Yeremia 23 - Ebibulia 2001

Eshubi y'obukiro obulikwija

¹ Omukama nagamba ati, “Balibona abashumba abalikunaganaga obuhyo bwange bw'entaama, ezindi nangu bakazita!

² Nikyo inye, Omukama Ruhanga wa Isiraeli, ndikugambira aha bashumba, abalebelera abantu bange nti: Obuhyo bwange bw'entaama mubunaganagiire, mwazibinga, timwazifaho. Mbwenu inye Omukama naija kubabonabonyia nu, mbature amafu ganyu.

³ Ahanyuma nyije ngarure obuhyo bwange bw'entaama ezisigaireho, nzihye omu nsi zona ezo nazinaganagiiremu, nzigarura omu nsi yazo, zizare zikanye.

⁴ Nshube nzitereho abashumba ab'okuzilisa, kandi haraba hatakiliho n'emoi ey'okubura.”

⁵ Omukama nagamba ati, “Obukiro bulija, orwo ndironda omukama omugorogoki omuli baijukuru ba Daudi. Wenene ogwo aliba mukama w'obumanyi, kandi alikora ebirungi n'okuramuza amazima omu nsi yona.

⁶ Omu butwazibwe abantu ba Yuda baligira omuraro gurungi, kandi Isiraeli elitura omu milembe. Eibara balimweta bati: ‘Omukama n'iwe aturokora.’ ”

⁷ “Aha rw'ekyo inye Omukama mbagambire, amakiro galija orwo abantu baliba batakigamba bati, ‘Obuso bw'Omukama ayaihire Abaisiraeli Misiri.’

⁸ Shana baligamba bati, ‘Obuso bw'Omukama ayaihire Abaisiraeli omu nsi ya bikara n'omu nsi ezindi mbali yabaire abaanaganagiire.’ Aho balitura omu nsi yabo.”

Yeremia nagambira abarangi

⁹ Lero abarangi nu abo: Omutima tigundi munda, amagufa gona nigajugumba. Ninshusha omutamiire ow'edivai ekilize amani; naho ndikafa ntyo nazira Omukama n'ebigambobye ebitakatifu.

¹⁰ Ensi yona eijwire abantu abatali besigwa aha Mukama. Ensi eramirwe, nechura, n'amalisizo g'omw'irungu gomire. Abantu ebyo balikukora ti birungi, n'obushobora bwabo nibabukoza kubi.

¹¹ Omurangi n'omukuhani tibalikutina Ruhanga, nangu n'omuli Rwensinga yange nabakwete nibakoleramu amahano. Alikugamba n'inye Omukama.

¹² Aha rw'ekyo ebyo balikukora nibishusha obuhanda obulikutelera omu mwilima. Omwo nimwo barababinga bagiire, mara batelere bagwe. Haliho ekiro orwo ndabaha ekibonabonyio, nkabateza enaku. Alikugamba n'inye Omukama.

¹³ Abarangi ba Samaria mbaboinemu eihano. Nibaranga omw'ibara lya Baali, bahabisa n'Abaisiraeli bange.

¹⁴ Kyonkai kandi omu barangi ba Yerusalemu omwo mboinemu eihano nyabuhano. Nibasiyana, nibagamba n'ebishuba, nibashuba nibahwera abalikukora kubi. Kityo taliho muntu alikweshubaho. Bona nibanshusira Sodoma, n'aba Yerusalemu bona nibanshusira aba Gomora.

¹⁵ Aha rw'ekyo inye Omukama w'amahe, abarangi ba Yerusalemu nimbagambaho nti: “Ndabalisa eboga ezilikushalira, n'amaizi g'okunywa mbahe againa obumara. Kuba okutatina Ruhanga kw'abarangi ba Yerusalemu kwamaraho ensi yona.”

¹⁶ Omukama w'amahe nagamba ati, “Ebyo abarangi balikubagambira mutabihulira. Nibabashubiza ebishuba. Kuba nibabagambira ebyo bonene balikutekeleza, tibyo inye Omukama ngambire.

¹⁷ Baikara nibagambira abagaya eby'Omukama agamba bati, ‘Timulikwija kuba kantu.’ Kandi buli muntu ow'eijegu bamugira bati, ‘Iwe akabi tikalikugwera!’ ”

¹⁸ “Mbwenu n'ohai omu barangi abo aragiire omu rukiiko rw'Omukama akamanya anga akahulira ekigambokye, anga kukihuliliza akakyeteeka?

