi. Tinyosha kuhuliramu ndwano na kaitangano; nyikara nimbonamu abarwaire n'emputa.

⁸ Ohanwe ohulire iwe Yerusalemu, ntakakulekeire nkakuhindura nsi y'amatongo, etaturwamu bantu.”

Isiraeli omushengi

⁹ Omukama w'amahe nagamba ati, “Oshomboze Abaisiraeli abasigaireho, nk'okwo omuntu akenguza omu mizabibu akamaliramu kimoi. Ogaruke omu matagi g'omuzabibu okenguze, nk'okwo omunogi w'ezabibu agira.”

¹⁰ Aho nanye mporora nti, “Mbwenu ngambire bahai kubahana bakahulira? Leba bafire amatwi, tibaina kuhulira. Ebyo Omukama alikugamba nibabijamya, tibalikubishemelerwa.

¹¹ Mukama wange, okw'olikubatamwa nikwo nanye ndikubatamwa; nayegumisiliza byayanga.” Aho Omukama angambira ati, “Abaana omu kigo obagambire obatikireho, na mbali abasigazi baraba beshombokeize. Kandi abashaija n'abakazi babo, abagurusi nangu n'ababondabonzire, nibaija kukwatwa.”

¹² Omukama nagamba ati, “Amaju gabo garaba g'abandi, kityo n'endimiro zabo n'abakazi babo. Kuba abantu b'ensi egyo ninyija kubabonabonyia.

¹³ Bonene abo, buli omoi, omuhango n'omuke, nibataho amani gangi muno kutungira omu mihanda etali ya mazima. Abarangi n'abakuhani, bona bali kumoi.

¹⁴ Nibabeiyabeiya abantu bange bati, ‘Mugire emilembe, mugire emilembe,’ okwo emilembe etaliho.

¹⁵ Isi kabahemukire, bakakwatwa enshoni? Chei, tibakwetwe nshoni n'ak'okuziza; n'okubwerabwera kwonkai, nangu! Aha rw'ekyo baligwa egangali nk'okwo abandi baragwire. Kiro ekyo ndibaha ekibonabonyio, balifa.” Nikwo Omukama alikugamba.

Isiraeli neyanga kukora ebyo Ruhanga alikwenda

¹⁶ Omukama nagamba ati, “Mwemelere aha mihanda etana mulebe, mubaze emihanda ey'eirai na mbali omuhanda ogurungi guli. Ogwo mube nigwo muraba, mubone kugira emilembe. Kyonkai bonene bakahorora bati, ‘Omuhanda ogwo titugurabe.’

¹⁷ Nkabateraho abalinzi, abalinzi abo nabagambira nti, ‘Murahuliliza enzamba!’ Ndi bonene bati, ‘Titugihulilize.’

¹⁸ Mbwenu inywe mahanga muhulire; kandi iwe nteko omanye ebyaija kuba aha mahanga ago.

¹⁹ Iwe nsi naiwe hulira. Leba abantu aba naija kubateza ekibundo, mbature amafu gabo, enshonga ebyo mbagambira tibabyekomya, n'Amateka gange nibagashaima.

²⁰ Obunuma bwa Sheba mundetera bwaki? Isi ebirungo by'omu mahanga? Nangu n'ebihongo byanyu eby'okwokibwa tindikubikunda. Kandi ebitambo byanyu tibilikunshemelera.”

²¹ Aha rw'ekyo Omukama nagamba ati, “Abantu aba ndabatega eby'okubasitaza babisitareho; abaana bafe na baishebo, omuntu afe na mutahiwe.”

Omubisha aliruga bikara

²² Omukama nagamba ati, “Eihanga liliruga omu nsi ya bikara, eihanga lihango nilibumbura, niliruga harai muno.

²³ Abantu b'eihanga elyo bakwete amata n'amachumu, nibagwara mara tibaina buganyizi, nibahinda nk'enyanja. Bakuubire efarasi, bekomire nk'abaisherukare kukutera iwe kigo kya Sioni!”

²⁴ Abantu ba Yerusalemu nibagamba bati, “Amakuru twagahuliire aha ihanga elyo, emikono yaturagaire. Tuli omu kamazi, obushasi twina obw'omukazi alikurumwa.

²⁵ Mutaturuka kugya mu ndimiro, nangu n'okugenda omu mihanda, kuba ababisha bakwete embanda, ensi etangirwe buli rubaju.

²⁶ Iwe kigo ky'eihanga lyange oyekome orugunia, oyezilinge omw'ijwi, ochure nk'alikuchulira omwana omoi, ochure eyobobo, kuba omubisha naija kutugwaho kibandagara.”

²⁷ Omukama ashubire yagamba ati, “Iwe Yeremia, nkutaireho k'ojuguta eihanga lyange nk'okwo bajuguta ekyoma, oshobore kumanya kurungi ebyo balikukora.

²⁸ Nibashengesa eijegu, eby'okubeiyelera abandi nibyo balimu. Nibagumangana nk'omulinga n'ekyoma, bona nibakora kubi.

²⁹ Emijuba neyokya mokomoko, kandi omuliro nigwagiliza eishasi. Kyonkai okujuguta okwo kwa bushai, kuba abafakare tibalikunyiguka.

³⁰ Abantu nibabeta byonge by'efeza, kuba Omukama abaihiremu emikono.”