Yeremia 51 - Ebibulia 2001

Okwo Omukama alirwanisa Babiloni

¹ Omukama nagamba ati, “Babiloni n'abantu bamwo ndabachokeza ow'okubasilikya, abatabalire.

² Nshube ensi egyo ngitwekere ab'okugyera bagyere, ensi egyo bagyeze munono, orwo baragyema embaju bakagibunda kiro ekyo eraboneraho enaku ezo.

³ Abaisherukare bamwo mutabaha kashango kakurasha mwambi, anga kujwara ngabo za byoma. Abasigazi mutabaleka. Eihe lyayo mulisilikye lyona!

⁴ Abakalidayo baitwe barambiire omu nsi yabo, n'emputa zigwe omu bigo byabo omu mbarabara.

⁵ Aha rw'okuba Isiraeli na Yuda, Ruhanga wabo, Omukama w'amahe takabaanagiranaga. Kalidea eina omushango guhango, kuba ekafakalira Omutakatifu wa Isiraeli.

⁶ Muruge Babiloni mwiruke, buli omoi ayerokore! Muleke kugwa omu kibonabonyio kyayo, orw'okuba aka niko kanya ako Omukama kwehora ababishabe, eki kibonabonyio nakiha Babiloni.

⁷ Babiloni yashushaga ekikompe ky'ezahabu omu mikono y'Omukama, nikyo kikompe ekyatamiizaga ensi yona. Orw'ekyo amahanga gakanywa edivai ya Babiloni gararuka.

⁸ Babiloni egwire etaraliire yahendeka, mugichulire, Mugitwalire omubazi mugitambire obushasi, rundi yakukira.

⁹ Abanyamahanga abaturaga omwo bakagira bati, ‘Tukalenga kutambira Babiloni nawe tiyakizire. Tugihwemu tugende, buli omoi ashube owabo. Ruhanga agibonabonyize n'obushoborabwe bwona, yagisilikiza kimoi.’

¹⁰ Omukama aturamulire; mbwenu mwije tugambire Sioni ekyo Omukama Ruhanga waitu akozire.

¹¹ Muhyore emyambi! Mukwate engabo! Omukama achokeize abakama ba Mede, kuba aina omugendelero gw'okusilikya Babiloni. Omukama nagonza kwehora, kweholera Rwensingaye.

¹² Musimbe ebendera mutere ebigo bya Babiloni, muteho abalinzi, mulinde muno; mutekateke n'ab'okuzimbira; enshonga ekyo Omukama yagambire aha Bakalidayo akigendeleirekwo yakikora.

¹³ Inywe abatura bwatana aha miiga mihango, ab'eitunga lingi, akanya kanyu kagoba, timukinayo burora.

¹⁴ Omukama w'amahe ayerahiire ati, Nkugambire amazima iwe Babiloni, ninyija kukwijuzamu abantu bangi okw'obona enzige, bamare kukusinga bakutelere orusharo.”

Oruhoya rw'okusingiza Ruhanga

¹⁵ “Omukama ensi akagitonza obushoborabwe, obumanyibwe nibwo bwagigumisize yona. N'eiguru akalitonza amagezige.

¹⁶ K'ahanga, amaizi omw'iguru gahinda; kandi oruho n'iwe arwimukya omu nsi yona. Endabyo ezishura enjura ziruga ahali wenene, n'omuyaga n'iwe agwihya mbali agubiikire.

¹⁷ Buli muntu aba mufera atagira magezi, kandi buli muhesi w'ezahabu ebihuukubye bimushonaza; kuba ebishushani eby'akora biba by'ebishuba, tibigira mwoyo.

¹⁸ Tibigira mugasho, biba bintu bya katozi. K'obukiro bwabyo bw'okubona ekibonabonyio bulihika, bilihwaho.

¹⁹ Ruhanga wa Yakobo talikushusha bihuuku ebi, wenene n'iwe yatonzire ebintu byona. Kandi akaronka Isiraeli kuba ihangalye, eibaralye ni Mukama w'amahe.”

Enyondo y'Omukama

²⁰ Omukama nagamba ati, “Babiloni oba nyondo yange, kikwato kyange ky'endashana. Nkakuteza amahanga n'engoma z'abakama,

²¹ wasinjagulikya efarasi n'abazikuubire, hamoi n'amagali n'ababugi bago.

²² Okaita abashaija n'abakazi, waita abakuru n'abato, abojo n'abaisiki wabaita.

²³ Okaita abashumba n'amahyo gabo, abalimisafarasi n'efarasi zabo tiwabasigire ruguru, waita abagavana n'abakuru b'amahe.”

