Yeremia 37 - Ebibulia 2001

Zedekia nayehanuza ahali Yeremia

¹ Zedekia eya Yosia n'iwe Omukama Nebukadineza owa Babiloni yahaire engoma ya Yuda aha mwanya gwa Koniya eya Yehoyakimu.

² Kyonkai Zedekia ogwo n'abaramatabe, n'abantu, ebyo Omukama yandagiire inye omurangi kubagambira tibabihuliire.

³ Omukama Zedekia akwata Yehukali eya Shelemia, na Zetani omukuhani mutabani wa Maaseya, abatuma ahali inye nagamba ati, “Otushabire aha Mukama Ruhanga waitu.”

⁴ Aho nkashangwa nkyagenda omu bantu ntaina kyondikwebabara, kuba bakaba batakanfungire.

⁵ Abakalidayo bakashangwa babunzire Yerusalemu. Kyonkai orwo bahulire okwo eihe lya Misiri lyaija, bairuka.

⁶ Aho Omukama angambira ati,

⁷ “Omukama Ruhanga wa Isiraeli nagamba ati: Ogambire omukama wa Yuda akutumire ahali inye, okwo eihe lya Farao elizire kumujuna likwatilire kugaruka Misiri owabo.

⁸ Abakalidayo baragaruka batere ekigo eki, bakisinge bashube bakyokye.

⁹ Muleke kwebeiya kugamba muti, ‘Abakalidayo tibalikwija kututabalira na'kake;’ nibaija kubatabalira.

¹⁰ Nangu n'orwo mwakusinga eihe lyona ly'Abakalidayo abo mulikurashana nabo, bakasigara emputa zonkai, buli muntu omu ihemalye, bakwimuka bokya ekigo eki.”

Yeremia nibamukwata nibamufunga

¹¹ Orwo eihe lya Farao lyagobire, Abakalidayo baruga Yerusalemu bairuka.

¹² Aho nirwo nanye nagiire Benjamini kubona omwate gwange omu banyaruganda bange.

¹³ Kanabaire ndi aha Kihigi kya Benjamini, omukuru w'abaisherukare, eibaralye Iriya eya Shelemia, Shelemia eya Hanania, ankwata nagamba ati, “Iwe nogwera rubaju orw'Abakalidayo.”

¹⁴ Inye mugambira nti, “Ebyo bishuba. Inye tinkagweleire rubaju rwa Bakalidayo.” Kyonkai Iriya tafa gampuliliza. Ankwata, antwalira abatwazi.

¹⁵ Abatwazi baija kundya amaisho, bantera, bashuba banfungira omwa Yonatani omukarani, kuba bakaba babandize kufungiramu abantu.

¹⁶ Kanabaire namazire mabusi ebiro bingi omu karokoli,

¹⁷ Omukama Zedekia antumaho, anyegeza. Antwara omwa wenene ambaza omu kihama ati, “Omukama aina ekyo yagambireyo?” Ngamba nti, “Ekyo yagambireyo kiliyo.” Aho mugambira okwo omukama wa Babiloni alikwija kumukwata.

¹⁸ Nshuba mubaza nti, “Honene mbere nkukoleire kabiki, iwe anga abaramata bawe, anga abantu bawe, kunfunga?

¹⁹ Abarangi bawe balihai ababaire nibakugambira okwo omukama wa Babiloni atakutabalire anga kutabalira nsi egi?

²⁰ Mbwenu Rugaba rwange Omukama, ninkutagiliza ompulilize. Ohulire ekitako kyange kike, otanshubya mwa Yonatani omukarani ntaija nkagwamu.”

²¹ Kityo Omukama Zedekia aragira kabanteka omu rubuga rw'abalinzi; buli kiro bata nibangulira omugate omu mbarabara y'abakozi b'emikate, kulemwa kuhika orwo emikate yahoisize omu kigo. Mba nikwo nyikara ntyo omu rubuga rw'abalinzi.