Yeremia 44 - Ebibulia 2001

Yeremia nataisa aba Yuda kufukamira ebihuuku omuli Misiri

¹ Omukama akangambira aha Bayahudi bona ababaire nibatura Misiri omuli Migidoli, Tahipanesi, Memfisi n'omu nsi ya Patorosi, ati,

² “Omukama w'amahe, Ruhanga wa israeli nagamba ati: Enaku ezo nateize Yerusalemu n'ebigo byona bya Yuda mukazibona. Leba mbwenu Yerusalemu n'ebigo ebyo matongo, taliho alikubituramu,

³ aha rw'enshonga y'amafu ago bakozire, bakannigaza orwo bafukamire baruhanga abandi, bakabotera n'obunuma, baruhanga abo batamanyaga, nangu nainywe na baisheinywe.

⁴ Nashuba naikara nimbatumaho abairu bange abarangi ningamba nti, ‘Eihano eli mutalikora, ninditamwa muno!’

⁵ Kyonkai tibategire matwi, tibahulire. Bakazigilira okufakara n'okwotera baruhanga abandi obunuma.

⁶ Aha rw'ekyo nkatamwa nanigalira muno Yerusalemu n'ebigo bya Yuda nabisinsimukira, byasilika byafa omwebuura na mambwenu.”

⁷ “Aho kityo inye Omukama w'amahe, Ruhanga wa Isiraeli, kanya aka nimbaza kubaki nimwekolera kubi muti. Nimwenda kuletera abashaija akabi, n'abakazi, n'abaana, n'enkelemeke, eihanga lyanyu life lihweho lyona?

⁸ Ahakubaki nimufukamira ebihuuku n'okutambira baruhanga abandi munu omuli Misiri mbali mwizire kutura? Nimunnigaza! Nimukora muti kwesilikya kabuli ihanga libajamya, kandi bakata nibabajumisa banu?

⁹ Mwayebwa ebibi byona ebyo bashwenkurw'inywe, abakama ba Yuda n'abakazi babo bakozire omu bigo bya Yuda na Yerusalemu? Mara nainywe na bakazi banyu mubulimu.

¹⁰ Nawe kuhika kir'eki timuketohize. Timukantinire, anga kukwata Mateka gange na biragiro byange ebyo nahaire baisheinywe nainywe.”

¹¹ “Kityo aho inye Omukama w'amahe, Ruhanga wa Isiraeli, ninyija kubahinduka, na Yuda ngisilikye yona.

¹² Kandi ensigalira za Yuda ezamalize kugya kutura Misiri, balifa bona bahweho. Baligwa Misiri, baitirweyo embanda n'enjara kwema ahali kacheku kugoba ahali rubamba. Abalibabona balibatina. Abantu balibajaamya mara babajumise banu.

¹³ Abalikutura Misiri ndababonabonyia nk'okwo mbonabonyize aba Yerusalemu nkabaisa embanda, enjara n'endwara.

¹⁴ Ensigalira za Yuda ezizire kutura Misiri zirahwaho zona, tizihunge. Tibaligaruka Yuda mbali balikwegomba kugaruka kuba niyo batura. Tibaligarukayo shana ensingwa zike.”

¹⁵ Aho abashaija bona ababaire nibamanya okwo bakazi babo bayoteraga baruhanga abandi obunuma, n'abakazi abandi bangi muno ababaire baliho, n'abaturaga Patorosi omuli Misiri, bamporora bati,

¹⁶ “Ebyo watugambira omw'ibara ly'Omukama titulikwenda kubihulira.

¹⁷ Shana buli kimoi ekyo turaba tunahiire nikyo turakora: Twotere Omukama w'Eiguru obunuma, tumuhongere ebihongo by'okunywa nk'okwo twagiraga, ichwe na batataichwe, abakama baitu n'abatwazi baitu omu bigo bya Yuda n'omuli Yerusalemu. Aha rw'okuba aho nirwo twabonaga ekyakulya kingi muno, tukatunga, kandi titwagwerwaga naku.

¹⁸ Kyonkai kwema tulekeire kwotera Omukama w'Eiguru obunuma n'okumuhongera ebihongo by'okunywa, leba, taliho kyotwinakyo; twashuba twagwa aha mbanda, n'enjara yatwita.”

¹⁹ Abakazi nabo bagira bati, “Katwabaire twotera omukamakazi w'eiguru obunuma, tukamuhongera n'ebihongo by'okunywa, nolenga oti baibaichwe ekyo tibakisimaga kubona nitumuchumbira obukeki obuliho ekishushanikye n'okumuhongera ebihongo by'okunywa?”

²⁰ Ahanyuma ngambira abantu bona, abashaija n'abakazi, abamporoire batyo nti,

²¹ “Mbwenu kamwayoteire obunuma omu bigo bya Yuda na Yerusalemu, inywe na baisheinywe, abakama banyu n'abatwazi banyu, n'abanyansi, Omukama ebyo tiyabyekomyaga?

²² Akaba atakishobora kwegumisiliza bihemu byanyu n'amahano ago mwakoraga. Nikyo ensi yanyu ebeleire y'omuraamo, ekasilika ekafa omwebuura, ekaburwa ab'okugituramu na mambwenu.

²³ Kuba mukotera baruhanga abandi obunuma, mwafakalira Omukama, timwahuliire byo yabagambire. Amatekage, ebiragirobye n'emikuye timwabikwete. Nikyo enaku ezi zibateleire kulemwa kugoba na kir'eki.”

²⁴ Abantu bona, nawe okukiraho abakazi, nkabagambira nti, “Aba Yuda inywena abali Misiri muhulire Omukama okwo alikugamba.

²⁵ Omukama w'amahe, Ruhanga wa Isiraeli nagamba ati, ‘Inywe n'abakazi banyu mukakyegambira n'eminwa yanyu, mwashuba mwakikoza emikono yanyu. Mukagamba muti: Ebyo turahiire nitwija kubikorakwo. Omukama w'Eiguru nitwija kumwotera obunuma mara tumuhongere ebihongo by'okunywa.’ Mbwenunu ebyo mwarahiire mubyekomye, mubikore.

²⁶ Orw'ekyo aba Yuda inywena abali Misiri muhulire okwo Omukama alikugamba. Nagira ati, ‘Leba ninahira eibara lyange ely'ekitinwa, okwo hataliho muntu wena wena owa Yuda omuli Misiri yona alyatuza akanwake eibara lyange nagamba ati: Obuso bw'Omukama. Alikugamba n'inye Omukama.

²⁷ Tindikwija kubaha goshoko. Ninyija kubateza enaku. Aba Yuda inywena abali Misiri muramarwaho embanda n'eifa, muhweho.

²⁸ Kandi abarahunga aha mbanda bararuga Misiri basingiirwe Yuda, mara nabo baraba bali bake. Ensigalira zona za Yuda ezaizire kutura Misiri ziramanya alikugamba amazima n'ohai: Inye anga zonene.

²⁹ Inye Omukama, aka niko kabonero ako muramanyiraho okwo ndikwija kubabonabonyia omu nsi egi mwije mumanye okwo ebyo nagambire, kubabonabonyia, bili by'amazima.

³⁰ Farao Hofura omukama wa Misiri ndamunaga omu mikono y'ababishabe abenda kumwita, nk'okwo nanagiire Zedekia omukama wa Yuda omu mikono ya Nebukadineza omukama wa Babiloni, ayabaga mubishawe ayayendaga kumwita.’ ”