Ekibonabonyio kya Babiloni

²⁴ Omukama nagamba ati, “Ninyija kubonabonyia Babiloni n'abantu bamwo bona Abakalidayo mulebire, aha rw'amahano ago bakozire omuli Sioni.

²⁵ Iwe Babiloni, noshusha eibanga elita ensi yona. Kyonkai inye ninyija kukuha ekibonabonyio, nkweme omu katwetwe k'amabare nkumareho, nkwokye.

²⁶ Toliihwamu ibare na limoi lya kwombekesa pembe, n'eibare ly'okwombeka omusingi tililiruga muli iwe. Shana ebiro byona olisigara amatongo. Alikugamba n'inye Omukama.

²⁷ Musimbe ebendera y'endashana omw'itaka, mutere enzamba amahanga gahulire, mugatekateke kutabalira Babiloni; mwete abakama ba Ararati, Mini na Ashikenazi batabaliire ensi egyo, muteho omukuru w'amahe agirashanise, n'efarasi mulete ezilikushusha omujumbi gw'enzige.

²⁸ Mutekateke amahanga gatabalire Babiloni. Mutume abakama ba Mede, n'abagavana babo n'abami na buli nsi eraba eli omu butware bwabo.

²⁹ Ensi nejugumba, obushasi nibugiyugumisa, aha rw'ebyo Omukama alikwenda kukora Babiloni, kugisiga amatongo obuzira wa kugituramu.

³⁰ Abaisherukare ba Babiloni balekeire kurwana, tibakiruga mu bigo bya boma. Amani gabahoire, bashusire abakazi. Emihingo ya Babiloni yahendekire, amani gakwetwe omuliro.

³¹ Entumwa neiruka ehondeire ntahi yayo, kugambira omukama wa Babiloni okwo ekigokye kyakwatwa embaju zona.

³² Ebyambu byakwetwe, n'ebigo nibihya, kandi abaisherukare bahahainwe emyoyo.

³³ Abakalidayo barashusha ekyano ekitelerwaho engano, orwo Babiloni eraba nekandagilirwa omubisha. Akanya kasigara kake Babiloni kusilika. Omukama w'amahe, Ruhanga wa Isiraeli n'iwe alikugamba.

³⁴ Nebukadineza omukama wa Babiloni yatukora akalimo, yatubumbulikya, yatushusa emuga esigaire bushai. Yatumira okw'obona ekinyamugenge. Ebintu atwete okwo alikwenda, ebisigaire yabinaga.

³⁵ Aba Babiloni bagamba bati, ‘Babiloni nekaterwe enaku ezateire inye n'abanyaruganda bange.’ N'aba Yerusalemu bagiire bati, ‘AbaBabiloni nibakarumbirwe abaitu abo baisire.’ ”

Omukama arajuna Isiraeli

³⁶ Orw'ekyo Omukama nagamba ati, “Leba, ndabaramulira mara mbeholere, nyomese enyanja yayo n'enchuro zayo.

³⁷ Babiloni eliba ntuumiro y'amatongo, ejogwe emiha, abantu bagitine bagishoberwe, kandi teliturwa muntu.

³⁸ Abakalidayo balisinda hamoi nk'entare; barurume nk'ebyana byazo.

³⁹ Orwo baliba bakyanigaire ndibakolera obugenyi mbatamiize, nangu balemwe basheke bakwenkemuke, bashube baanagire ebiro byona obutasisimuka. Alikugamba n'inye Omukama.

⁴⁰ Ndibasongora okwo basongora entaama omw'ibagiro, bashushe empaya z'entaama n'empaya paya.”

Amaheleruka ga Babiloni

⁴¹ Omukama nagamba ati, “Ekigo kya Babiloni ekyo ensi yona yasingizaga, mbwenu bakikwata! Babiloni yatinisa etai amahanga!

⁴² Enyanja yamira Babiloni, yagimiza amayengo agalikuhinda.

⁴³ Ebigo byayo nibitinisa, ehindukire irungu, ensi ey'omushana gungi, ensi etaturwamu muntu n'omoi, ey'abantu bataguturanamu.

⁴⁴ Na Beli, ruhanga wa Babiloni, ndamubonabonyia, eby'atura nalya mbimutanakye, n'amahanga garaba gatakimufukamira. N'ebigo bya Babiloni bikumbagaire!

⁴⁵ Iwe ihanga lyange oruge Babiloni, buli muntu arokore obwe, ahunge aha kiniga kingi ky'Omukama!

