Yeremia 25 - Ebibulia 2001

Omubisha wa bikara

¹ Omu mwaka gwa kanai Yehoyakimu eya Yosia, omukama wa Yuda aliire engoma, nigwo mwaka gwa mbere Nebukadineza owa Babiloni abaire mukama, inye nyenene Yeremia, Omukama akangambira ekigambo ahali bona aba Yuda.

² Ekigambo ekyo inye Yeremia nkakigambira bona aba Yuda na Yerusalemu nti,

³ “Emyaka 23 yona, kwema omu mwaka gwa 13 Yosia eya Amoni, omukama wa Yuda, agiire aha ngoma kuturuka kir'eki, Omukama atura nangambira, mara nanye ebyo nyikara nimbibagambira, kyonkai timuhulira.

⁴ Mukanga kuhulira, n'okutega amatwi chei, n'orwo Omukama aikara nabatumaho abairube abarangi

⁵ nibabagambira bati, ‘Inywena okwo muli, buli muntu ayeshubeho alekere emize mibi, nirwo mulitura omu nsi egi ey'Omukama yabahaire kwema ahali batat'enkurw'ichwe kwema karai, mara akagibahera kimoi ebiro byona.

⁶ Muleke kwekwata baruhanga abandi kuba nibo mukolera n'okubafukamira, kandi mutannigaza aha rw'okufukamira ebihuuku ebyo mukozire inywe nywenene. Aho ndaba ntakibabonabonyia.’

⁷ Kyonkai na mwaha timukampuliire. Shana ekiliho mutura nimunnigaza, nimufukamira ebihuuku ebyo mukozire inywe nywenene, kwenaga omu kabi. Alikugamba n'inye Omukama.”

⁸ “Aha rw'ekyo Omukama w'amahe nagamba ati, ‘Orwo ngambire mukanga kumpulira,

⁹ mbwenu ndabasindikira enganda za bikara. Alikugamba n'inye Omukama. Nshube mbaletere n'omwiru wange Nebukadineza omukama wa Babiloni. Abantu abo baraita ensi n'abakagilimu, baite n'amahanga gona agabataine. Ndagaita omwebuura, abantu baganuge, bagatamwe, kandi galiikara gali matongo.

¹⁰ Kandi ndachwa ebyera n'amashemelerwa. Haraba hatakiliho kushwera anga kushwerwa; embengo ziraba zitakisa, etara zilekere kwaka.

¹¹ Ensi egi yona eraba ndara, ebe matongo, kandi amahanga aga gona galikolera omukama wa Babiloni 70.

¹² Orwo emyaka egyo nshanju elikya, ndibonabonyia omukama wa Babiloni n'eihengalye elyo, ensi y'Abakalidayo, mbature entambara zabo, ensi ngiite omwebuura, ebe matongo ebiro byona. Alikugamba n'inye Omukama.

¹³ Byona ebyo ndagambire aha nsi egyo, buli kantu akahandikire omu kitabo eki, ako Yeremia araba ararangiire amahanga gona, byona ebyo bilibaho.

¹⁴ Kuba amahanga gangi n'abakama b'amani balikwata Abakalidayo babahindure bairu babo; mbabonabonyie kuhonderana n'okwo bakozire kubi.’ ”

Ruhanga naramura amahanga

¹⁵ Omukama Ruhanga wa Isiraeli akangambira ati, “Ontore ekikompe ky'edivai ekijwire ekiniga kyange, okinyoise amahanga gona ago ndakutumaho.

¹⁶ Banywe batarambukane, mara babe baferwa aha rw'enshonga y'endashana yondikwija kubasindikira.”

¹⁷ Kityo Omukama mutora ekikompe ekyo, nakinyoisa amahanga gona ago yantumireho.

¹⁸ Amahanga ago ni Yerusalemu n'ebigo bya Yuda, n'abakama bayo, n'abatwazi bayo. Okwo akantumayo kuhasilikya hakaba matongo, abantu bakahagaya, bakahakeena, leba kugoba na kir'eki.

