Yeremia 40 - Ebibulia 2001

Yeremia natura na Gedalia

¹ Orwo Nebuzaradani omukuru w'abalinzi yamazire kuntaishura kuruga Rama, Omukama akangambira ekigambo. Nebuzaradani akaba antwete Rama ndi omu mpingo hamoi n'endore zona eza Yerusalemu na Yuda ezabaire nizigya Babiloni omu buzahe.

² Omukuru w'abalinzi akantwara aha kabaju yangira ati, “Omukama Ruhanga wawe akagamba ensi egi kugikora kubi.

³ Mara agikozire kubikwo, yakora okwo yagambire, kuba mukamufakalira, ebyo yagambire timwabihuliire, nikyo enaku ezi zibagweleire.

⁴ Mbwenu leba nakwihya empingo omu mikono. K'oragonza kumpondera Babiloni ompondere, mara ndakumanya kurungi. Kyonkai k'okumpondera Babiloni kurakutama, otampondera. Ensi yona nogibona. Hona hona mbali orabona hali harungi mara hakusaine obe niyo ogya.

⁵ Kandi k'oraba nosigara, aho ogaruke owa Gedalia mutabani wa Ahikamu eya Shafani, ow'omukama wa Babiloni ataireho kuba gavana w'ebigo bya Yuda, oture nawe n'abantu abandi. Anga ogye ahandi mbali olikubona hasaine.” Ahanyuma omukuru w'abalinzi ampa entanda n'ebigemuro, antaishura ngenda.

⁶ Aho ngya Mizipa owa Gedalia eya Ahikamu, mba n'iwe ntura nawe hamoi n'abantu abasigaire omu nsi.

Gedalia gavana wa Yuda

⁷ Orwo abakuru bona b'eihe n'ab'abaisherukare babo ababaire bali omu nkambi bahulire okwo omukama wa Babiloni aronzire Gedalia eya Ahikamu kuba gavana kutwara ensi, akamukwasa abashaija, abakazi n'abaana, n'abaanaku nyakanaku ababaire bali omwo, ababaire batatwetwe Babiloni omu buzahe,

⁸ bakwata omuhanda bagya Mizipa owa Gedalia. Bonene abo ni Ishimaeli eya Netania, Yonatani eya Karea, Seraya eya Tanumeti, na batabani ba Efai Omunetofati, Yezania Omumakati, hamoi n'abashaija babo.

⁹ Gedalia eya Ahikamu mutabani wa shafani abaanahilira n'abashaija babo ati, “Mutatina kukolera Bakalidayo. Muture omu nsi egi, mukolere omukama wa Babiloni, mara muragira emilembe.

¹⁰ Kandi inye ninyija kutura Mizipa, mbe mubaka wanyu aha Bakalidayo orwo barataga kwija kunu. Kandi inywe mube nimunoga ezabibu nimuzijungamu edivai, ezeituni muzishekenyure muzijungemu amajuta, munoge n'ebiraba omu kyanda; ebyo byona mubiteke omu bikwato byanyu mubibike. Mushube muture omu bigo byanyu ebyo mukwete.”

¹¹ Kityo orwo Abayahudi bona ababaire bali Moabu n'omu Baamoni n'ababaire bali Edomu n'omu nsi ezindi bahulire okwo omukama wa Babiloni aina Abayahudi abasigiire Yuda, mara akataho Gedalia eya Ahikamu mutabani wa Shafani, kuba gavana akabatwara,

¹² aho baruga omu nsi zona ezo babaire basingiirwemu baija Yuda ahali Gedalia omuli Mizipa. Banoga ezabibu bajunga edivai nyingi muno. N'ebiraba by'ekyanda bakanoga bitali bike.

Ishimaeli nayenda kwita Gedalia

¹³ Yohanani eya Karea n'abakuru bona b'abaisherukare omu nkambi bakwata omuhanda baija Mizipa ahali Gedalia

¹⁴ bamubaza bati, “Iwe nomanya okwo Baalisi omukama w'Abaamoni atumire Ishimaeli mutabani wa Netania kukwita?” Kyonkai Gedalia eya Ahikamu tiyabaikiliize.

¹⁵ Ahanyuma omuli Mizipa mwonene Yohanani agambira Gedalia omu kyama ati, “Ontaishure ngende nyite Ishimaeli mutabani wa Netania, mara taliho arakimanya. Yakwitiraki, Abayahudi bona ab'oinabo kwija kulihweramu, n'abantu abasigaire Yuda kufa bakahwaho?”

¹⁶ Ndi Gedalia eya Ahikamu ahorora Yohanani eya Karea ati, “Ekintu eki otakukikora, kuba Ishimaeli nomubeiyelera.”