⁴⁶ Muleke kuhahanwa emitima, kandi amakuru ago mulikuhulira omu nsi gatabatinisa. Buli mwaka gugira makuru gagwo, nibagamba omu nsi okwo halimu akaitangano, n'omukama narashana na mukama ondi.

⁴⁷ Aha rw'ekyo obukiro bulija, orwo ndibonabonyia ebihuuku bya Babiloni; ensi egyo elijumuka yona, n'abantu bamwo abalitwa bona balirambira omwo.

⁴⁸ Aho eiguru n'ensi n'ebibilimu byona bilyeshanda nibikoleza Babiloni, aha rw'okuba aliyo abalikwija kwita Abakalidayo, baruge bikara. Alikugamba n'inye Omukama.

⁴⁹ Babiloni neragirwa esisikare, aha rw'Abaisiraeli abo yaisire; kandi ekaita n'abantu bangi omu nsi zona.”

Ruhanga naragiraho Abaisiraeli omuli Babiloni

⁵⁰ “Inywe abahonokire aha mbanda, mugende, mutemelera! Kandi n'orwo muraba muli harai mwemeyo mwijuke Omukama, na Yerusalemu mutagyebwa.

⁵¹ Nimugamba muti, ‘Tushonaire, kuba twahuliire okwo balikutujuma, aha maisho nitubwerabwera, orwo abanyamahanga batahire omuli Rwensinga y'Omukama, bagoba aha myanya mitakatifu.’

⁵² Orw'ekyo ebiro bilija, mbonabonyie ebihuuku bya Babiloni, emputa zona ezili omu nsi egyo zihiliite. Alikugamba n'inye Omukama.

⁵³ N'orwo Babiloni elimuka ekakanga aha iguru, nangu ekezingoza eboma ey'amaani, tindiburwa kusindika ba kugisilikya. Alikugamba n'inye Omukama.

⁵⁴ Muhulire abemire Babiloni nibachura! Abakalidayo bamwo nibachura okwo bafa bakasisikara!

⁵⁵ Enshonga Omukama, Babiloni yagihindura matongo, yagisiza n'orwo eiraka lyayo ligira amani. Ababisha nibahinda nk'enyanja engundu, amaraka gabo nigahinda.

⁵⁶ Babiloni omubisha yagibunda; abaisherukare bayo bakwetwe, n'amata gabo gahendahenzirwe; Omukama aba Ruhanga abonabonyia, talikwija kubura kubonabonyia.

⁵⁷ Abatwazi ba Babiloni n'abamanyi bayo ndabatamiiza, ntamiize n'abagavana bayo, n'abakuru b'eihe n'abaisherukare bayo. Nibaija kunagilira kimoi kimoi obutaimuka. Alikugamba n'inye Omukama, ayetwa Mukama w'amahe.

⁵⁸ Ebigo bihango bya Babiloni nibija kusisikara bikagoba aha itaka, n'ebihigi byayo ebiraibirai babiteho omuliro. Eby'amahanga gachwazikanire bigafere bushai, ebyo gahendekeire byokibwe omuliro. Alikugamba n'inye Omukama w'amahe.”

Ebyo Yeremia yaragiire Seraya nagya Babiloni

⁵⁹ Omukama Zedekia akaba aina omusigirewe omukuru ow'omu kikaare, nayetwa Seraya mutabani wa Neria, Neria eya Mahaseya. Nikwo bagenzire hamoi Babiloni, omu mwaka gwa kanai Zedekia omukama wa Yuda aliire engoma. Seraya ogwo, nyina ebyo namuragiire.

⁶⁰ Nkahandika omu kitabo enaku zona ezabaire nizija kugwera Babiloni. N'ebindi byona ebyabaire bikwete ahali Babiloni nkabihandika.

⁶¹ Seraya nkamugambira nti, “Orwo oragoba Babiloni, obashomere ebigambo ebi byona, oti,

⁶² ‘Waitu Mukama, ogambire okwo ensi egi olikwija kugisilikya, okwo etaturwemu kantu, yaba muntu anga nyamaishwa, ehinduke matongo ebiro byona.’

⁶³ K'oramara kubashomera ekitabo eki, okikomeho eibare, okitokye omu Mwiga gwa Efurati,

⁶⁴ ogambe oti, ‘Oku nikwo Babiloni eratoka, obutatokorogoka rundi, aha rw'enshonga y'enaku ezo ndikwija kugiteza.’ ” Aha niho ebigambo bya Yeremia bilikugarukira.