Yeremia 42 - Ebibulia 2001

Abantu nibatakira Yeremia kubashabira

¹ Ahanyuma abakuru bona b'eihe na Yohanani eya Karea, na Azaria eya Hoshaya, n'abantu bona kwema ahali kacheku kugoba ahali rubamba, baija

² bangambira bati, “Singa ohulire okutaka kwaitu, otushabire aha Mukama Ruhanga wawe. Otushabire ichwena abahonokire. Tubaire tuli bangi, kyonkai mbwenu twasigaireho bake, nk'okwo naiwe olikubona.

³ Otushabire aha Mukama Ruhanga wawe asinge atwoleke omuhanda ogwo tulikuragirwa kurabamu, n'ekyo turagirwe kukora.”

⁴ Inye aho mbashubamu nti, “Nabahulira, leba ndabashabira aha Mukama Ruhanga wanyu nk'okwo mulikushaba. Kandi kyona kyona ekyo Omukama arabahorora ndabagambira.”

⁵ Bashuba bangambira bati, “Omukama asinge abe mujulizi w'amazima mara omwesigwa katurabeiya tukaburwa kukora ebyo arakutuma k'otugambira.

⁶ Kyaba kirungi anga kibi, Omukama Ruhanga waitu owo tulikukutumaho ebyo aragamba turabihulira; tuhulire eiraka ly'Omukama Ruhanga waitu nirwo turagira emilembe.”

Omukama nahorora enshara ya Yeremia

⁷ Ebiro kabyakeire ikumi, Omukama yangambira ekigambo.

⁸ Ahanyuma nyeta Yohanani eya Karea n'abakuru bona b'eihe abo yabaire ainabo, n'abantu bona kwema ahali kacheku kugoba ahali rubamba,

⁹ mbagambira nti, “Omukama Ruhanga wa Isiraeli owo muntumireho kamugobya ebitako byanyu, nagamba ati,

¹⁰ Kamuraikara omu nsi egi, aho inya ndabombeka, timbakambure. Ndababyara, timbarandure; kuba nayechulize ekyo nabashasiize.

¹¹ Omukama wa Babiloni owo mulikutina mbwenu mutamutina. Mutamutina, kuba inye ndi hamoi nainywe, kubarokora n'okubaihya omu mikonoye. Alikugamba n'inye Omukama.

¹² Ndabagilira obuganyizi, nawe aije abaganyire mwikare omu nsi egi.

¹³ Kyonkai kamuragira muti, ‘Omu nsi egi titwikaremu,’ mutahuliire iraka ly'Omukama Ruhanga wanyu

¹⁴ nimugira muti, ‘Chei turagya Misiri mbali tutaligira ndashana, tutalihulira nzamba, tutaliburwa kyakulya tukarumwa njara, tube niyo tutura,’

¹⁵ ahonu inywe nsigalira za Yuda hulira ekigambo ky'Omukama. Omukama w'amahe, Ruhanga wa Isiraeli nagamba ati, Kamulikumaza kugya Misiri kuba niyo mutura,

¹⁶ aho endashana eyo mulikutina erabashangayo yonene okwo Misiri. N'eifa elyo mulikutina lirabahonderayo Misiri. Mara muragwayo.

¹⁷ Abantu bona abamalize kugya Misiri kuba niyo batura baraitirwayo embanda n'enjara n'endwara. Enaku ezo ndikwija kubasindikira taliho arasigaraho anga kuhonoka.”

¹⁸ “Kuba Omukama w'amahe, Ruhanga wa Isiraeli nagamba ati: Nk'okwo natamirwe nkanigara nkabonabonyia abantu ba Yerusalemu, nikwo ndatamwa ndababonabonyia orwo muragya Misiri. Muliba kinyaha; abalibabona balibatina, babakeene, mara babashekelere. Ensi egi timuligibona rundi.

¹⁹ Inywe nsigalira za Yuda, Omukama abagambire ati, ‘Misiri mutagyayo.’ Mumanyire kimoi okwo kir'eki ndikubatatira

²⁰ okwo mulikukora ebirabaisa. Mmuntumire aha Mukama Ruhanga wanyu nimugamba muti, ‘Otushabire aha Mukama Ruhanga wawe, mara kyona kyona ekyo Omukama Ruhanga waitu aragamba okitugambire mara turakikora.’

²¹ Mbwenu kir'eki nakibagambira, kyonkai byona ebyo antumire kubagambira taliho kyomulikuhulira.

²² Orw'ekyonu mumanyire kimoi okwo mulikwija kugwa aha mbanda, enjara ebaite, endwara nayo ebaite, ensi eyo mulikwegamba kugya kuba niyo muturamu niyo muragwamu.”