Yeremia 4 - Ebibulia 2001

Ruhanga naragira Abaisiraeli kwechuza

¹ Omukama nagamba ati, “Iwe Isiraeli k'oraba nogonza kungarukaho, ogaruke. Ebihuuku ebyo ntamwa k'orabinaga, okalekera kutera oku n'oku,

² mara okanahira oti, ‘Obuso bw'Omukama,’ aho oraba osainekwo kugir'otyo. Ahanyuma amahanga galinshaba omugisha mara galimpaisiliza.”

³ Aha rw'okuba Omukama nagambira abantu ba Yuda na Yerusalemu ati, “Ensi eyo mwalekire buleka k'eigara, mbwenu mugilime muleke kubiba embibo omu mahwa.

⁴ Endagano yanyu n'Omukama mugikwate, inywe aba Yuda na Yerusalemu munyehongere. Kitali kityo ekiniga kyange nikija kwaka okw'obona omuliro, aha rw'enshonga y'amafu ganyu, mara taliho arakiraza.”

Yuda netinisibwa okwo eratabalirwa

⁵ Omukama akagamba ati, “Mugambire Yuda na Yerusalemu, mutere enzamba omu nsi yona nimugamba muno muti, ‘Muhurure tugye omu bigo bya mugogo!’

⁶ Mukonyeze Sioni mwiruke, mutakelererwa! Kuba ninyija kuleta orushengo rw'amani, ninyija kurwemya bikara.

⁷ Entare yajumbukire omu kishaka kyayo, omwisi w'amahanga yaimukize; yarugire owabo kwija kwita ensi yanyu omwebuura. Ebigo bya Yuda birasigara amatongo, kandi tibiturwemu muntu.

⁸ Kityo mwekome engunia, muchure, mutage; kuba Omukama akyatunigaliire muno.”

⁹ Omukama akagamba ati, “Kiro kilinya abakama n'abatwazi obumanzi bulibahwa. Abakuhani balibumbulikwa, kandi abarangi balihahanwa emyoyo.”

¹⁰ Nirwo inye aho nagambire nti, “Waitu Mukama, nikwo kugir'oti abantu aba na Yerusalemu obalembire, orwo ogambire oti, ‘Timube kantu,’ kandi mbwenu okwo embanda ziraliire kubaita.”

¹¹ Amakiro galiho orwo aba Yerusalemu baligambirwa okwo omuyaga gulikwokya gulyema omu mabanga g'omw'irungu gukabahuta. Tiguliba muyaga gwa kwerura mushunga kushai,

¹² omuyaga ogwo Omukama alisindika guligira amani kushaga ogwo. Inye nyenene Omukama n'inye ndikuramura eihanga lyange.

Yuda nebundwa ababisha

¹³ Leba, omubisha airukire nk'ebichwi. Amagalige gairukire nk'akazimu, kandi efarasize okwanguha zashagaho enkwaju. Zatulya, twafa!

¹⁴ Iwe Yerusalemu, oyechuze entambara zawe nirwo orarokoka. Oliberahai n'ebitekelezo bibi?

¹⁵ Entumwa zemire Dani n'aha Ibanga lya Efraimu nizigamba okwo harabaho enaku.

¹⁶ Mugambire amahanga okwo omubisha yaizire. Mugambire Yerusalemu okwo ababisha barugire harai nibamira ebigo bya Yuda.

¹⁷ Yerusalemu bagibunda okwo abantu balinda endimiro, kuba ekigo ekyo kinshengire. Alikugamba n'inye Omukama.

¹⁸ Iwe Yuda, orushengo oru n'iwe warweletera aha rw'enshonga y'emirolere yawe n'eby'okozire. Waterwa enaku ezibi, zakushenshera zakugoba aha mutima.

Yeremia najunalira eihangalye

¹⁹ Ninshasha muno, ninshasha muno! Obushasi bwanyita! Omutima! Omutima gwantera muno! Tinakwesiza; kuba nimpulira enzamba z'endashana; rwabara!

²⁰ Orushengo oru niruhwa, oru nirutahamu; ensi yasilika yona. Amahema gange gasilika kibandagara, epazia zange zasilika aho n'aho.

²¹ Mberehai n'okubona ebendera y'endashana n'okuhulira enzamba ezo?

²² Omukama nagamba ati, “Abantu bange bafera, baana abarofu, tibaina magezi. Bafakare enyehwamu, tibaina karungi ako bakora.”

Yeremia nabona ekibundo ekilikwija

²³ Kanalebire ensi nabona okwo eli matongo mara eli mparamata. Ndeeba eiguru, mbona okwo guli mwilima.

²⁴ Kanalebire amabanga gona mbona nigatengeta, enshozi ezo zikaba nizizonga.

²⁵ Ndeeba, timbona muntu; n'ebinyonyi bikaba bisingirwe.

²⁶ Ndeeba ensi eyayezaga, mbona yabaire irungu, n'ebigo byona bili matongo aha rwenshonga y'ekiniga kingi muno ky'Omukama.

²⁷ Omukama nagamba okwo ensi yona elikwija kuba irungu, kyonkai tagisilikize kimoi.

²⁸ Nikyo ensi elichulira, n'eiguru likairagura, nkakigamba mara nkakigendelera. Tindikukyechuza kandi tindikwija kukileka.

²⁹ Abantu buli kigo barasingwa orwo barahulira ab'emyambi, n'efarasi niziligita. Barashenshera omu bishaka, batahe omu mpako z'amabare. Ebigo byona bisigare bushai, tibiturwemu muntu.

³⁰ Mbwenu iwe Yerusalemu emboijana iwe, ogendeleireki kujwara emyendo elikutukura? Emilengyo y'ezahabu wagimalira aha mubili, ebisige wabisiiga erangi! Noyelengya nokora obushai. Bagenda bawe nibakugaya, kandi nibenda kukwita.

³¹ Aha rw'enshonga mpuliire eiraka nk'ely'omukazi alikurumwa; obushasi nk'obw'omukazi alikusindikira omwana w'omuzigaijo. Elyo libaire lili iraka lya Sioni neshemeka, nenaga emikono, negira eti, “Nafa! Baija kunyita!”