¹⁹ Murahulira Omukama asindikire omwigundu! Yanigara; embuyaga neija kwatikira aha mitwe y'abafakare.

²⁰ Orwo Omukama yanigara aranigalira kimoi kuhika orwo aragobesheleza karugendo ekyo araliire. Ekigambo eki mulikishobokerwa kurungi omu makiro agalija.

²¹ Abarangi abo baketumisiliza, inye tinkabatumaga. Tinyina kyondabagambiire; nibagamba ebyabo.

²² Kyonkai kuba baraizire omu rukiko rwange bakubaire nibagambira abantu ebyo ngambire. Bakubaire babahabwire balekeire kufakara, balekeire amafu gabo.”

²³ Omukama nabaza ati, “Nimugira muti inye mba Ruhanga atura omu mwanya gumoi, tintura buli hantu?

²⁴ Omuntu aina mbali yakwesheleka ntamuboine? Alikubaza n'inye Omukama, T'inye ndi hona, omw'iguru n'omu nsi?

²⁵ Nahuliire ebishuba eby'abarangi balikuranga omw'ibara lyange nibagamba bati, ‘Ndosire! Ndosire!’

²⁶ Mbwenu abarangi abo b'ebishuba baraberahai n'okutekeleza ebishuba omu mitima yabo, ebishuba ebyo balikutekeleza baba nibyo baranga.

²⁷ Nibarotorolerangana ebiroto, nibagonza kunyihyaho abantu bange, nk'okwo baishebo bandugireho bakekwata Baali.

²⁸ Omurangi araba aina ekiroto, ekiroto abe nikyo arotorora. Kandi owo ndaba ndagiire ekigambo kyange, ekigambo kyange ekyo akigambe n'obwesigwa. Omushunga nigushaga engano?

²⁹ Mbwenusi ekigambo kyange tikilikushusha omuliro anga enyondo ebyatayata eibare?

³⁰ Aha rw'ekyo nikyo ndikurwanisiza abarangi abalikugamba eby'abarangi abandi bakabihindura byabo.

³¹ Nindwanisa abarangi abalikugamba ebili byabo nibagamba okwo babitumirwe inye.

³² Abalikuranga ebiroto by'ebishuba nimbatamwa. Nibagambira abantu ebishuba nibabahabisa, nibafa kugambira elyo okwo inye ntabatumire anga ntabaragiire, kandi tibaina kyobalikugasira bantu n'akake. Alikugamba n'inye Omukama.”

Omukama nalemelerwa

³³ Omukama akangambira ati, “K'omw'ihanga lyange halirugwamu omuntu, anga omurangi, anga omukuhani akakubaza ati, ‘Omukama ainayo kigamboki?’ Omugarukemu oti, ‘Omukama wenene nagamba ngu inywe eihangalye nimumusikilira, mara naija kubachwa.’

³⁴ Ekindi, alikaba murangi anga omukuhani anga omuntu wena wena, omw'ihanga eli, aligira ati, ‘Omukama ainayo kigamboki,’ ogwo ndimubonabonyia n'ekaye.

³⁵ Obagambiire buli muntu abaze mutahiwe anga omurumuna ati, ‘Omukama ahoroireki?’ Anga ati, ‘Omukama agambireki?’

³⁶ Batalishuba kugamba bati, ‘Omukama ainayo kigamboki?’ Kuba ekigambo ekyo ekilemeera kiba ekyo omuntu ayegambire wenene. Kityo nikwo bachulika ebigambo by'Omukama Ruhanga w'amahe, Ruhanga waitu.

³⁷ Omurangi oramubazaga oti, ‘Isi Omukama akuhoroireki?’ Anga oti, ‘Isi Omukama agambireki?’

³⁸ Kandi kabalichwa omuhango gwange ogu bakagamba bati, ‘Omukama ainayo kigamboki?’ aho iwe obagambire

³⁹ okwo ndibabaratura ahansi nkabachwisa harai, nkabachwa, bonene n'ekigo ekyo nabahaire kwema ahali baish'enkurubo.

⁴⁰ Mbe nikwo mbakwasa ntyo enshoni n'okubashekeleza ebiro byona. Mara enshoni ezo tizilyebeka.”