Yeremia 5 - Ebibulia 2001

Obufu bwa Yerusalemu

¹ Mwiruke nimutera oku n'oku omu mbarabara za Yerusalemu, mulebe mwekomye! Mulebalebe omu materaniro g'embarabara zayo, mulebe nka murabonayo omuntu n'omoi omugorogoki alikukora eby'amazima nyije nganyire Sioni.

² N'orwo baraba nibarahira obuso bw'Omukama nibarahira bushai.

³ Waitu Mukama, iwe tobona mazima? Okabatera, kyonkai tibahuliire bushasi. Okabaita wabamaraho, kyonkai bayanga kuhanwa. Bagira eijegu, bayanga kwechuza.

⁴ Ahanyuma nirwo nanye nagambire nti, “Kaziro abantu aba baanaku, tibaina magezi; tibalikumanya byo Omukama wabo alikwenda, tibalikumanya Mateka ga Ruhanga wabo.

⁵ Kangende aha bakuru mbe nibo ngambira. Kuba nibamanya ebyo Mukama wabo ayenda, Amateka ga Ruhanga wabo nibagamanya.” Kyonkai bambi, bona kumoi! Bakashenga Mukama wabo bayanga kumuhulira.

⁶ Nikyo entare elirugira omu kibira ekabaita, n'omushega nikyo gulirugira omw'irungu gukabaita gukabamaraho. Kandi engoi amaisho egataire aha bigo byabo. Buli muntu arata kuruga omu bigo ebyo eramutagatagura, enshonga amafu gabo gangi, kandi baikara nibashenga muno Ruhanga wabo.

⁷ “Nakukuganyira ntai? Abaana bawe banshengire, nibarahira obuso bwa baruhanga abataliho. Orwo nabagabiire bakaiguta, bagya omu busiyani, bahwera omu maju g'abamalaya.

⁸ Bakaba nibashusha enumi z'efarasi ezigabiirwege, buli muntu yayegomba muka mutahiwe.

⁹ Ntakubonabonyia aha rw'amafu aga? Omukama nabaza. Eihanga nk'eli ntalyehoroza?”

¹⁰ “Mwinugukire omu mizabibu ya Isiraeli mugite, kyonkai mutagimaliraho kimoi. Mugiteme amatagi aha rw'okuba ti ya Mukama.

¹¹ Aba Isiraeli na Yuda bangokeire muno. Inye, Omukama, n'inye ndikugamba.

¹² Bagambire kubi aha Mukama, bashuba bati, ‘Taina kyo arakora; titube kantu, titulikwija kugwa aha mbanda, handiki kuterwa ifa.

¹³ Abarangi nibagamba obusha, ebigambo ebyo balikugamba ti bya Mukama. Kityo babe nibo bagwa aha mbanda, n'eifa litere bonene.’ ”

¹⁴ Aha rw'ekyo Omukama Ruhanga w'amahe nagamba ati, “Orwo bagambire batyo, leba ebigambo byange ebyo oragamba ndabishusa omuliro; abantu aba bonene mbahindure nkwi, omuliro gubokye.

¹⁵ Kandi inywe Baisiraeli, nabasindikira eihanga ly'aharai. Inye, Omukama, n'inye nakigamba. Eihanga elyo ly'amani mara lya karai, ihanga elyo mutalikumanya rulimi rwalyo, n'ebyo balikugamba timwina kubishobokerwa.

¹⁶ Abarasi babo bona ab'emyambi baisherukare abalikwita bataina mama.

¹⁷ Ebyo mugesire byona n'ebyakulya byanyu barabilya babimareho. Batabani banyu na bahara banyu babaite, baite n'amahyo ganyu g'entaama n'ag'ente, hamoi n'emizabibu n'emitini. Ebigo byanyu eby'eboma ebyo mwesiga amahe gabo garabisilikya.”

¹⁸ Kandi Omukama nagamba okwo omu biro ebyo tabasilikize kimoi.

¹⁹ K'Abaisiraeli balibaza ekyo Omukama Ruhanga wabo abaheleire ekibonabonyio eki kyona, ngu mbagambire nti, “Nk'okwo munshengire mukakolera baruhanga abanyamahanga omu nsi yanyu, nikwo murakolera mutyo abanyamahanga omu nsi etali yanyu.”

Ruhanga natatira eihangalye

²⁰ Ekigambo eki mukigambire baijukuru ba Yakobo, n'aba Yuda muti,

²¹ “Inywe bafera, inywe abataina magezi, abaina amaisho kyonkai mutalikubona; abaina amatwi nawe mutalikuhulira, muhulire ekigambo eki.

²² Omukama nabaza ati, ‘Kubaki mutalikuntina? Kiki okumbona mutajugumbire? Enyanja nkagiteraho omushenye kaguba rubibi rwayo, omuhingo ogw'ebiro byona ogw'enyanja egyo etakurabaho. N'orwo amayengo gakutera, tigaina kushaga rubibi orwo; galikahinda tigaina kurushabuka.

²³ Kyonkai abantu b'eihanga eli baina eijegu mara bashengi. Balekeire kuba besigwa, bansigaho.’

²⁴ Tibalikutekeleza bati, ‘Tutine Omukama Ruhanga waitu, atutunga enjura omu kirumo kyayo, enjura y'omuhanguko n'ey'etoigo, akashuba akatuteraho n'ekirumo ky'okugesheramu.’

²⁵ Entambara zanyu nizo zaihireho ebyo; amafu ganyu gakabaimisa ebirungi.

²⁶ Omw'ihanga lyange halimu abantu ababi, nibahuna nk'abategi b'ebinyonyi, nibatega abantu emitego nibabakwata.

²⁷ Okwo orugega rwijurwa ebinyonyi ebyo bategire, nikwo amaju gabo gaijwire ebintu ebyo bagobeize banu. Nikyo batungiire bakaba rutare,

²⁸ bakagomoka nibatiginyuka. Bayehoiremu, nibafakalira kimoi. Enfuuzi tibalikuziramuza mazima, kuziha milembe. Kandi tibalikutonganira balikuboyerwa.”

²⁹ Mbwenu Omukama nabaza ati, “Abantu aba ntababonabonyia aha rw'ebigiro ebi? Eihanga elyab'eli ntalyehoroza?

³⁰ Omu nsi egi habairemu eky'amani ekilikutinisa:

³¹ Abarangi nibaranga ebishuba, kandi abakuhani nibatwara abantu nk'okwo abarangi babaragilira; mara abantu bange ebyo nibabisiima. Kyonkai orwo amaheleruka galibaho muligira mutai?”