Yeremia 3 - Ebibulia 2001

Obutesigwa bwa Isiraeli

¹ “K'omushaija yakutambya mukaziwe, omukazi ogwo akagenda akashwerwa omushaija ondijo, omushaija yakushuba ayegarukana omukazi owo yatambize? Eki kigambo eky'okuhagaza muno ensi. Oisire obwesigwa bwawe wafukamira baruhanga bangi, okyanyegarukana iwe? Alikukubaza n'inye Omukama.

² Oinunure amaisho olebe aha bubanga eiguru! Ni kabangaki ak'otakabyamagaho na ruhanga omunyamahanga? Washuntamaga aha muhanda olinzire bagenda bawe, nk'okwo Omwarabu alinda abo araita omw'irungu. Obusiyani bwawe bwisire ensi.

³ Ekyo nikyo kitangire enjura kugwa, enjura y'etoigo ekabura, kyonkai tolikwanga kugoka, obusiyani okyabuzigiliire.

⁴ Leba na mwaha waruga kungambira oti, ‘Tata, kwema ndi muto n'iwe oba munywanyi wange.

⁵ Olikara onigaliire ebiro byona, ontamwe kugoba aha maheleruka?’ Isiraeli, ebyo nibyo wagamba, kyonkasi entambara zona ezo washoboire okazikora.”

Elyeleme lya Isiraeli na Yuda

⁶ Omu makiro g'omukama Yosia Ruhanga akambaza ati, “Waboine okwo Isiraeli abuzirwe obwesigwa, nagya aha bubanga bwona n'aha bigabiro byona natera obumalaya?

⁷ Inye mbaire nintekeleza nti, ‘Ebi byona k'abikore kyonkai arangarukaho.’ Nawe tangarukireho. Nangu na Yuda, omurumuna atali murumuna, ebi abiboine byona.

⁸ Yuda ashubire yabona okwo natambize Isiraeli aha rw'enshonga y'obusiyanibwe; kyonkai wenene Yuda, omurumuna atali murumuna, taina kyoyatinire. Nangu na wenene yateire obumalaya.

⁹ Aha rw'enshonga y'obusiyani kumutwara kubi, Yuda ahagaize ensi, yafukamira emiti n'amabare.

¹⁰ N'orwo bili biti, Yuda alikweyeta murumuna wa Isiraeli, ayekozire oti nangarukaho n'omutima gwona, kyonkai nabeiya. Inye, Omukama, n'inye ndikugamba.”

¹¹ Omukama akashuba yangambira ati, “N'orwo Isiraeli atali mwesigwa, hakili nashayamu kushaga Yuda omurumuna atali murumuna.

¹² Ogende, bikara ogambeyo ebigambo ebi, ogambe oti, ‘Iwe Isiraeli omugoke, Omukama nagamba ngu ogaruke. Talikukutamwa, kuba wenene aba muganyizi. Talikwija kukutamwa biro byona.

¹³ Ekiliho oikilize okwo ofakaire. Oshengire Omukama Ruhanga wawe, washemera na baruhanga abanyamahanga omu bigabiro, waburwa kuhulira ebyo alikukugambira.

¹⁴ Mugaruke inywe baana abagoke, kuba Ruhanga n'iwe Mukama wanyu. Naija kubaihya omu bigo n'omu nganda abalete Sioni.

¹⁵ “ ‘Arabaha abashumba ab'alikwenda, abashumba abarashumba n'obumanyi n'amagezi.

¹⁶ Kandi omu makiro gali orwo muliba mwabaire bangi omu nsi elinya, abantu tibalishuba kugamba aha Sanduku yange y'Endagano. Tibaligitekeleza anga kugijuka. Tibaligyetaga, kandi tibalikora ndijo.

¹⁷ Omu biro ebyo Yerusalemu elyetwa nketo y'Omukama, amahanga gona galihurulira Yerusalemu gaije omu mabona g'Omukama, tibalishuba kugumangana mitima, kukora ebyo bonene balikwenda.

¹⁸ Omu makiro galinya oruganda rwa Yuda rulyema n'oruganda rwa Isiraeli, baruge bikara omu buzahe, bagaruke omu nsi eyo naheleire kimoi baish'enkurubo.’ ”

Eihanga lya Ruhanga nilifukamira ebihuuku

¹⁹ Omukama nagamba ati, “Isiraeli, nagonzaga k'oba mwana wange, kukuha ensi enungi, ey'okuba yawe limoilimoi mara enungi kukira amahanga gona. Nagonzaga k'onyeta, ‘Tata,’ mara okangumaho.

²⁰ Mazima, okw'omukazi omugoke asigaho mushaijawe, nikwo naiwe, ruganda rwa Isiraeli wansigireho. Alikugamba n'inye Omukama.”

²¹ Aha nshozi eiguru haliho okutaga: Abaisiraeli nibo balikutaka nibatongana, kuba bajangukire, bayebwa Omukama Ruhanga wabo.

²² Inywe baana abagoke mugaruke, ndabakiza, mushube mube besigwa. Mugambe muti, “Leba waitu twakugarukaho, kuba Omukama Ruhanga waitu aba iwe.

²³ Mazima okufukamira baruhanga abanyamahanga aha nshozi eiguru tikwinakyo kutugasiire. Omurokozi wa Isiraeli aba Mukama Ruhanga waitu.

²⁴ Kwema omu buto tutura tufukamira Baali, ruhanga enjanga, entaama n'ente zatuhwaho, n'abaana kutyo, nangu na buli kantu ako batatenkurw'ichwe batusigiire biro eby'eirai.

²⁵ Enshoni zituli kubi, tugokire, tituli ba kuzoka mu bantu. Ichwe na batatenkurw'ichwe kwema omu buto kugoba mambwenu tutura nitufakalira Omukama Ruhanga waitu. Taliho orwo turahuliire ebyo Omukama Ruhanga waitu atugambira.”