¹⁹ Haliyo na Farao omukama wa Misiri, abaramatabe, abatwazibe, abantube bona,

²⁰ n'abanyamahanga bona abakaturaga Misiri; abakama bona aba Uzi n'abakama bona aba Bufilisiti omu bigo bya Ashikeloni, Gaza, Ekironi n'abantu ba Ashidodi abahonokireho.

²¹ Mpahosi haliyo na Edomu, Moabu, n'Abaamoni;

²² abakama bona ba Tiro, abakama bona ba Sidoni, n'abakama bona aba buseli bw'Enyanja ya Mediterania;

²³ ebigo bya Dedani, Tema, Buzi, n'abantu bona abasharamemba;

²⁴ abakama bona ba Arabia n'abakama bona b'enganda ezitabiraine ezitura omw'irungu;

²⁵ abakama bona ba Zimuri, aba Elamu, n'aba Media;

²⁶ abakama bona aba bikara, ahaihi n'aharai, omuntu ahali ondi, n'engoma zona ezikaba omu nsi. Ahanyuma kabaliba banyoire ekikompe ekyo balihonderwa Sheshaki omukama wa Babiloni.

²⁷ “Oshube obagambire oti, ‘Omukama w'amahe, Ruhanga wa Isiraeli nagamba ati: Munywe, mutamiire mara mutanake, mugwe obutaimuka, aha rw'enshonga y'orushengo rw'endashana eyo ndikwija kubasindikira.’ ”

²⁸ “K'orabaha ekikompe bakanga kukitora, kukinywa, aho obagambire oti, ‘Omukama w'amahe nagamba ati: Nimuragirwa kukinywa!

²⁹ Kuba leba ekigo ekyetwa kyange mbwenu nabanza kukita; nimulenga muti ninyija kubaleka ntababonabonyize? Timulikwija kukira aha kibonabonyio, kuba abantu bona omu nsi ninyija kubasindikira orushengo rw'endashana. Alikugamba n'inye Omukama w'amahe.’ ”

³⁰ “Aha rw'ekyonu iwe obagambire ebigambo ebilikwija kubabaho, obagire oti: Omukama naija kuhinda ayemire omw'iguru, ayeme mbali asingiire ahatakatifu ayatangure eiraka, ahinde n'amani kubonabonyia obuhyobwe bw'entaama, agambe muno nk'abalikujunga ezabibu, abonabonyie abantu bona omu nsi.

³¹ Naija kugamba muno ensi yona ekahulira, kuba Omukama wenene amahanga agakwete omushango. Abantu bona naija kubaramura, kandi ababi bona abaise embanda. Alikugamba n'inye Omukama.”

³² Omukama w'amahe nagamba ati, “Enaku niziruga aha ihanga eli nizitera ihanga eli, orushengo rw'amani rwajugumbya ensi yona!

³³ Kandi kiro kili ab'Omukama aliita balijura ensi yona. Tibalibachulira, anga kubatwara wabo, anga kubaziika. Omu nsi balishusha amashai.”

³⁴ “Muchure inywe bashumba, mutage, mwekurunge omw'ijwi, inywe batwazi b'eihanga ly'Omukama. Obukiro bwagoba, babaite, abandi mutamage, babaite nk'empaya z'entaama ezirungi eziligiirwe.

³⁵ Abashumba n'abatwazi b'eihanga ly'Omukama tibalibona bwirukiro.

³⁶ Murahulira abashumba nibataga, abatwazi b'eihanga ly'Omukama nibachura! Aha rw'okuba eihanga lyabo Omukama yalinyaga.

³⁷ Ensi yabo ey'emilembe yagisiga amatongo, kuba anigaire muno.

³⁸ Omukama abantube yabaihyamu emikono nk'okwo entare enagaho empako yayo. Ensi egyo embanda y'omubisha n'ekiniga kibi ky'Omukama bigihindwire ndara.”